កីឡាករ​មាន​រហ័សនាម «គីងកុង» អេលីត ចំរើន បាន​បង្ហាញការ​សោក​ស្តាយ ចំពោះការ​វិលមកកាន់សង្វៀនជា​ថ្មី កាលពី​ថ្ងៃអាទិត្យ ខណៈ​រូបគេ បានសម្រេច​បោះបង់ចោលការ​ប្រកួត​ផ្តាច់ព្រ័ត្រ ទាំងសោក​ស្តាយ ត្រឹមទឹកទី​២ ដែល​ធ្វើ​ឱ្យ ឡុង ជិន អាច​ទទួលបាន​ប្រាក់​លាន ដោយមិនសូវ​ឈឺ​សាច់។

តាម​រយៈ​ការ​ប្រកួតដណ្តើមប្រាក់លាន នៅលើ​សង្វៀន​ថោន កាលពី​ម្សិល​មិញ​នេះ អេលីត សាន់ បានធ្វើការ​ប្រកួតជាមួយ​ ឯម សុធី យ៉ាងស្វិតស្វាញបំផុត ហើយគូ​ជម្រុះ​៣​ទឹក​នេះ ទទួល​បានការ​គាំទ្រ​យ៉ាង​ខ្លាំងបំផុត ព្រោះពួកគេ​បានវាយ​ប្តូរ​ពេញ​៣​ទឹក នៅមុន​ពេល អេលីត សាន់ ត្រូវបានប្រកាស​ឱ្យ​ឈ្នះមនុស្ស​យន្ត ឯម សុធី ដោយពិន្ទុមិនឯកច្ឆន្ទ ៤-១។

យ៉ាងណា​ក៏ដោយ សម្រាប់​ការ​ឡើងជួប ឡុង ជិន នៅវគ្គ​ផ្តាច់ព្រ័ត្រ អេលីត សាន់ ប្រកួត​បានត្រឹម​១​ទឹកទេ ដោយ​រូបគេ មិនបានឡើង​ប្រកួត​បន្ត នៅ​ទឹកទី​២​ឡើយ ហើយបើតាមពិធីករ បានឱ្យដឹង​ថា នៅក្នុងពេលសម្រាក​ ក្រោយទឹកទី​១ បានបញ្ចប់​នោះ អេលីត សាន់ មានអាការៈ​វិល​មុខ ទើប​សម្រេច​ចិត្ត​បោះបង់ការ​ប្រកួត​តែម្តង។

សម្រាប់ការ​ទទួលបានត្រឹម​ជើងឯក​រង ជាមួយប្រាក់រង្វាន់ត្រឹម​១,៨​លាន​រៀល​នេះ អ្នក​ប្រយុទ្ធ អេលីត សាន់ មានការ​សោកស្តាយខ្លាំង ដោយ​រូបគេ​បាន​អះអាង​ថា ការ​ចាញ់នេះ ព្រោះគេ​ទើប វិល​មក​ហ្វឹកហាត់ បាន​រយៈ​ពេលខ្លី ហើយការ​ឡើងមកប្រកួតនេះ ក៏ជំនួស​គេ​ផងដែរ។

អេលីត សាន់ បាន​និយាយ​ក្រោយការ​ប្រកួត​ថា៖​ «សម្រាប់ការ​ជួប ឡុង ជិន បើខ្ញុំ​ត្រៀមខ្លួនបាន​ដិតដល់ គឺ​ខ្ញុំសង្ឃឹមបាន​ប្រាក់លាន​ច្រើន ប៉ុន្តែ​សម្រាប់វិលកាន់​សង្វៀន​​វិញនេះ  ខ្ញុំ​ត្រៀម​​ខ្លួនបានរយៈពេលខ្លីមែនទែន អ៊ីចឹង​ខ្ញុំមានការ​សោក​ស្តាយ គឺ​ស្តាយប្រាក់លាន ដែល​ត្រូវ​​បាត់​​​បង់​ក្នុង​រយៈ​ពេលមួយ​ភ្លែត»។

ជាមួយគ្នា​នេះ ឡុង ជិន ក៏ទទួលស្គាល់​ដែរ​ថា ការ​ឈ្នះបានប្រាក់​លានលេខ​១ ចំនួន ៣,៤​លាន​រៀល​លើកនេះ គឺ​រូបគេ​ពិតជា​ទទួលបានភាព​អំណោយផល នៅពេល អេលីត សាន់ បាន​ប្រកួតជាមួយ ឯម សុធី ឡើង​អស់ពីខ្លួន និងឈឺ​ខ្លួន​រួចទៅ​ហើយ​នោះ ចំណែក ឡុង ជិន ផ្ទាល់ បាន​យក​ឈ្នះ កំពែង​ខ្មៅ ដោយពិន្ទុ ខណៈ កំពែង ខ្មៅ និង អេលីត សាន់ ត្រូវតែ​ត្រូវ​ដាក់​ឱ្យ​ប្រកួតជំនួស វៀត ប៊ុនឌឿន និង ធន់ អៀនឡៃ ភ្លាមៗ​ដូចគ្នា។

ឡុង ជិន បាននិយាយ​ថា៖​ «​ការ​ហ្វឹកហាត់​របស់ខ្ញុំ គឺ​ត្រៀមសម្រាប់បេក្ខភាព ៤នាក់ដំបូង ប៉ុន្តែ​​ដល់ពេលមានការ​ផ្លាស់ប្តូរ​បែបនេះ ធ្វើ​ឱ្យមានការ​ព្រួយបារម្ភ​ដែរ គឺ​ខ្ញុំព្រួយ​បារម្ភ​ទៅលើ អេលីត សាន់ និង ឯម សុធី។ តែទោះបីជា​យ៉ាងណា នៅពេលឃើញពួកគាត់​ប្រកួតគ្នា នៅជុំ​ទី​១ ដោយ​វ៉ៃគ្នា​ឡើងអស់ពីខ្លួនរៀងៗ​ខ្លួន​បែបនេះ វាបាន​ផ្តល់​ភាពអំណោយផលដល់​យើង ព្រោះពួក​គាត់​ឈឺ​ខ្លួន​អស់ទៅ​ហើយ»៕