ក្រុមមានមូលដ្ឋាននៅទីរួមខេត្តតាកែវ គិរីវង់សុខសែនជ័យ នឹងប្រើប្រាស់រចនាសម្ព័ន្ធដឹកនាំថ្មី ពីសំណាក់គ្រូបង្គោលជនជាតិអេស្ប៉ាញ លោក Manuel Retamero ដើម្បីប្រកួតបើកឆាកលីគកំពូលឆ្នាំ២០២២ ជាមួយក្រុមធ្លាប់គ្រងតំណែងជើងឯក ព្រះខ័នរាជស្វាយរៀង នៅកីឡដ្ឋានខេត្តស្វាយរៀង នាល្ងាចម៉ោង ៦:៣០ ថ្ងៃអង្គារនេះ។
តាមពិតជំនួបរវាងក្រុមម្ចាស់ផ្ទះ ស្វាយរៀង និងគិរីវង់ ត្រូវធ្វើតាំងពីថ្ងៃសៅរ៍ ប៉ុន្តែត្រូវបានពន្យាពេល មកធ្វើនោះថ្ងៃនេះ ខណៈក្រុមចំនួន៦ទៀត បានបញ្ចប់ការប្រកួតបើកឆាករបស់ខ្លួនរួចហើយ ហើយជាលទ្ធផលក្រុមវិសាខា បានយកឈ្នះក្រុមម្ចាស់ផ្ទះ អង្គរថាយហ្គឺរ ៣-១ ដូចគ្នាទៅនឹងក្រុមម្ចាស់ផ្ទះបឹងកេត ដែលបានយកឈ្នះក្រុមណាហ្គាវើលដ៍ ៣-១ ដែរ ប៉ុន្តែក្រុមការពារតំណែងជើងឯក ភ្នំពេញក្រោន បានត្រឹមស្មើ ០-០ ជាមួយក្រុមកងយោធពលខេមរភូមិន្ទ(ទ័ព)។
សម្រាប់ការជួបគ្នា២លើក កាលពីឆ្នាំ២០២១ ក្រុមគិរីវង់ បានចាញ់ក្រុមស្វាយរៀង ទាំង២លើក ប៉ុន្តែការជួបគ្នាលើកនេះ ត្រូវបានគេគិតថា អាចនឹងមានអ្វីប្លែកជាងមុន ព្រោះគិរីវង់ មិនត្រឹមតែធ្វើការផ្លាស់ប្តូរកីឡាករក្នុងស្រុកភាគច្រើនប៉ុណ្ណោះទេ ប៉ុន្តែក្រុមនេះ ក៏បាននាំយកគ្រូបង្គោលអេស្ប៉ាញ លោក Manuel Retamero មកនាំក្រុមនេះ ជំនួសការចាកចេញរបស់គ្រូបង្គោលជនជាតិថៃ Ekapob Putisai ផងដែរ។
នៅក្នុងបទសម្ភាសជាមួយក្លិបផ្ទាល់ គ្រូបង្វឹកកាន់សញ្ញាបត្រកម្រិត UEFA Pro License លោក Manuel Retamero បានអះអាងថា លោកនឹងប្រើប្រាស់បទពិសោធ ក្នុងនាមជាគ្រូបង្វឹកចូល១៨ឆ្នាំ នៅតាមបណ្តាប្រទេសនានា កន្លងមកនេះ ដើម្បីមកជួយអភិវឌ្ឍក្រុមគិរីវង់ ហើយលោកបានបញ្ជាក់ថា លោកបានចាត់ទុក ក្រុមគិរីវង់ ជាបេះដូងរបស់លោក ព្រោះគ្រប់គ្នា នៅក្នុងក្លិបនេះ បានចាត់ទុកលោកដូចជាស្តេច និងតែងតែខ្វល់ពីរូបលោក។
លោក Manuel Retamero បាននិយាយថា៖ «ខ្ញុំបានត្រៀមខ្លួនរួចជាស្រេច ក្នុងការខិតខំប្រឹងប្រែង និងកែលំអអ្វីគ្រប់យ៉ាង ដើម្បីផ្តល់ទៅឱ្យក្លិបរបស់ខ្ញុំ ព្រោះក្លិបនេះជាបេះដូចរបស់ខ្ញុំ ជាមួយនឹងក្រុមការងារ និងកីឡាកររបស់ខ្ញុំ ហើយអ្វីដែលសំខាន់នោះ គឺត្រូវតែជាដុំថ្មដ៏រឹងមាំមួយ ដើម្បីជួយជ្រោមជ្រែងក្លិប ឱ្យក្លាយទៅជាគ្រួសារតែមួយ។ ជាការពិតណាស់ យើងនឹងមានភាពរីកចម្រើន ហើយពួកយើងនៅទីនេះ ស្ថិតនៅក្នុងគោលដៅរួមដូចគ្នា»។
យ៉ាងណាក៏ដោយ គេនៅមិនទាន់ប្រាកដថា ក្រុមគិរីវង់ នឹងអាចកែប្រែស្ថានភាពប្រកួតបានល្អកម្រិតណា ដើម្បីទប់ទល់ជាមួយក្រុមស្វាយរៀង នោះទេ ព្រោះគ្រូបង្គោលជនជាតិអៀរឡង់ លោក Conor Nestor បានអះអាងថា ក្រុមស្វាយរៀង មានការហ្វឹកហាត់ខ្លាំងណាស់ ដើម្បីស្វែងរកលទ្ធផលដ៏ល្អមួយ នៅក្នុងការប្រកួតលីគកំពូលកម្ពុជា នារដូវកាល ឆ្នាំ២០២២នេះ។
ជាមួយគ្នានេះ ធនធានកីឡាករបរទេសរបស់ក្រុមស្វាយរៀង រួមមានខ្សែប្រយុទ្ធកាមេរូន Emmauel Mbarga ខ្សែប្រយុទ្ធកាណាដា Marcus Baber កីឡាករជប៉ុន Takashi Odawara និង Hikaru Mizuno រួមទាំងកីឡាករចំណូលថ្មីរបស់អៀរឡង់ Clyde O’Connell អាចមានគុណភាពលេងបានល្អ និងស៊ីចង្វាក់គ្នាជាងកីឡាករបរទេសទាំង៥នាក់របស់ក្រុមគិរីវង់។
កីឡាករបរទេស៤នាក់របស់គិរីវង់ រួមមានខ្សែបម្រើប្រយុទ្ធសញ្ជាតិហ្គាណា Ghansah Robert ខ្សែបម្រើស្លាបកូនកាត់ហ្វីលីពីន-ម៉ាឡេស៊ី OJ Porteria ខ្សែការពារអ៊ូសបេគីស្ថាន Suhrob Rakhmonov ខ្សែបម្រើប្រយុទ្ធកូនកាត់ប្រេស៊ីល-ទីម័រ Thiago Fernandes Oliveira សុទ្ធតែជាកីឡាករចំណូលថ្មី គឺមានតែកីឡាករ David Julein William Koum ម្នាក់ទេ ដែលធ្លាប់លេងឱ្យគិរីវង់ កាលពីរដូវកាលមុន។ តែទោះបីជាយ៉ាងណា សម្រាប់ការប្រកួតដណ្តើមពានរដូវកាល នៅមុនការប្រកួតផ្លូវការនេះ ទាំងក្រុមស្វាយរៀង និងគិរីវង់ សុទ្ធតែបានចាញ់គូប្រកួត និងធ្លាក់ នៅក្នុងវគ្គជម្រុះដូចគ្នា៕