អតីតក្រុមធ្លាប់លេងនៅលីគកំពូលកម្ពុជា អគ្គិសនីកម្ពុជា បានអះអាងថា គោលដៅធំ សម្រាប់ការប្រកួតជម្រើសជើងឯកលីគ២ នារដូវកាល ឆ្នាំ២០២២នេះ គឺការប្រជែងឱ្យបានកៅអី ឡើងទៅកាន់ការប្រកួតលីគកំពូលកម្ពុជា ជាថ្មីវិញ នៅឆ្នាំ២០២៣ បើទោះបីជាពួកគេ នៅរក្សាគោលការណ៍ប្រើប្រាស់កីឡាករខ្មែរសុទ្ធក៏ដោយ។
«ក្រុមរបស់យើង នៅតែរក្សាគោលការណ៍ ប្រើប្រាស់កីឡាករក្នុងស្រុកសុទ្ធដដែល ព្រោះថ្នាក់ដឹកនាំរបស់យើង ចង់ផ្តល់ឱកាសឱ្យយុវជនខ្មែរ មានឱកាសលេងបានច្រើន និងអាច បានជាប់នៅក្នុងក្រុមជម្រើសជាតិ ហើយជាមួយគ្នានេះ ទិសដៅធំរបស់អគ្គិសនីកម្ពុជា គឺការប្រជែងយកកៅអី ដើម្បីបានឡើងទៅលេង នៅលីគកំពូលកម្ពុជាវិញ»។ នេះជាការលើកឡើងរបស់អតីតកីឡាករជម្រើសជាតិ ទុំ សារ៉ាយ ដែលកំពុងដឹកនាំក្រុមអគ្គិសនីកម្ពុជា ក្នុងនាមជាគ្រូបង្គោល។
តាមរយៈការប្រកួត២លើក កន្លងមកនេះ ក្រុមអគ្គិសនីកម្ពុជា បានយកឈ្នះក្រុមបន្ទាយមានជ័យអេហ្វស៊ី ៦-១ នាថ្ងៃបើកឆាក នៅលើទឹកដីខ្លួនឯង និងបានបន្តឈ្នះក្រុមម្ចាស់ផ្ទះសៀមរាបអេហ្វស៊ី ១-០ សម្រាប់ការប្រកួតលើកទី២ កាលពីថ្ងៃអាទិត្យ ដើម្បីឡើងទៅឈរនៅលើកំពូលតារាង ជាបណ្តោះអាសន្ន។
តែទោះបីជាយ៉ាងណា គ្រូបង្គោល ទុំ សារ៉ាយ បានអះអាងថា ជ័យជម្នះ២លើកកន្លងមកនេះ វាគ្រាន់តែជាការឈ្នះក្រុមនៅខេត្ត ដែលមិនទាន់អាចយកមកប្រៀបធៀបថា យើងមានកម្រិតនៅលើគេនោះទេ។ «ការយកយកឈ្នះ ក្រុមនៅខេត្តនេះ យើងនៅមិនទាន់អាចចាត់ទុកថា ក្រុមយើង មានភាពលេចធ្លោរនោះទេ គឺលុះត្រាតែយើងបានឈ្នះ ឬជួបក្រុមមានមូលដ្ឋាននៅភ្នំពេញ ជាពិសេសក្រុមធ្លាប់លេងនៅលីគកំពូលកម្ពុជា ជាមួយយើង កាលពីឆ្នាំ២០២១ ចំនួន២ទៅ៣ប្រកួតអ៊ីសិន ទើបយើងអាចវាយតម្លៃបាន»។
ជាមួយគ្នានេះ ទុំ សារ៉ាយ បានចាត់ទុកក្រុមនគរបាលជាតិ និងក្រុម ISI ដង្កោសែនជ័យ ជាឧបសគ្គធំ ចំពោះក្រុមអគ្គិសនីកម្ពុជា ក្នុងការប្រជែងកៅអី ឡើងទៅលេងនៅលីគកំពូលវិញ ចំណែកអតីតក្រុមធ្លាប់លេងនៅលីគកំពូលកម្ពុជា អាស៊ីអឺរ៉ុប និងក្រុមខេត្តព្រៃវែង ត្រូវបាន ទុំ សារ៉ាយ ពន្យល់ថា អាស៊ីអឺរ៉ុប ពេលនេះ មានកីឡាករក្មេងៗច្រើន ដែលការលេងនៅមានកម្រិត ចំណែកក្រុមខេត្តព្រៃវែង គឺកីឡាករល្អៗរបស់ក្រុមនេះ ក៏ត្រូវបានយកទៅលេងនៅក្លិបវិសាខា ផងដែរ អ៊ីចឹងវាមិនមែនជាឧបសគ្គធំនោះទេ។
គ្រូបង្វឹកក្រុមអគ្គិសនីកម្ពុជា ទុំ សារ៉ាយ បានបញ្ជាក់ថា៖ «ខ្ញុំមើលឃើញថា ក្រុម ISI ដង្កោសែនជ័យ និងក្រុមនគរបាលជាតិ មានទម្រង់លេងល្អ ដែលជាឧបសគ្គធំ សម្រាប់យើង ចំណែកក្រុមអាស៊ីអឺរ៉ុប និងក្រុមខេត្តព្រៃវែង រួមជាមួយក្រុមផ្សេងទៀត ខ្ញុំគិតថា មិនជាឧបសគ្គធំ សម្រាប់យើងនោះទេ គឺយើងអាចប្រកួតប្រជែងបាន»។
គួរបញ្ជាក់ថា សម្រាប់ការប្រកួតលីគ២ នារដូវកាលឆ្នាំ២០២២នេះ មាន១២ក្រុមចូលរួម ហើយក្រុមទាំងនេះ ត្រូវប្រកួតគ្នាចំនួន២ជុំ សរុបស្មើនឹង១៣២ប្រកួត ហើយក្រុមលេខ១ និងលេខ២ នឹងត្រូវឡើងទៅប្រកួតនៅលីគកំពូលកម្ពុជា នាឆ្នាំ២០២៣ ចំនែកក្រុមលេខ៣ នឹងត្រូវដាក់ឱ្យប្រកួតជម្រុះជាមួយក្រុមលេខ៨ចុងក្រោយគេ នៃលីគកំពូល ឆ្នាំ២០២២នេះ ដើម្បីយកក្រុមឈ្នះ ទៅលេងនៅរដូវកាលថ្មី៕
