សមាគមកីឡាបាល់ទាត់កងយោធពលខេមរភូមិន្ទ TIFFY ARMY FC (ទ័ព) កាលពីថ្ងៃពុធ បានធ្វើការប្រកាសសុំទោសជាសាធារណៈ ជុំវិញបញ្ហាបច្ចេកទេសភ្លើងបំភ្លឺទីលាន នៅកីឡដ្ឋានស្តាតចាស់ ក្នុងការប្រកួតពានរង្វាន់ Cambodian Super Cup 2020 កាលពីថ្ងៃចន្ទ។
នៅក្នុងការប្រកួតដណ្តើមពានត្រៀមបើករដូវកាលថ្មី រវាងក្រុមម្ចាស់ជើងឯកលីគកំពូលកម្ពុជា ភ្នំពេញក្រោន និងក្រុមជើងឯកពានរង្វាន់សម្តេច ហ៊ុន សែន វិសាខា កាលពីយប់ថ្ងៃចន្ទនោះ គឺភ្លើងបំភ្លឺ នៅលើទីលាន មានពណ៌ខៀវខ្ចីខ្លាំង ដែលបានប៉ះពាល់ខ្លាំងទៅលើការផ្សាយផ្ទាល់របស់ទូរទស្សន៍ប៉ុស្តិ៍លេខ៥ និងក្រុមអ្នកសារព័ត៌មាន ដែលបានចូលទៅផ្តិតយករូបភាពនៃការប្រកួតនោះ។
ជាមួយបញ្ហាចោទ ដែលកើតមានឡើងដោយការដាក់ពណ៌ភ្លើងខុសបច្ចេកទេសនេះ គឺក្រុមផ្សាយផ្ទាល់របស់ទូរទស្សន៍ប៉ុស្តិ៍លេខ៥ បានទទួលរងគ្រោះខ្លាំងជាងគេ ព្រោះអ្នកទស្សនាភាគច្រើន ដែលមិនបានដឹងច្បាស់ពីបញ្ហានេះ បាននាំរិះគន់ទៅលើការផ្សាយផ្ទាល់របស់ប៉ុស្តិ៍លេខ៥ ថាគ្មានគុណភាព រូបភាពមើលមិនច្បាស់ ហើយអ្នកខ្លះ ក៏បានសុំឱ្យសហព័ន្ធកីឡាបាល់ទាត់កម្ពុជា សម្រេចពិចារណាឡើងវិញ ចំពោះការយកទូរទស្សន៍នេះ មកផ្សាយផ្ទាល់ ក្នុងការប្រកួតលីគកំពូលកម្ពុជា ផងដែរ។
ជាមួយគ្នានេះ សម្រាប់ក្រុមអ្នកសារព័ត៌មាន ដែលបានចូលថតរូបផ្ទាល់ នៅក្នុងព្រឹត្តិការណ៍នោះ បានសម្តែងការហួសចិត្ត ទៅនឹងការបំពាក់អំពូលភ្លើង នៅកីឡដ្ឋានស្តាតចាស់នេះថា វាជិតដូចភ្លើងនៅក្នុងក្លិបរាំកម្សាន្តទៅហើយ ដែលមិនអាចថតរូបបានច្បាស់ល្អនោះទេ។
អ្នកថតរូបជើងចាស់ លោក កឹម សុវណ្ណា បានប្រដូចការបំពាក់ភ្លើង នៅកីឡដ្ឋានចាស់ ថា ជាភ្លើងនៅឋានព្រឥន្ទ ដោយលោកបានសរសេរ នៅលើហ្វេសប៊ុកថា៖«សុំអត់យល់ភ្លើងកីឡដ្ឋានស្តាតចាស់ (ភ្លើងឋានព្រះឥន្ទ)»។ ចំណែកអ្នកថតរូបផ្សេងទៀត សុទ្ធតែបានរិះគន់ទៅនលើការបំពាក់ភ្លើងនេះដូចគ្នា។
ជាមួយនឹងកំហុសឆ្គងនេះ ទ័ព បានប្រកាសសុំទោសជាសាធារណៈថា៖ «សមាគមកីឡាបាល់ទាត់កងយោធពលខេមរភូមិន្ទ TIFFY ARMY FC សូមធ្វើការអភ័យទោស ចំពោះបញ្ហាបច្ចេកទេសភ្លើងបំភ្លឺទីលាន ដោយមានសភាពពន្លឺពណ៌ខៀវខ្ចីខ្លាំង ដែលជាផលប៉ះពាល់ដល់ការផ្សាយផ្ទាល់របស់ស្ថានីយ៍ទូរទស្សន៍កងយោធពលខេមរភូមិន្ទប៉ុស្ត៍លេខ៥ ក៏ដូចជាបងប្អូនអ្នកថតរូបមកពីស្ថាប័ន អង្គភាពផ្សេងៗ ក្នុងការប្រកួតពានរង្វាន់ CAMBODIAN SUPER CUP 2022 កាលពីរាត្រីថ្ងៃទី០១ ខែមីនា ឆ្នាំ២០២២ ដែលជាហេតុធ្វើឱ្យគុណភាព រូបភាពមានការធ្លាក់ចុះយ៉ាងខ្លាំង»។
«ក្រុមការងារបច្ចេកទេសរបស់កីឡដ្ឋាន TIFFY ARMY STADIUM បាននឹងកំពុងតែព្យាយាមធ្វើការជួសជុលកែតម្រូវផ្លាស់ប្ដូរអំពូលភ្លើងថ្មី មានកម្រិតពន្លឺភ្លឺច្បាស់ល្អ ដើម្បីឱ្យទាន់កម្មវិធីប្រកួតពានរង្វាន់ CAMBODIAN PREMIER LEAGUE នៅសប្តាហ៍បន្តបន្ទាប់ទៀត។ សូមអរគុណ»។ ទ័ព បានបញ្ជាក់បន្ថែម នៅក្នុងសេចក្តីប្រកាសរបស់ខ្លួន៕