សហព័ន្ធកីឡាបាល់ទាត់កម្ពុជា បានបង្ហាញបញ្ជីឈ្មោះកីឡាករបឋម សម្រាប់ដាក់ឱ្យប្រមូលផ្តុំហ្វឹកហាត់ នៅក្នុងក្រុមជម្រើសជាតិក្នុងសាល ជាផ្លូវការហើយ ដើម្បីត្រៀមចូលរួមការប្រកួតពានរង្វាន់ក្នុងសាល AFF Futsal Championship 2022 ដែលនឹងត្រូវធ្វើ នៅប្រទេសថៃ។
សម្រាប់បញ្ជីឈ្មោះកីឡាករជាបឋមនេះ សហព័ន្ធកីឡាបាល់ទាត់កម្ពុជា បានកោះហៅកីឡាករចំនួន២៥នាក់ សម្រាប់ដាក់ឱ្យប្រមូលផ្តុំហ្វឹកហាត់ ត្រៀមការប្រកួតពាន AFF Futsal Championship 2022នេះ ដែលនឹងត្រូវធ្វើការប្រកួតជម្រុះតាមពូល នៅថ្ងៃទី៣ ខែមេសា ខាងមុខនេះ។
កីឡាករទាំង២៥នាក់នេះ ត្រូវបានជ្រើសរើសចេញពីក្រុមចំនួន៩ ដែលកំពុងធ្វើការប្រកួតក្នុងសាលជើងឯកថ្នាក់ជាតិ ឆ្នាំ២០២១ ប៉ុន្តែនៅក្នុងនោះ មិនមានសមាជិកក្រុមមហាហង្ស ដែលជាក្រុមជើងឯកឆ្នាំចាស់ នោះទេ ហើយកីឡាករមកពីក្រុមចំនួន១០ទៀត ដែលកំពុងប្រកួតក្នុងសាលថ្នាក់ជាតិ ក៏មិនត្រូវបានជ្រើសរើសនោះដែរ។
សម្រាប់ការប្រកួតពានរង្វាន់ AFF Futsal Championship 2022 នេះ ក្រុមកម្ពុជា បានឈរនៅពូលA ជាមួយក្រុមម្ចាស់ផ្ទះថៃ ម៉ាឡេស៊ី ឥណ្ឌូនេស៊ី និងប្រ៊ុយណេ ចំណែកពូលB មានវៀតណាម ទីម័រខាងកើត មីយ៉ាន់ម៉ា និងអូស្ត្រាលី៕