បរទេស៖ ក្រុម Nantes បានយកឈ្នះលើក្រុម Monaco ដោយការស៊ុតបាល់ប៉េណាល់ទីកាត់សេចក្តី ក្រោយពីបានបញ្ចប់ក្នុងលទ្ធផលស្មើ ២-២ កាលពីថ្ងៃពុធ ដើម្បីឈានទៅប្រកួតដណ្តើមពាន French Cup វគ្គផ្តាច់ព្រ័ត្រជាលើកដំបូង បើគិតចាប់តាំងាពីឆ្នាំ២០០០ និងដើម្បីបន្តការស្រោចស្រង់របស់ពួកគេនៅរដូវកាលនេះ។
ក្រោយពីក្រុមម្ចាស់ផ្ទះបានយកឈ្នះដោយការស៊ុតបាល់ប៉េណាល់ទី ៤-២ ដើម្បីឈានទៅប្រកួតជាមួយនឹងក្រុម Nice អ្នកគាំទ្រជាច្រើននាក់ បានរត់ចូលទីលានប្រកួត ដើម្បីអបអរ។ បើទោះបីក្រុមសន្តិសុខ បានរៀបចំកន្លែងមួយនៅកណ្តាលទីលានសម្រាប់ឲ្យកីឡាករអបអរក៏ដោយ ប៉ុន្តែ អ្នកគាំទ្ររបស់ពួកគេ បាននាំគ្នាច្រៀងថា «យើងឈានទៅវគ្គផ្តាច់ព្រ័ត្រហើយ»។
Nantes ទើបតែបានគេចផុតពីការកាត់ចេញកាលពីរដូវកាលមុន តាមរយៈការដណ្តើមបានជ័យជម្នះក្នុងវគ្គ Playoff ហើយនៅរដូវកាលនេះ ពួកគេកំពុងតែស្ថិតក្នុងចំណាត់ថ្នាក់លេខ៧៕
ប្រភពព័ត៌មាន៖ Channel News Asia
