ក្រុមបាល់ទះនារីរបស់ខេត្តពោធិ៍សាត់ បានរកឃើញជ័យជម្នះដ៏សំខាន់មួយ ដើម្បីក្លាយជាម្ចាស់ជើងឯក ក្នុងព្រឹត្តិការណ៍ប្រកួតកីឡាបាល់ទះនារី ចំថ្ងៃពិសេសរបស់ខ្លួនតែម្តង គឺទិវាអន្តរជាតិ ៨ មីនា ឆ្នាំ២០២២ ដែលមនុស្សនៅទូទាំងពិភពលោក បានយកថ្ងៃនេះ ដើម្បីបញ្ជាក់ថា នារី មានសិទ្ធិស្មើបុរស និងអាចធ្វើអ្វីៗ បានដូចបុរសដូចគ្នា។
តាមរយៈការប្រកួត នៅលើទីលានបាល់ទះកីឡដ្ឋានព្រីនស៍ កាលពីថ្ងៃអង្គារ ម្សិលមិញ ក្រុមនារីខេត្តពោធិ៍សាត់ បានយកឈ្នះក្រុមខេត្តព្រៃវែង ៣សិតដាច់តែម្តង (៣-០) ដើម្បីឡើងទៅប្រកួតផ្តាច់ព្រ័ត្រជាមួយក្រុមខេត្តកំពង់ធំ ដែលបានយកឈ្នះក្រុមខេត្តកំពង់ចាម ដោយលទ្ធផល ៣-២ នៅក្នុងវគ្គជម្រុះនោះដូចគ្នា។
សម្រាប់ការប្រកួតផ្តាច់ព្រ័ត្ររវាងក្រុមខេត្តពោធិ៍សាត់ និងក្រុមកំពង់ធំ ពិតជាមានភាពស្វិតស្វាញខ្លាំង ដោយការប្រកួតនេះ បានឈានដល់សិតទី៥ ហើយជាលទ្ធផល ខេត្តពោធិ៍សាត់ បានយកឈ្នះក្រុមនារីខេត្តកំពង់ធំ ៣សិតទល់២ ដើម្បីក្លាយជាម្ចាស់ជើងឯក ចំណែកក្រុមខេត្តព្រៃវែង បានយកឈ្នះក្រុមខេត្តកំពង់ចាម ៣-២ ដែរ ដើម្បីទទួលបានចំណាត់ថ្នាក់លេខ៣។
ជាមួយការឈ្នះតំណែងជើងឯកនេះ ក្រុមខេត្តពោធិ៍សាត់ ទទួលបានប្រាក់រង្វាន់ចំនួន២លានរៀល រីឯក្រុមជើងឯករង ខេត្តកំពង់ធំ បាន១,២លានរៀល ក្រុមលេខ៣ ខេត្តព្រៃវែង បាន៨០ម៉ឺនរៀល ចំណែកក្រុមលេខ៤ ខេត្តកំពង់ចាម បានប្រាក់រង្វាន់ចំនួន៤០ម៉ឺនរៀល ហើយក្រុមនារីទាំងអស់នេះ ក៏ទទួលបានផ្កាម្នាក់១ទង ដែលផ្តល់ជូនដោយថ្នាក់ដឹកនាំ ដែលបានចូលរួម នៅក្នុងពិធីបិទ ការប្រកួតនោះ ផងដែរ។
នៅក្នុងពិធីបិទការប្រកួតនោះ ក៏មានការប្រគល់វិញ្ញាបនបត្រ ដល់អាជ្ញាកណ្តាល និងចៅក្រមបាល់ទះក្នុងសាលផងដែរ ដោយសហព័ន្ធ បានប្រកាសជារួមថា៖ «សហព័ន្ធកីឡាបាល់ទះកម្ពុជា បានរៀបចំការព្រឹត្តិការណ៍ប្រកួតកីឡាបាល់ទះនារី ដោយជោគជ័យដើម្បី អបអរសាទរ ខួប លើក ទី ១១១ «ទិវាអន្តរជាតិ ៨ មីនា ឆ្នាំ២០២២» និងប្រគល់វិញ្ញាបនបត្រដល់អាជ្ញា កណ្ដាល និងចៅក្រមបាល់ទះក្នុងសាល កម្រិតមូលដ្ឋាន (គ ឬ C) នៅថ្ងៃទី៨ ខែមីនា ឆ្នាំ២០២២ លើទីលានបាល់ទះកីឡដ្ឋានព្រីនស៍ ក្នុងរាជធានីភ្នំពេញ»៕