បរទេស៖ លោក Jurgen Klopp បានបញ្ជាក់កាលពីថ្ងៃអង្គារថា Liverpool កំពុងតែមានបំណងក្នុងការ តាមរំខានក្រុម Manchester City គ្រប់នាទីទាំងអស់ ហើយនិងព្យាយាមទម្លាក់ក្រុមលេខ១មួយនេះ ចេញពីកំពូលតារាងនៃក្របខ័ណ្ឌ Premier League។
ការបញ្ចប់ក្នុងលទ្ធផលស្មើ ០-០ របស់ក្រុម Man City នាកីឡដ្ឋាន Crystal Palace កាលពីថ្ងៃចន្ទ មានន័យថា ក្រុមរបស់លោក Klopp អាចកាត់បន្ថយគម្លាតមកនៅត្រឹម១ពិន្ទុ តាមរយៈការយកឈ្នះលើក្រុមឡើងទម្រង់លេង Arsenal នៅរាត្រីនេះ ស្របពេលដែលពួកគេក៏នៅតែត្រូវប្រកួតជាមួយ Man City នៅកីឡដ្ឋាន Etihad ផងដែរ។
លោក Klopp បាននិយាយថា ក្រុមរបស់លោក ដែលបានឈ្នះពាន League Cup រួចជាស្រេច នៅរដូវកាលនេះ និងនៅតែស្ថិតក្នុងការប្រជែងពាន Champions League និង FA Cup ដែរនោះ បានប្តេជ្ញាចិត្តដើម្បីប្រជែងជាមួយនឹងក្រុម Man City រហូតដល់នាទីចុងក្រោយ។ គ្រូបង្វឹកសញ្ជាតិអាល្លឺម៉ង់រូបនេះបានឲ្យដឹងថា៖ «ពិតណាស់ នោះគឺជាផែនការ ដែលយើងចង់រំខានគ្រប់នាទីទាំងអស់ ប៉ុន្តែ យើងត្រូវតែឈ្នះរាល់ការប្រកួតបាល់ទាត់របស់យើង»៕
ប្រភពព័ត៌មាន៖ AFP
