អតីតក្រុមធ្លាប់លេងនៅលីគកំពូលកម្ពុជា អគ្គិសនីកម្ពុជា និងនគរបាលជាតិ បាននឹងកំពុង បានបង្ហាញភាពខ្លាំង នៅក្នុងការប្រកួតជម្រើសជើងឯកលីគ២ ឆ្នាំ២០២២ ប៉ុន្តែក្រុមសូលទីឡូអង្គរ របស់អ្នកចាត់ការទូទៅក្រុមជម្រើសជាតិកម្ពុជា លោក Keisuke Honda នៅមិនទាន់រកឃើញការឈ្នះ នៅឡើយទេ។
តាមរយៈការប្រកួតប្រចាំសប្តាហ៍ទី២ កាលពីថ្ងៃអាទិត្យ ម្សិលមិញនេះ ក្រុមអគ្គិសនីកម្ពុជា បានបន្តយកឈ្នះលើក្រុមសៀមរាបអេហ្វស៊ី ១-០ ហើយការរកបានត្រឹម១គ្រាប់នេះ វាគ្រប់គ្រាន់ សម្រាប់ពួកគេ ក្នុងការហក់ពីលេខ២ ទៅឈរនៅកំពូលតារាង ជាបណ្តោះអាសន្ន ខណៈក្រុមធ្លាប់ឈរនៅលេខ១ កោះកុងអេហ្វស៊ី របស់លោក ហុក សុជីវ័ន បានត្រឹមស្មើ ១-១ ជាមួយក្រុមម្ចាស់ផ្ទះ ខេត្តបន្ទាយមានជ័យ នោះ។
ជាមួយគ្នានេះ ក្រុមនគរបាលជាតិ បានប្រៀបប្រាស់ការមនាប្រៀប ក្នុងនាមជាម្ចាស់ផ្ទះ ដើម្បីយកលើក្រុមគូសត្រូវ អាស៊ីអឺរ៉ុប រហូតដល់ ៤-១ ដើម្បីហក់ពីលេខ៥ ទៅឈរនៅលេខ២ ជាបណ្តោះអាសន្ន ដោយមាន៦ពិន្ទុពេញ ស្មើជាមួយក្រុមអគ្គិសនីកម្ពុជា និងក្រុម ISI ដង្កោសែនជ័យ ដែលបានយកឈ្នះក្រុមភ្ញៀវ សូលទីឡូអង្គរ ១-០ ដើម្បីឡើងមកឈរនៅលេខ៣។
ផ្ទុយពីនេះក្រុម ធ្លាប់ឈ្នះ៣ពិន្ទុ ក្នុងការប្រកួតបើកឆាក ណិចស្តិបអេហ្វស៊ី បានទៅចាញ់ក្រុមម្ចាស់ផ្ទះ ខេត្តត្បូងឃ្មុំ ២-១ ស្របពេលក្រុមម្ចាស់ផ្ទះ ខេត្តព្រៃវែង បានយកឈ្នះអតីតលេងនៅលីគកំពូលដូចគ្នា គឺសាលាបាល់ទាត់ជាតិ ២-១ ដើម្បីទទួលបាន៣ពិន្ទុ ជាលើកដំបូង ក្រោយចាញ់ក្រុម ISI ដង្កោសែនជ័យ ៤-៣ កាលប្រកួតបើកឆាក។
គួរបញ្ជាក់ថា សម្រាប់ការប្រកួតលីគ២ នារដូវកាលឆ្នាំ២០២២នេះ មាន១២ក្រុមចូលរួម ហើយក្រុមទាំងនេះ ត្រូវប្រកួតគ្នាចំនួន២ជុំ សរុបស្មើនឹង១៣២ប្រកួត រួចទើបបូកសរុបពិន្ទុជាងគេ ឡើងទៅលេង នៅលីគកំពូលកម្ពុជា ឆ្នាំ២០២៣៕
