ក្រុមចំណូលថ្មី ដែលប្រមូលផ្តុំដោយកីឡាករមានបទពិសោធ BEE FC មានការជឿជាក់ថា ពួកគេ អាចនឹងឆ្លងផុតវគ្គជម្រុះតាមពូល នៃការប្រកួតពានរង្វាន់បាល់ទាត់ក្នុងសាល ឆ្នាំ២០២១ ដែលបានលើកមកធ្វើ នៅឆ្នាំ២០២២ ហើយកំពុងដំណើរការ នៅមជ្ឈមណ្ឌលកីឡា ដឹប្លូស្ពតអារីណា។
ការបង្ហាញភាពជឿជាក់នេះ គឺបន្ទាប់ពីក្រុម BEE FC បានយកឈ្នះក្រុមការពារតំណែងជើងឯក មហាហង្ស ក្នុងលទ្ធផល ៥-១ តាមរយៈការបង្ហាញសមត្ថភាពលេងរួមគ្នា យ៉ាងល្អ នៅក្នុងការប្រកួតបើកឆាកប្រចាំពូលB ហើយក្រុមចំនួន១៨ទៀត ក៏បានបញ្ចប់ការប្រកួតលើកដំបូងរបស់ពួកគេ ដូចគ្នា កាលពីថ្ងៃសៅរ៍ និងថ្ងៃអាទិត្យ កន្លងមកនេះ។
លោក ស វឌ្ឍនៈ ជាអ្នកចាត់ការក្រុម BEE FC បាននិយាយថា៖ «គ្រប់ប្រព័ន្ធលេង ទាំងនៅតំបន់ការពារ និងប្រយុទ្ធ គ្រប់ប្រព័ន្ធលេង គឺយើងមានភាពច្បាស់លាស់ទាំងអស់។ ជាមួយគ្នានេះ ការស៊ុតបាល់បញ្ចូលទីរបស់ខ្សែប្រយុទ្ធ អ៊ឹង ស្លូត ពិតជាមានភាពអស្ចារ្យខ្លាំង ហើយតាមរយៈការយកឈ្នះ ក្រុមការពារតំណែងជើងឯក លើកនេះ យើងមានការជឿជាក់៨០ភាគរយថា យើងនឹងបានឡើង ទៅដល់វគ្គផ្តាច់ព្រ័ត្រ»។
បន្ទាប់ពីការដណ្តើមបាន៣ពិន្ទុ ពីក្រុមម្ចាស់ជើងឯក មហាហង្ស ដើម្បីឡើងទៅឈរនៅកំពូលតារាងប្រចាំពូលB ជាបណ្តោះអាសន្ននេះ ក្រុម BEE FC នៅសល់ការប្រកួត២ទៀត ជាមួយក្រុម Arigato United និងក្រុម Neak Asia ដោយការប្រកួតបើកឆាករវាងក្រុមទាំង២នេះ កាលពីថ្ងៃសៅរ៍ គឺក្រុម Neak Asia បានយកឈ្នះក្រុម ៤-៣។
ចំពោះការត្រៀមខ្លួន ដើម្បីប្រកួតជាមួយក្រុម Arigato United និងក្រុម Neak Asia នេះ លោក ស វឌ្ឍនៈ បានបញ្ជាក់ថា៖ «សម្រាប់ការប្រកួត២លើក ដែលនៅសល់ យើងមិនទាន់ច្បាស់ថា យើងនឹងអាចយកឈ្នះគេ ដោយងាយស្រួល ឬយ៉ាងណានោះទេ ប៉ុន្តែយើងនឹងខំប្រឹងឱ្យបានខ្លាំងជាងនេះថែមទៀត»។
សម្រាប់ការប្រកួតពានរង្វាន់បាល់ទាត់ក្នុងសាល ឆ្នាំ២០២១នេះ មានក្រុមចំនួន២០ក្រុម បានចូលរួម ដោយបានចែកការប្រកួតជា៥ពូល។ ពូលទាំង៥នេះ ត្រូវប្រកួតសន្សំពិន្ទុ ដើម្បីយកក្រុមលេខ១ តាមពូលទាំង៥ រួមទាំងក្រុមលេខ២ល្អចំនួន១ក្រុម សរុប៦ក្រុម ត្រូវឡើងទៅប្រកួតដំណាក់កាលទី២។
នៅក្រោយបញ្ចប់ការប្រកួតវិលជុំ ដំណាក់កាលទី២ហើយ គេយកក្រុមលេខ៣ និងលេខ៤ ទៅប្រកួតខ្វែង យកក្រុមឈ្នះ ឡើងទៅជួបក្រុមលេខ២ នៅវគ្គពាក់កណ្តាលផ្តាច់ព្រ័ត្រ ចំណែកក្រុមឈ្នះនៅវគ្គនេះ ត្រូវឡើងទៅប្រកួតផ្តាច់ព្រ័ត្រ ជាមួយក្រុមលេខ១ ដែលឈរចាំ ដណ្តើមយកពាន៕
