នៅទីបំផុតក្រុមនារីភ្នំពេញក្រោន បានឈានដល់គោលដៅ ដែលពួកគេ បានកំណត់ហើយ គឺការបន្តយកឈ្នះលើក្រុមណាហ្គាវើលដ៍កំពង់ស្ពឺ ២-១ ដើម្បីក្លាយជាម្ចាស់ជើងឯក ការប្រកួតជម្រើសជើងឯកបាល់ទាត់នារី ឆ្នាំ២០២១ ជាលើកដំបូង បន្ទាប់ពីបានត្រឹមលេខ៣ កាលពីឆ្នាំ២០២០។
បើទោះបីជាការប្រកួតជម្រើសជើងឯកបាល់ទាត់នារី ឆ្នាំ២០២១នេះ នៅសល់ការប្រកួតវិលជុំរហូតដល់៤សប្តាហ៍ទៀត ប៉ុន្តែតាមរយៈការបន្តយកឈ្នះក្រុមណាហ្គាវើលដ៍កំពង់ស្ពឺ ២-១ កាលពីថ្ងៃអាទិត្យ ម្សិលមិញ វាបានជួយឱ្យក្រុមនារី ភ្នំពេញក្រោន ឈ្នះបានពាននេះ ដោយស្វ័យប្រវត្តិរួចទៅហើយ។
ប្រធានក្រុមភ្នំពេញក្រោន បាន ជាវៃ បាននិយាយ ក្រោយការប្រកួតថា៖ «នេះជាការលើកពានរបស់ក្រុមនារីភ្នំពេញក្រោន ហើយនេះក៏ជាលើកទី១ផងដែរ ដែលពួកយើង បានឈ្នះពាន។ អ្វីដែលសំខាន់ ខ្ញុំរីករាយសប្បាយចិត្តមែនទែន ដោយសារតែគ្នារបស់ពួកខ្ញុំ ធ្វើបានល្អណាស់ ដោយយើងបានឈ្នះគ្រប់ការប្រកួត មិនបានចាញ់សូម្បី១ប្រកួត ហើយពួកយើងនឹងខំប្រឹងបន្តទៀត សម្រាប់ការប្រកួតលីគនារី ក្រោយៗទៀត»។
តាមរយៈការយកឈ្នះក្រុមណាហ្គាវើលដ៍ ២-១ ដែលរកបានដោយខ្សែប្រយុទ្ធ ពឿន គន្ធា នៅនាទីទី៦ និងទី៤៥ លើកនេះ បានបង្ហាញថា ក្រុមភ្នំពេញក្រោន បានឈ្នះទាំង១១ប្រកួត មាន៣៣ពិន្ទុពេញ ដាច់ពីក្រុមម្ចាស់ជើងឯក ណាហ្គាវើលដ៍ ដែលមានត្រឹម២១ពិន្ទុដដែល។
ចំណែកក្រុមនារីសៀមរាប បានត្រឹមស្មើ ១-១ ជាមួយក្រុមបឹងកេត ហើយការដណ្តើមបាន១ពិន្ទុនេះ បានជួយឱ្យពួកគេ ឡើងទៅឈរនៅលេខ២ ជាបណ្តោះអាសន្ន លើក្រុមណាហ្គាវើលដ៍ វិញម្តង ដោយមាន២២ពិន្ទុ។ រីឯក្រុមព្រះខ័នរាជស្វាយរៀង បានលត់ក្រុមខេត្តកណ្តាល ១៣-០ ហើយក្រុមនារីខេត្តកំពង់ឆ្នាំង បានយកឈ្នះក្រុមនារីខេត្តបាត់ដំបង ៤-១ សម្រាប់ការប្រកួតប្រចាំសប្តាហ៍ទី១១នេះ៕
