អតីតអ្នកចាំទីដៃទី១របស់ក្រុមជម្រើសជាតិកម្ពុជា អ៊ុំ សេរីរ័ត្ន នឹងត្រូវប្តូរឯកសណ្ឋានថ្មី ក្នុងនាមជាសមាជិករបស់ក្រុមព្រះខ័នរាជស្វាយរៀង វិញម្តង សម្រាប់ការប្រកួតរដូវកាលថ្មី ឆ្នាំ២០២២ ហើយក៏ស្របពេលដែលក្លិបមានមូលដ្ឋាន នៅកីឡដ្ឋានខេត្តស្វាយរៀង មួយនេះ បានធ្វើសំបុត្រទស្សនាមួយរដូវកាល សម្រាប់អ្នកគាំទ្រផងដែរ។
អ្នកចាំទី អ៊ុំ សេរីរ័ត្ន ត្រូវបានសមាគមក្លិបកីឡាបាល់ទាត់កងយោធពលខេមរភូមិន្ទ TIFFY ARMY FC (ទ័ព) ដែលជាក្លិបដើមរបស់ខ្លួន ប្រកាស កាលពីម្សិលមិញថា អ៊ុំ សេរីរ័ត្ន នឹងចូលរួមជាមួយក្លិបព្រះខ័នរាជស្វាយរៀង ក្នុងលក្ខខណ្ឌខ្ចីជើង សម្រាប់ការប្រកួត១រដូវ ឆ្នាំ២០២២នេះ។
ការចាកចេញរបស់អ្នកចាំទី អ៊ុំ សេរីរ័ត្ន វាបានបើកផ្លូវឱ្យប្អូនបង្កើតរបស់ខ្លួន គឺអ្នកចាំទីឆ្នើម អ៊ុំ វិចិត្រ អាចបង្ហាញសមត្ថភាព ក្នុងជម្រើសទី១ ដោយស្កប់ចិត្ត សម្រាប់ការវិលត្រឡប់ពីការខ្ចីជើងរបស់ក្រុមភ្នំពេញក្រោន ចំនួន២រដូវកាល ដើម្បីមកការពារទីឱ្យក្រុមទ័ព ជាថ្មី នៅរដូវកាលនេះ។
ជាមួយគ្នានេះ អ៊ុំ សេរីរ័ត្ន ដែលទើបជាពីរបួសសះស្បើយ ពីរបួសវះកាត់ដែរនោះ នឹងអាចបានបង្ហាញសមត្ថភាពជាថ្មី នៅលើទីលានផងដែរ ដើម្បីបង្ហាញឱ្យអ្នកគាំទ្របានឃើញវិញ ចំពោះការសង្រ្គោះគ្រាប់បាល់ដ៏ល្អរបស់គេ ព្រោះកន្លងមក អ៊ុំ សេរីរ័ត្ន បានក្លាយជាអ្នកចាំទីដៃទី១ ទាំងឱ្យក្រុមទ័ព និងក្រុមជម្រើសជាតិកម្ពុជា ផងដែរ។
សម្រាប់ការស្វាគមន៍ ការធ្វើដំណើរពីកីឡដ្ឋានស្តាតចាស់ ទៅកាន់កីឡដ្ឋានខេត្តស្វាយរៀងនេះ ក្រុមព្រះខ័នរាជស្វាយរៀង បានចាត់ទុក អ៊ុំ សេរីរ័ត្ន ជាម៉ាស៊ីនបញ្ឈប់គ្រាប់បាល ដោយក្លិបមួយនេះ សរសេរបង្ហោះ អមដោយវីដេអូសង្រ្គោះបាល់របស់ អ៊ុំ សេរីរ័ត្ន ថា៖«ស្វាគមន៍ ម៉ាស៊ីនបញ្ឈប់គ្រាប់បាល់ថ្មីរបស់យើង»។
ស្របពេលជាមួយគ្នានេះដែរ ក្លិបព្រះខ័នរាជស្វាយរៀង ក៏បានឈានដល់ការធ្វើសំបុត្រពិសេស សម្រាប់អ្នកគាំទ្ររបស់ខ្លួន គឺសំបុត្រ ដែលអាចចូលទស្សនាការប្រកួតរបស់ក្រុមស្វាយរៀង បានពេញ១រដូវកាលតែម្តង ហើយសំបុត្រនេះ មានតម្លៃសរុបត្រឹម ៧០០០០ រៀល តែអាចទស្សនាការប្រកួតវរបស់ក្រុមស្វាយរៀង នៅកីឡដ្ឋានខេត្តស្វាយរៀងនេះ បានរហូតដល់១៧ប្រកួត៕
