ខ្សែប្រយុទ្ធចំណូលថ្មីជនជាតិអាហ្គានីស្ថាន Fareed Sadat ពិតជាបានបង្ហាញពីភាពមុតស្រួច ខណៈរូបគេរកបាន២គ្រាប់តែម្នាក់ឯង ជួយឱ្យក្រុមភ្នំពេញក្រោន យកឈ្នះក្រុមវិសាខា ២-១ ដើម្បីលើកពានការប្រកួតបើករដូវកាល Cambodian Super Cup 2022 កាលពីថ្ងៃអង្គារ។
ជាមួយការប្រកួតនៅកីឡដ្ឋានស្តាតចាស់ ដែលមានបំពាក់ភ្លើង ឡើងខៀវខ្ចី ជិតដូចភ្លើងកន្លែងផឹកស៊ីនោះ ក្រុមម្ចាស់ជើងឯកលីគកំពូលកម្ពុជា ភ្នំពេញក្រោន និងក្រុមជើងឯកពានរង្វាន់សម្តេច ហ៊ុន សែន វិសាខា បានប្រកួតគ្នាយ៉ាងស្វិតស្វាញបំផុត ដោយក្រុមទាំង២ សុទ្ធតែបានបង្កើតឱកាសរៀងៗខ្លួន។
តែទោះបីជាយ៉ាងណា ក្រុមសិង្ហក្រហម ទទួលបានភាពរីករាយខ្លាំងជាង បន្ទាប់ពី ខ្សែប្រយុទ្ធ Fareed Sadat អាចស៊ុតទម្លុះសំណាញ់ទី ចំនួន២គ្រាប់ជាប់ៗគ្នា នៅនាទីទី១៥ និងទៅទី៣៧ នោះ ហើយនេះក៏ជាគ្រាប់បាល់ជ័យជម្នះសម្រាប់ក្រុមភ្នំពេញក្រោន ផងដែរ ខណៈ វិសាខា រកបានត្រឹម១គ្រាប់វិញ ដែលជាការតែតបាល់បញ្ចូលទីរបស់ កែវ សុខផេង នៅនាទីទី៥០ នោះ។
តាមការរកបាន២គ្រាប់ សម្រាប់ការបង្ហាញខ្លួនជាលើកដំបូងនេះ បានបង្ហាញឱ្យឃើញថា Fareed Sadat ពិតជាមានសមត្ថភាពខ្ពស់ ក្នុងការបញ្ចប់ទី ហើយក៏មានភាពវៃឆ្លាត ក្នុងការលេងផងដែរ។ ជាមួយគ្នានេះ Fareed Sadat ក៏ទទួលបានពានជាកីឡាករលេងបានល្អជាងគេ ប្រចាំការប្រកួតផងដែរ ខណៈការមកចូលរួមជាមួយក្រុមភ្នំពេញក្រោន នេះ Fareed ធ្លាប់បានអះអាងថា គេបានមកទីនេះ ដើម្បីជួយក្រុមភ្នំពេញក្រោន ឱ្យទទួលគោលដៅថ្មី បន្ថែមទៀត ជាពិសេស គឺការប្រកួតពានរង្វាន់ AFC CUP។
តាមរយៈការឈ្នះពានបើករដូវកាល ដែលរៀបចំឡើងដោយសហព័ន្ធកីឡាបាល់ទាត់កម្ពុជា និងក្រុមហ៊ុនលីគបាល់ទាត់កម្ពុជា នេះ បានបញ្ជាក់ថា ភ្នំពេញក្រោន បានក្លាយជាក្រុម ដែលទទួលបានភាពជោគជ័យខ្លាំងជាងគេ ក្នុងការប្រមាញ់យកពានរង្វាន់ត្រៀមបើករដូវកាលថ្មី ព្រោះនេះជាពានទី២ហើយ ដែលពួកគេដណ្តើមបាន ខណៈពានបើករដូវកាលទី១ ពួកគេ បានឈ្នះនៅកីឡដ្ឋានព្រីនស៍ របស់វិសាខា ផ្ទាល់តែម្តង បន្ទាប់ពីពួកគេ បានឈ្នះក្រុមកងយោធពលខេមរភូមិន្ទ (ទ័ព) នៅវគ្គផ្តាច់ព្រ័ត្រ។
យ៉ាងណាក៏ដោយ បន្ទាប់ពីការបង្ហាញភាពសប្បាយរីករាយ នៅក្នុងការលើកពាន អមជាមួយប្រាក់រង្វាន់ចំនួន២០លានរៀលនេះ ក្រុមភ្នំពេញក្រោន ក៏បានបង្ហាញអាវយឺត និងទង់ជាតិរបស់ប្រទេសអ៊ុយក្រែន ដើម្បីបញ្ជាក់ពីសោដនាតកម្មនៃការផ្ទះសង្រ្គាមនៅប្រទេសអ៊ុយក្រែន ផងដែរ ខណៈគ្រូបង្គោលលោក Oleg Starynskyi គ្រូជំនួយលោក Anatolii និងខ្សែការពារ Valerii Grishiin សុទ្ធតែជាជនជាតិអ៊ុយក្រែន៕
