យ៉ាងហោចណាស់មនុស្សចំនួន២៦នាក់ បានរងរបួស ក្រោយពីអំពើហិង្សា បានផ្ទុះឡើងរវាងអ្នកគាំទ្រជាគូបដិបក្ខ ក្នុងការប្រកួតកីឡាបាល់ទាត់មួយរបស់ម៉ិកស៊ិក។
នេះបើយោងទៅតាមការបញ្ជាក់របស់ក្រុមអាជ្ញាធរ កាលពីថ្ងៃអាទិត្យ។ ការវាយតប់គ្នា បានកើតឡើង ក្រោយពីការប្រកួតរវាងក្រុម Queretaro និង Atlas បានដំណើរការបាន១ម៉ោង នាកីឡដ្ឋាន Corregidora ក្នុងទីក្រុង Queretaro។ បើទោះបីអ្នកគាំទ្រក្រុមម្ចាស់ផ្ទះ ក្នុងនោះរាប់បញ្ចូលទាំងសមាជិកគ្រួសារ និងកុមារៗដែរនោះ បានព្យាយាមរត់គេចចេញក៏ដោយ ប៉ុន្តែ ការប៉ះទង្គិចគ្នា បានឆ្លងទៅដល់ទីលានប្រកួត ដែលនាំឲ្យកីឡាករត្រូវរត់ចេញទៅកាន់កន្លែងមានសុវត្ថិភាព។
ក្នុងចំណោមមនុស្សចំនួន២៦នាក់ ដែលត្រូវបានបញ្ជូនទៅកាន់មន្ទីរពេទ្យ ៣នាក់ ត្រូវបានអនុញ្ញាតឲ្យចេញពីមន្ទីរពេទ្យ ប៉ុន្តែ «៣នាក់ផ្សេងទៀត ស្ថិតក្នុងសភាពធ្ងន់ធ្ងរ ១០នាក់ស្ថិតក្នុងកម្រិតមធ្យម ហើយ១០នាក់ផ្សេងទៀត ស្ថិតក្នុងកម្រិតស្រាល»។ នេះបើយោងទៅតាមការបញ្ជាក់របស់លោក Mauricio Kuri អភិបាលក្រុង Queretaro កាលពីថ្ងៃអាទិត្យ។ លោក Kuri បានបញ្ជាក់ថា៖ «បើទោះបីគ្មានករណីស្លាប់ក៏ដោយ ប៉ុន្តែ យើងមិនអាចនិយាយថា នេះមិនមែនជាសោកនាដកម្មឡើយ»។ អង្គភាពគ្រប់គ្រងកីឡាបាល់ទាត់ពិភពលោកហៅកាត់ថា FIFA បានចាត់ទុកថា នេះជាអំពើហិង្សាដែលមិនអាចទទួលយក និងគ្មានការអត់ឱនឡើយ៕
ប្រភពព័ត៌មាន៖ Channel News Asia