បរទេស៖ ក្រុមតោខៀវ Chelsea បានបង្ហាញថា ពួកគេនៅតែអាចបង្ហាញពីភាពខ្លាំង ទោះគ្មានខ្សែប្រយុទ្ធ Romelu Lukaku ក៏ដោយ ខណៈដែលខ្សែបម្រើស្លាប Kai Havertz បានស៊ុតបាល់បញ្ចូលទី ក្រោយពីចូឡជំនួសកន្លែងរបស់តារាឆ្នើមអន្តរជាតិបែលហ្ស៊ិករូបនេះ ក្នុងពេលក្រុមខ្លួនដណ្តើមបានជ័យជម្នះក្នុងលទ្ធផល ២-០ លើក្រុម Lille ក្នុងការប្រកួតក្របខ័ណ្ឌ Champions League វគ្គ១៦ក្រុមចុងក្រោយ ជើងទី១ កាលពីថ្ងៃអង្គារ។
ក្រុមរបស់លោក Thomas Tuchel បានគ្រប់គ្រងការប្រកួតនេះ តាមរយៈគ្រាប់បាល់ស៊ុតបញ្ចូលទីរបស់ Havertz ក្នុងតង់ទី១ និងគ្រាប់បាល់ដ៏ល្អរបស់ Christian Pulisic នៅតង់ទី២ នាកីឡដ្ឋាន Stamford Bridge។ ក្រុមម្ចាស់ការពារជើងឯកមួយនេះ រំពឹងទុកថា នឹងឈានទៅវគ្គ៨ក្រុមចុងក្រោយ នៅពេលដែលពួកគេធ្វើដំណើរទៅកាន់ប្រទេសបារាំង សម្រាប់ការប្រកួតជើងទី២ នៅថ្ងៃទី១៦ ខែមីនា។ ចំណុចអវិជ្ជមានតែមួយក្នុងរាត្រីដ៏ល្អសម្រាប់ Chelsea និងលោកគ្រូបង្វឹក Tuchel គឺការរងរបួសរបស់ Ziyech និងខ្សែបម្រើ Mateo Kovacic នៅមុនពេលការប្រកួតពាន EFL Cup វគ្គផ្តាច់ព្រ័ត្រជាមួយនឹងក្រុម Liverpool នាកីឡដ្ឋាន Wembley នៅថ្ងៃអាទិត្យ សប្តាហ៍នេះ។
ស្របពេលជាមួយគ្នានេះ កីឡាករ Dusan Vlahovic បានបង្កើតឲ្យមានការភ្ញាក់ផ្អើល តាមរយៈរកបានគ្រាប់បាល់ ក្រោយពីលេងបានត្រឹមតែ៣២វិនាទី ក្នុងការបង្ហាញខ្លួនក្នុងក្របខ័ណ្ឌ Champions League ជាលើកដំបូងរបស់គេកាលពីថ្ងៃអង្គារ ប៉ុន្តែ Juventus ត្រូវមានការងារជាច្រើនទៀតដែលត្រូវធ្វើ ដើម្បីទៅវគ្គ៨ក្រុម ក្រោយពីដណ្តើមបានត្រឹមលទ្ធផលស្មើ ១-១ ជាមួយនឹងក្រុម Villarreal ក្នុងការប្រកួតជើងទី១៕
ប្រភពព័ត៌មាន៖ Channel News Asia
