កីឡាករកម្ពុជា លេងក្នុងតំណែងខ្សែការពារកណ្តាលម្នាក់ទៀតរបស់ក្លិបបាល់ទាត់ភ្នំពេញក្រោន នឹងត្រូវចាកចេញពីការប្រកួតប្រជែង នៅលីគកំពូលកម្ពុជា ដើម្បីចេញទៅប្រកួតប្រជែង នៅលើទឹកដីថ្មី នៃលីគកំពូលម៉ាឡេស៊ី (Malaysia Super League) នារដូវកាល ឆ្នាំ២០២២នេះ។
ខ្សែការពារកូនខ្មែរ-បារាំង ដែលធ្លាប់ប្រកបអាជីព ក្នុងនាមជាកីឡាកររបស់ក្លិបភ្នំពេញក្រោន អស់រយៈពេល៧ឆ្នាំនោះ ត្រូវបានក្លិបម្ចាស់ជើងឯក៧សម័យកាលមួយនេះ ប្រកាសពីការកីឡាករ កុក បូរីស ឱ្យទៅលេងនៅ Sarawak United FC ដែលជាក្លិបលេងនៅក្របខណ្ខ Malaysia Super League ក្នុងលក្ខខណ្ឌខ្ចីជើង១រដូវកាល។
តាមរយៈការប្រកាសនេះ បានបញ្ជាក់ថា កុក បូរីស នឹងត្រូវចាក់ចេញពីទីក្រុងភ្នំពេញ ដែលរូបគេ ធ្លាប់បានរស់នៅជាច្រើនឆ្នាំមកនេះ ដើម្បីទៅប្រកបអាជីព បាល់ទាត់នៅលីគកំពូលម៉ាឡេស៊ី វិញម្តង ខណៈខ្សែប្រយុទ្ធ ចាន់ វឌ្ឍនាកា, កែវ សុខផេង, ប្រាក់ មុន្នីឧត្តម និង ធារី ចន្ថាប៊ីន សុទ្ធតែធ្លាប់បានទៅនៅលីគកំពូលមួយនេះ ក្នុងនាមជាកីឡាករចេញពីលីគកំពូលកម្ពុជា ប៉ុន្តែនៅក្នុងចំណោមអ្នកទាំងនេះ គឺមានតែកីឡាករខ្មែរ-បារាំង ធារី ចន្ថាប៊ីន ម្នាក់ទេ ដែលទទួលបានជោគជ័យជាងគេ សម្រាប់ការទៅលើ នៅលីគកំពូលម៉ាឡេស៊ី នៅមុនពេលរូបគេ ត្រឡប់មកលេងនៅលីគកំពូលវិញ ក្នុងនាមជាកីឡាកររបស់ក្លិបវិសាខា កាលពីឆ្នាំ២០២១។
កុក បូរីស បានចារប្រវត្តិសាស្រ្តខ្លួនឯងថា ជាកីឡាករដ៏ជោគជ័យម្នាក់ សម្រាប់ការលេងឱ្យក្រុមភ្នំពេញក្រោន ក្នុងរយៈពេល៧ឆ្នាំនេះ ព្រោះរូបគេ បានរួមចំណែកឱ្យក្រុមសិង្ហក្រហម ឈ្នះបានតំណែងជើងឯកលីគកំពូលកម្ពុជា ចំនួន៣សម័យកាល កាលពីឆ្នាំ២០១៤ ឆ្នាំ២០១៥ និងឆ្នាំ២០២១។
យ៉ាងណាមិញ សម្រាប់ក្រុមថ្មី Sarawak United FC របស់ កុក បូរីស គឺជាក្រុមដែលទើបទទួលបានកៅអីមកលេងនៅក្របខណ្ខ Malaysia Super League នារដូវកាល ឆ្នាំ២០២២នេះ បន្ទាប់ពីក្រុមមួយនេះ ទទួលបានតំណែងជើងឯករង ក្នុងការប្រកួតក្របខ័ណ្ឌទី២ Malaysia Premier League កាលពីឆ្នាំ២០២១ ដោយពួកគេ បានឈ្នះ១១ប្រកួត ស្មើ៥ ចាញ់៤ មាន៣៨ពិន្ទុ តិចជាងក្រុមលេខ១ Negeri Sembilan ដែលមាន៤១ពិន្ទុ៕