ខ្សែប្រយុទ្ធវ័យក្មេងដ៏ឆ្នើមរបស់ក្លិបភ្នំពេញក្រោន លឹម ពិសុទ្ធ ដែលបានបាត់បង់ឱកាសម្តងទៅហើយ ចំពោះការមិនបានចូលលេងតំណាងឱ្យកម្ពុជា នៅក្នុងការប្រកួតពានរង្វាន់ AFF U23 Championship 2022 នោះ គឺរូបគេ នឹងបាត់បង់ឱកាសសំខាន់មួយទៀត ចំពោះការខកខាន ជួយក្រុមជម្រើសជាតិកម្ពុជា នៅក្នុងការប្រកួតស៊ីហ្គេម លើកទី៣១ ឆ្នាំ២០២២នេះ នៅប្រទេសវៀតណាម។
ការបាត់បង់ឱកាសដ៏ធំរបស់ លឹម ពិសុទ្ធ នៅក្នុងការប្រកួតផ្នែកកីឡាបាល់ទាត់បុរស ក្នុងព្រឹត្តិការណ៍ ស៊ីហ្គេម លើកទី៣១ ដែលនឹងត្រូវធ្វើនៅខែឧសភា ឆ្នាំ២០២២នេះ គឺដោយសារតែកីឡាករវ័យក្មេង មានសមត្ថភាពល្អរូបនេះ នឹងត្រូវធ្វើការវះកាត់ ដើម្បីព្យាបាលការបែកទ្រនាប់ជង្គង់ខាងឆ្វេង។ នេះបើតាមការប្រកាសរបស់ក្លិបភ្នំពេញក្រោន។
«ក្លិបបាល់ទាត់ភ្នំពេញក្រោន សូមជម្រាបជូនអ្នកគាំទ្រទាំងអស់ ឱ្យបានជ្រាបថា កីឡាករ លឹម ពិសុទ្ឋ បានបែកទ្រនាប់ជង្គង់ជើងខាងឆ្វេង ហើយបន្ទាប់ពីឆ្លងកាត់ការពិនិត្យយ៉ាងយកចិត្តទុកដាក់ពីសំណាក់ក្រុមគ្រូពេទ្យរួចមក ជាលទ្ធផល ពិសុទ្ឋ ត្រូវធ្វើការវះកាត់បញ្ហារបួសនេះ»។ នេះជាការប្រកាសផ្លូវការ នៅលើផេចហ្វេសប៊ុកផ្លូវការរបស់ក្លិបភ្នំពេញក្រោន ផ្ទាល់ កាលពីថ្ងៃចន្ទម្សិលមិញ។
ក្រុមម្ចាស់ជើងឯកលីគកំពូល៧សម័យកាល មួយនេះ បានបន្ថែមថា៖ «ក្លិបបាល់ទាត់ភ្នំពេញក្រោន សូមថ្លែងអំណរគុណចំពោះការយកចិត្តទុកដាក់ពីសំណាក់អ្នកគាំទ្រ ក៏ដូចជាសហព័ន្ធកីឡាបាល់ទាត់កម្ពុជា ដែលបានសហការជាមួយក្លិបក្នុងករណីព្យាបាលរបួសរបស់កីឡាកររូបនេះ។ គួរបញ្ជាក់ថា ពិសុទ្ឋ អាចនឹងនៅឆ្ងាយពីទីលានក្នុងរយៈពេលប្រមាណពី ២ ទៅ ៣ ខែ ជាមួយនឹងក្តីសង្ឃឹមថា រូបគេនឹងត្រឡប់មកវិញជាមួយភាពរឹងមាំសម្រាប់ភ្នំពេញក្រោន ព្រមទាំងឱកាសក្នុងក្រុមជម្រើសជាតិកម្ពុជាផងដែរ»។
គួរបញ្ជាក់ថា កីឡាករ លឹម ពិសុទ្ធ ត្រូវបានអ្នកចាត់ការទូទៅក្រុមជម្រើសជាតិកម្ពុជា លោក Keisuke Honda សម្រេចដកចេញពីការប្រមូលក្នុងU23ជម្រើសជាតិកម្ពុជា នៅមុនការប្រកាសបេក្ខភាពចុងក្រោយទាំង២៨នាក់ ដែលទើបបានបញ្ចប់ការប្រកួតជម្រុះតាមពូលA នៃពានរង្វាន់ AFF U23 Championship 2022 នេះ ហើយការសម្រេចដកនេះ មិនមែនដោយសារ ពិសុទ្ធ បានធ្លាក់ចេញពីការធ្វើតេស្តនោះទេ ប៉ុន្តែដោយសារតែ លោក Honda មើលឃើញ លឹម ពិសុទ្ធ មានរបួសជង្គង់នេះ អ៊ីចឹងបើបណ្តោយឱ្យគេលេងបន្តទៀត របួសនេះ អាចកាន់តែធ្ងន់ធ្ងរ និងប៉ះពាល់ដល់អាជីពរបស់គេ៕