អ្នកប្រដាល់ជាកូនពៅក្នុងត្រកូល «សូត្រ» គឺ សូត្រ សុឃីម បានធ្វើឱ្យអ្នកទស្សនា មានការភ្ញាក់ផ្អើលខ្លាំង តាមរយៈការប្រកួតយ៉ាងល្អរបស់គេ ដើម្បីក្លាយជាម្ចាស់ប្រាក់លាន នៅលើសង្វៀនថោន កាលពីថ្ងៃអាទិត្យ ម្សិលមិញ ដោយគ្មានការគ្រោងទុក។
កីឡាករវ័យក្មេង សូត្រ សុឃីម បានទទួលដំណឹងមុនការប្រកួតតែប៉ុន្មានថ្ងៃប៉ុណ្ណោះ សម្រាប់ការឡើងប្រកួតដណ្តើមប្រាក់លាន ជំនួសកីឡាករ ប៉ែកកាក់ ចៅចិត្រ កាលពីម្សិលមិញនេះ ប៉ុន្តែប្អូនប្រុសរបស់លោកមេទ័ព សូត្រ ប៊ុនធី រូបនេះ បានបង្ហាញបច្ចេកទេសប្រកួតយ៉ាងល្អ ដើម្បីយកឈ្នះលើ ធន់ វណ្ណា ដោយពិន្ទុដាច់ ៥-០ នៅក្នុងការប្រកួតជម្រុះ៣ទឹក ដើម្បីឡើងទៅ ជួប ឡុង អាឆើត នៅវគ្គផ្តាច់ព្រ័ត្រ ព្រោះ អាឆើត ក៏បានយកឈ្នះ ឆួន បួន ដោយពិន្ទុដាច់ ៥-០ ដូចគ្នា។
ទាក់ទងទៅនឹងការប្រកួតជម្រុះជាមួយ ធន់ វណ្ណា នេះ សូត្រ សុឃីម បាននិយាយ ក្រោយការប្រកួតថា៖ «ខ្ញុំមិនបានត្រៀមខ្លួននោះទេ សម្រាប់ការឡើងមកប្រកួតជំនួសគេលើកនេះ ហើយសម្រាប់ការប្រកួតជម្រុះជាមួយ ធន់ វណ្ណា មានការពិបាក ព្រោះគាត់វ៉ៃបុកពេក អ៊ីចឹងខ្ញុំបានផ្លាស់ប្តូរបច្ចេកទេស ដោយវ៉ៃដកៗ យកពិន្ទុ»។
យ៉ាងណាមិញ សម្រាប់ការប្រកួតផ្តាច់ព្រ័ត្រជាមួយ ឡុង អាឆើត កីឡាករ សូត្រ សុឃីម បែរជាពេញចិត្ត ទៅនឹងការប្តូរកណ្តាប់ដៃ ដោយការប្រកួតទាំង៣ទឹករបស់អ្នកទាំង២នេះ មានភាពជក់ចិត្តខ្លាំង ដោយក្នុងនោះ កណ្តាប់ដៃរបស់ សូត្រ សុឃីម វាយចំគោលដៅល្អជាង នៅទឹកទី១ តែនៅទឹកទី២ ឡុង អាឆើត មានប្រៀបវិញ តាមរយៈការបុកជង្គង់ និងទាត់ឱ្យ សុឃីម ដួល ពី២ទៅ៣លើក។ តែទោះបីជាយ៉ាងណា នៅទឹកទី៣ សូត្រ សុឃីម បានប្រើយុទ្ធវាយដកថយ ដោយការប្រើកណ្តាប់ដៃភាគច្រើន និងបានយកឈ្នះលើ ឡុង អាឆើត ដោយពិន្ទុមិនឯកច្ឆន្ទ ៣-២។
ចំពោះការប្រកួតផ្តាច់ព្រ័ត្រនេះ សូត្រ សុឃីម បានបញ្ជាក់ថា៖ «ការឡើងទៅជួប ឡុង អាឆើត នៅវគ្គផ្តាច់ព្រ័ត្រ មិនសូវជាពិបាកទេ ដោយសារគាត់ដូយដៃជាមួយខ្ញុំ ព្រោះខ្ញុំចូលចិត្តការវ៉ៃដៃនេះ។ តែទោះបីជាយ៉ាង ខ្ញុំចង់ភ្លាត់ នៅចុងទឹកទី២ ព្រោះជើងរបស់ខ្ញុំ ចង់មានបញ្ហាដែរ ដោយឈឺញូកៗ ពេលនគាត់ទាត់ត្រូវ ហើយពេលនោះ ខ្ញុំក៏មានការបារម្ភផងដែរ ប៉ុន្តែចូលទឹកទី៣ ខ្ញុំបានផ្លាស់ប្តូរបច្ចេកទេស វ៉ៃដកវិញ»។
យ៉ាងណាក៏ដោយ សម្រាប់ការឈ្នះប្រាក់លានចំនួន ៣,៤លានរបស់ សូត្រ សុឃីម បានធ្វើឱ្យអ្នកទស្សនាមួយចំនួន ជាពិសេសអ្នកគាំទ្ររបស់ ឡុង អាឆើត មិនសូវសប្បាយចិត្តនោះទេ ដោយពួកគេឃើញថា សូត្រ សុឃីម បានដួលច្រើន និងសមតែចាញ់ ប៉ុន្តែចំពោះសាមីខ្លួន ឡុង អាឆើត បានទទួលស្គាល់ថា ការចាញ់លើកនេះ ដោយសារតែគេមានការធ្វេសប្រហែស នៅទឹកទី៣ ដែលធ្វើឱ្យ សូត្រ សុឃីម វ៉ៃដៃចូលច្រើន៕
