មន្រ្តីជំនាញរបស់គណៈកម្មការធិការជាតិរៀបចំការប្រកួតស៊ីហ្គេម លើកទី៣២ ឆ្នាំ២០២៣ (CAMSOC) និងជាអគ្គលេខាធិការសហព័ន្ធកីឡាការ៉ាតេកម្ពុជា លោក វ៉ាត់ ចំរើន បានអះអាងថា កម្ពុជា បានត្រៀមខ្លួនរួចរាល់ហើយ ដើម្បីធ្វើជាម្ចាស់ផ្ទះ ការប្រកួតកីឡាការ៉ាតេជ្រើសរើសជើងឯកអាស៊ីអាគ្នេយ៍ ជាលើកដំបូង ដែលនឹងបើកការប្រកួតផ្លូវការ ពីថ្ងៃទី២៥ ដល់ថ្ងៃទី២៧ ខែមីនា ឆ្នាំ២០២២នេះ។
សម្រាប់ការធ្វើជាម្ចាស់ផ្ទះ ការប្រកួតកីឡាការ៉ាតេជើងឯកអាស៊ាន ជាលើកដំបូងនេះ មានប្រទេសចំនួន៩ បានចូលរួម រួមមានប្រតិភូមកពីប្រទេសថៃ វៀតណាម ម៉ាឡេស៊ី ឥណ្ឌូនេស៊ី សិង្ហបុរី ឡាវ ហ្វីលីពីន ប្រ៊ុយណេ និងកម្ពុជា ជាម្ចាស់ផ្ទះ ហើយគិតត្រឹមពេលនេះ លោក វ៉ាត់ ចំរើន បានអះអាងថា ប្រទេសជាភ្ញៀវទាំង៨នេះ បានធ្វើដំណើរ មកដល់កម្ពុជា អស់ហើយ។
លោក វ៉ាត់ ចំរើន បានប្រាប់ថា៖ «យើងបានរៀបចំបដិសណ្ឋារកិច្ចទទួលភ្ញៀវ មកដល់សណ្ឋាគារអស់ហើយ ដោយមាន៩ប្រទេសចូលរួម រួមទាំងកម្ពុជាយើង។ ចំណែកការរៀបចំទៅលើការងារបច្ចេកទេស និងកិច្ចប្រជុំផ្សេងៗទៀត យើងបានរៀបចំ ដំណើរការទៅដោយរលូន ដែលធ្វើឱ្យប្រទេសទាំងអស់ បានកោតសរសើរពីបដិសណ្ឋារកិច្ច និងការទទួលភ្ញៀវបានល្អរបស់កម្ពុជាយើង»។
ចំពោះប្រទេសទាំង៩ ដែលត្រូវចូលរួមប្រកួតប្រជែងគ្នា ទាំងទៅលើវិញ្ញាសាសម្តែងកាតា និងប្រយុទ្ធ នៅក្នុងការប្រកួតកីឡាការ៉ាតេជ្រើសរើសជើងឯកអាស៊ាននេះ ត្រូវចូលរួមប្រជុំបច្ចេកទេស ការថ្លឹងទម្ងន់ និងការចាប់ឆ្នោត នៅថ្ងៃពុធ និងថ្ងៃព្រហស្បតិ៍នេះ ហើយការហ្វឹកហាត់សម នៅលើទីលាន ដែលត្រូវប្រកួត របស់ក្រុមអត្តពលិក មកពីបណ្តាប្រទេសទាំងនេះ ក៏នឹងត្រូវធ្វើឡើងផងដែរ។
លោក វ៉ាត់ ចំរើន បានបន្ថែមថា៖ «នៅថ្ងៃពុធនេះ យើងនឹងប្រជុំជាមួយថ្នាក់ដឹកនាំទាំងអស់ នៅក្នុងអាស៊ីអាគ្នេយ៍ ហើយនៅថ្ងៃទី២៤ ខែមីនា យើងចាប់ផ្តើមថ្លឹងទម្ងន់ និងចាប់ឆ្នោត ហើយយើងនឹងចាប់ផ្តើមប្រកួត ពីថ្ងៃទី២៥ ដល់ថ្ងៃទី២៧ ខែមីនា ដោយព្រឹត្តិការណ៍នេះ មានកីឡាករ កីឡាការិនី និងប្រតិភូ ជិត២០០នាក់ ដែលកំពុងរៀបចំជាមួយចៅក្រម និងអាជ្ញាកណ្តាលអន្តរជាតិ»។
សម្រាប់ការប្រកួតកីឡាការ៉ាតេជ្រើសរើសជើងឯកអាស៊ាន ជាលើកដំបូង ដែលត្រូវធ្វើ នៅមជ្ឈមណ្ឌលជាតិហ្វឹកហ្វឺនកីឡាការ៉ាតេ នៃសាកលវិទ្យាល័យភូមិន្ទភ្នំពេញនេះ វាជាពេលវេលាដ៏សំខាន់ ដែលមន្រ្តីជំនាញរបស់សហព័ន្ធកីឡាការ៉ាតេកម្ពុជា ជាពិសេសមន្ត្រីបច្ចេកទេសរបស់ CAMSOC ត្រូវតេស្តចំណេះ ជំនាញរបស់ខ្លួន ថាតើពួកគេ រៀបចំការប្រកួតនេះបានល្អកម្រិតណា នៅមុនការឈានទៅរៀបចំការប្រកួតស៊ីហ្គេម លើកទី៣២ ឆ្នាំ២០២៣ ហើយក៏ជាពេលដែលក្រុមជម្រើសជាតិការ៉ាតេ បង្ហាញសមត្ថភាព ប្រកួតប្រជែងជាមួយបណ្តាប្រទេសទាំង៨នេះផងដែរ។
លោក វ៉ាត់ ចំរើន បានបញ្ជាក់ថា៖ «ការប្រកួតកម្រិតអាស៊ីអាគ្នេយ៍នេះ ជាការវាស់ស្ទង់សមត្ថភាពមួយដ៏សំខាន់ ព្រោះតាមរយៈការប្រកួតនេះ យើងអាចវិនិច្ឆ័យទៅលើចំណុចខ្លាំង និងចំណុចខ្សោយរបស់យើង ដើម្បីធ្វើការកែលំអ ឆ្ពោះទៅកាន់ស៊ីហ្គេម ឆ្នាំ២០២៣ អ៊ីចឹងអ្វីៗ ដែលយើងធ្វើនៅពេលនេះ យើងបានកំណត់ថា យើងត្រូវធ្វើឱ្យបានល្អប្រសើរ ហើយស្របតាមបរិបទកូវីដ១៩ ដែលយើងត្រូវបិទខ្ទប់ ឬត្រួតពិនិត្យ ទៅលើប្រតិភូទាំងអស់ ដែលបានចូលរួម ដើម្បីឱ្យមានសុវត្ថិភាពទាំងអស់គ្នា»៕