ក្រុមអគ្គិសនីកម្ពុជា និងនគរបាលជាតិ (ប៉ូលិស) បានបញ្ចប់ការប្រកួត ដោយគ្មានអ្នកឈ្នះ ដើម្បីបន្តឈរនៅលេខ១ និងលេខ២ នៃការប្រកួតលីគ២ ស្របពេលក្រុមកំពុងឡើងជើង ISI ដង្កោរសែនជ័យ បានជួបការបរាជ័យ ក្រោមស្នាដៃក្រុមអាស៊ីអឺរ៉ុប ចំណែកក្រុមកោះកុង ក៏រកបាន៣ពិន្ទុ ផងដែរ។
នៅមុនការជួបគ្នា កាលពីថ្ងៃអាទិត្យ ម្សិលមិញនេះ ទាំងលោក អ៊ុង កនយ៉ានិត គ្រូបង្គោលក្រុមនគរបាលជាតិ និងគ្រូបង្វឹកក្រុមអគ្គិសនីកម្ពុជា លោក ទុំ សារ៉ាយ សុទ្ធតែបានបង្ហាញពីការខ្លាចគ្នា ព្រោះអគ្គិសនីកម្ពុជា បានចាត់ទុកក្រុមប៉ូលិស ជាឧបសគ្គធំ ក្នុងការដណ្តើមយកតំណែងជើងឯក ហើយប៉ូលិស ក៏បានចាត់ទុកក្រុមអគ្គិសនីកម្ពុជា ជារនាំងធំ សម្រាប់ពួកគេដូចគ្នា។
តែទោះបីជាយ៉ាងណា តាមរយៈការប្រកួតគ្នាផ្ទាល់ កាលពីម្សិលមិញនេះ ក្រុមអគ្គិសនីកម្ពុជា និងក្រុមប៉ូលិស បានបញ្ចប់ការប្រកួត ដោយគ្មានការស៊ុតបាល់បញ្ចូលទីដូចគ្នា ហើយជាមួយការស្មើគ្នា ០-០ នេះ អគ្គិសនីកម្ពុជា នៅតែបន្តឈរនៅលេខ១ ហើយក្រុមប៉ូលិស បន្តឈរនៅលេខ២ ដោយមាន៧ពិន្ទុស្មើគ្នា។
យ៉ាងណាក៏ដោយ ការអាចរក្សាទីតាំងនៅលើកំពូលតារាងរបស់ក្រុមទាំង២នេះ ក៏មានការរួមចំណែកពីអតីតក្រុមលេងនៅលីគកំពូលកម្ពុជា ជាមួយគ្នា អាស៊ីអឺរ៉ុប ផងដែរ ព្រោះកាលពីថ្ងៃអាទិត្យនោះ អាស៊ីអឺរ៉ុប បានយកឈ្នះក្រុមមិនធ្លាប់ចាញ់ ISIដង្កោរសែនជ័យ រហូតដល់ ៣-១ នៅលើទឹកដីខ្លួនឯង ដែលធ្វើឱ្យក្រុមទាំង២នេះ មាន៦ពិន្ទុស្មើគ្នា។
យ៉ាងណាមិញ ក្រុមកោះកុងអេហ្វស៊ី របស់លោក ហុក សុជីវ័ន បានយកឈ្នះក្រុមសៀមរាប ២-១ នៅលើទឹកដីខ្លួនឯង ដើម្បីឡើងមកឈរនៅលេខ៣ ជាបណ្តោះអាសន្ន ដោយមាន៧ពិន្ទុដែរ ប៉ុន្តែក្រុមសូលទីឡូអង្គរ បានបន្តចាញ់ក្រុមព្រៃវែងអេហ្វស៊ី ៣-១។
ជាមួយគ្នានេះ ក្រុមសាលាកីឡាបាល់ទាត់ជាតិ បានរកឃើញការឈ្នះជាលើកដំបូងរបស់ខ្លួនហើយ បន្ទាប់ពីពួកគេបានលត់ក្រុមខេត្តត្បូងឃ្មុំ ៤-០ កាលពីថ្ងៃអាទិត្យនោះដែរ ចំណែកក្រុមបន្ទាយមានជ័យ ក៏បានរកឃើញការឈ្នះជាលើកដំបូងរបស់ខ្លួនផងដែរ ជាមួយនឹងការយកឈ្នះក្រុមណិចស្តិបអេហ្វស៊ី ២-១ នៅលើទឹកដីខ្លួនឯង៕