មន្ត្រីជំនាញរបស់ក្រសួងអប់រំ យុវជន និងកីឡា លោក ស សុខា បានក្រើនរំឭកជាថ្មី ទៅដល់គ្រូបង្វឹក និងកីឡាករ កីឡាការិនីជម្រើសជាតិ ដែលកំពុងបិទខ្ទប់ហ្វឹកហាត់ នៅពហុកីឡដ្ឋានជាតិមរតកតេជោ ត្រូវខិតខំប្រឹងហ្វឹកហាត់ពង្រឹងសមត្ថភាពឱ្យបានខ្លាំង ដើម្បីឱ្យស័ក្តិសមជាអត្តពលិក ត្រូវចេញទៅប្រកួតតំណាងឱ្យជាតិ គឺមិនមែនពាក់អាវជម្រើសជាតិ មានទង់ជាតិកម្ពុជាហើយ ចេញទៅប្រកួត ដើម្បីតែរកបទពិសោធ ឬបានជិះយន្តហោះ ដើរលេងសប្បាយទៀតនោះទេ។
លោក ស សុខា បានថ្លែង នៅក្នុងពិធីសំណេះសំណាលជាមួយក្រុមជម្រើសជាតិ ក្នុងមណ្ឌលហាត់ហ្វឹកហ្វឺនបិទខ្ទប់ នៅពហុកីឡដ្ឋានជាតិមរតកតេជោ កាលពីព្រឹកថ្ងៃពុធថា៖ «នៅទីនេះ កីឡាករ កីឡាការិនី មានតួនាទីសំខាន់ និងខ្ពស់បំផុត ហើយការពាក់អាវ ដែលមានទង់ជាតិកម្ពុជារបស់យើង ទៅចូលរួមការប្រកួត នៅលើឆាកអន្តរជាតិនេះ គឺមិនមែនត្រៀមតែការប្រកួតស៊ីហ្គេម មួយនោះទេ។ ជាមួយគ្នានេះ ខ្ញុំនៅតែទទួចថា កុំពាក់អាវមានទង់ជាតិកម្ពុជា ទៅប្រកួត នៅលើឆាកអន្តរជាតិនេះ ដើម្បីយកតែបទពិសោធ»។ រដ្ឋលេខាធិការក្រសួងអប់រំ យុវជន និងកីឡា លោក ស សុខា បានបន្ថែមថា៖ «តែពាក់អាវនេះហើយ មិនមែនទៅយកបទពិសោធទៀតនោះទេ គឺទៅប្រកួតប្រជែងយកមេដាយតែម្តង ព្រោះការដាក់ទុនទាំងអស់ (របស់រាជរដ្ឋាភិបាល) នេះ បើយើងគ្រប់គ្រងមិនបានច្បាស់លាស់ទេ គឺនឹងបរាជ័យទាំងអស់គ្នា»។
ជាមួយគ្នានេះលោក ស សុខា បានលើកឡើងចំៗ ចំពោះទម្លាប់មិនល្អមួយចំនួន ដែលបានកើតមានឡើង នៅក្នុងក្រុមជម្រើសជាតិ ជាពិសេសថ្នាក់ដឹកនាំរបស់សហព័ន្ធកីឡាជាតិ មួយចំនួន ដែលប្រើប្រាស់មនោសញ្ចេតនាជ្រុលពេក ក្នុងការជ្រើសរើសអត្តពលិក ឱ្យចេញទៅប្រកួតតំណាងឱ្យជាតិ ជាមួយហេតុផលមិនល្អថា «ឱ្យវាចេញទៅប្រកួតទៅ ដើម្បីបានបទពិសោធ» ប៉ុន្តែ លោក ស សុខា បានប្រាប់ឱ្យបញ្ឈប់ ការប្រើទម្លាប់មិនល្អនេះ តទៅទៀត។
អ្នកគ្រប់គ្រងផ្នែកកីឡាប្រចាំនៅក្រសួងអប់រំ យុវជន និងកីឡា លោក ស សុខា បានសង្កតើធ្ងន់ថា៖ «កន្លងមក ធ្លាប់មានការលើកឡើងថា យកវាទៅ ដើម្បីដកស្រង់បទពិសោធ! យកវាទៅ ដើម្បីផ្តល់ឱកាស ប៉ុន្តែពេលនេះ អត់មានបែបនេះទៀតទេ គឺអ្នកទៅ ជាអ្នកដែលមានគុណភាពពិតប្រាកដ មិនមែនយកទៅ ដើម្បីផ្តល់ឱកាសជិះយន្តហោះ បានដើរលេងសប្បាយទេ! អាហ្នឹងសូមជម្រាបឱ្យហើយ»៕