ព្រឹត្តិការណ៍ប្រកួតអន្តរជាតិ ដែលបានខកខានរៀបចំឱ្យមានឡើង នៅកម្ពុជា អស់រយៈពេលជិត២ឆ្នាំ ដោយសារវិបត្តិនៃជំងឺកូវីដ១៩នោះ នឹងត្រូវបានរៀបចំឱ្យមានឡើងវិញ និងមានទ្រុងទ្រាយធំ នៅក្នុងព្រឹត្តិការណ៍គុនខ្មែរអលស្តារវគ្គ៣ (Kun Khmer All Star 3) នាព្រលប់ថ្ងៃសុក្រនេះ។
ជាមួយការបើកឱ្យមានការប្រកួតលក្ខណៈអន្តរជាតិដ៏ធំ សារជាថ្មីនេះ កីឡាករជើងខ្លាំងរបស់កម្ពុជាចំនួន៦នាក់ រួមមាន ធឿន ធារ៉ា, អេលីត សុខហ៊ុច, អេលីត សាន់, អេលីត សម្ភស្ស, គង់ សំបូរ និង ម៉ាលី អូប៉ បានត្រៀមខ្លួនរួចជាស្រេច ដើម្បីវ៉ៃជាមួយអ្នកប្រយុទ្ធរបស់ថៃ ទាំង៦នាក់ នៅយប់នេះ។
លោក ស៊ន អេលីត ស្ថាបនិកបង្កើតកម្មវិធី គុនខ្មែរអលស្តារ នេះ អះអាងថា បេក្ខភាពទាំង៦នាក់នេះ សុទ្ធតែជាអ្នកមានសមត្ថភាពល្អ ក្នុងនោះក៏មានអ្នកធ្លាប់ឈ្នះបានខ្សែក្រវាត់ ផងដែរ ហើយប្រតិភូកីឡាករថៃទាំងនេះ បានធ្វើដំណើរមកដល់កម្ពុជា ជាង១សប្តាហ៍មកហើយ ដោយអ្នកទាំងនេះ បានថ្លឹងទម្ងន់ ជាមួយកីឡាករកម្ពុជាទាំង៦នាក់រួចរាល់ កាលពីល្ងាចថ្ងៃព្រហស្បតិ៍ ម្សិលមិញ។
សម្រាប់ការប្រកួតនេះ ជើងខ្លាំងរបស់កម្ពុជា ធឿន ធារ៉ា នឹងត្រូវដាក់ឱ្យប្រកួត នៅគូទី៩ចុងក្រោយគេ ជាមួយអ្នកប្រដាល់របស់ថៃ Yod Khunphon ហើយសម្រាប់ជំនួបនេះ ធឿន ធារ៉ា បាននិយាយថា៖ «ខ្ញុំធ្លាប់ឃើញការប្រកួតដៃគូរបស់ខ្ញុំ បានម្តង តែយូរដែរហើយ ដោយឃើញថា គាត់ល្អទាត់ និងដៃ តែទោះបីជាយ៉ាងណា ក្បាច់វ៉ៃ ខ្ញុំមានគ្រប់គ្រាន់អស់ហើយ ហើយខ្ញុំក៏បានពង្រឹងកម្លាំងសុហ្វ បានល្អផងដែរ អ៊ីចឹងការប្រកួតនេះ ខ្ញុំនឹងខំប្រឹងឱ្យអស់ពីសមត្ថភាព ធានាថា នឹងល្អមើល»។
ចំណែក គង់ សំបូរ ត្រូវដាក់ឱ្យប្រកួតជាមួយថៃ Chhnas Soek នៅក្នុងគូទី៥ ហើយសម្រាប់ជំនួបនេះ សំបូរ បាននិយាយថា៖ «ខ្ញុំបានបុកហាត់ខ្លាំង ចំនួន៣សប្តាហ៍ពេញ ដោយខ្ញុំហាត់ច្រើន ទៅលើការទាត់ និងកែង ហើយសម្រាប់ការប្រកួត៣ទឹកនេះ ខ្ញុំនឹងប្តូរផ្តាច់ឱ្យអស់ពីសមត្ថភាព តែអាវុធ ដែលខ្ញុំនឹងប្រើខ្លាំងជាងគេ គឺកែងតែម្តង»។
យ៉ាងណាមិញ កីឡាករ ម៉ាលី អូប៉ ដែលត្រូវជួបថៃ Phet Siri នោះ បាននិយាយថា៖ «ខ្ញុំបានប្រឹងប្រែងហ្វឹកហាត់ពេញគ្រប់ផ្នែក១០០ភាគរយ ហើយខ្ញុំនឹងវ៉ៃបុកតែម្តង។ ខ្ញុំអត់ខ្លាចនោះទេ ព្រោះពីមុនក៏ខ្ញុំវាយបុកដែរ ហើយពេលនេះ ខ្ញុំមានកម្លាំងពេញវិញហើយ អ៊ីចឹងខ្ញុំនឹងខំប្រឹវ៉ៃឱ្យអស់ពីលទ្ធភាពរបស់ខ្ញុំ ដើម្បីឱ្យបងប្អូនពេញចិត្ត និងល្អមើល»។
ជាមួយគ្នានេះ អ្នកលេងស្នៀតជើង អេលីត សុខហ៊ុច នឹងត្រូវប្រកួតជាមួយអ្នកប្រយុទ្ធរបស់ថៃ Chhlam Nouk ក្នុងគូទី៨ ហើយកីឡាករវាយមិនដកថយ អេលីត សាន់ ត្រូវជួបថៃ Moengkan York ក្នុងលំដាប់គូទី៧ ចំណែកកីឡាករប្រដាល់ជម្រើសជាតិ អេលីត សម្ភស្ស (វី សុភ័ស្ស) ត្រូវដាក់ឱ្យប្រកួតសកល ជាមួយម្ចាស់ខ្សែក្រវាត់ M150 របស់ថៃ PhiPhat Chhayphoum ក្នុងទម្ងន់៦៥គីឡូក្រាម។ បន្ថែមលើនេះ ក៏មានការប្រកួត «គូពន្លកគុនខ្មែរ» រវាងកីឡាករក្មេងៗ មានទម្ងន់ស្រាល ចំនួន៣គូទៀតផងដែរ៕
គូទី៩ ម្ចាស់ពូថៅពិឃាត ធឿន ធារ៉ា ជួបថៃ យ៉ត ឃុនភុន (Yod Khunphon)
គូទី៨ អេលីត សុខហ៊ុច ជួបថៃ ឆ្លាមនុក (Chhlam Nouk)
គូទី៧ គីកុងកំណាច អេលីត សាន់ ជួបថៃ មឹងកន យ៉ុក (Moengkan York)
គូទី៤ ម៉ាលី អូប៉ ជួបថៃ ផេត សិរី (Phet Siri)
គូទី៦ អេលីត សម្ភស្ស ជួបម្ចាស់ខ្សែក្រវាត់ M150 ភីផាត់ ឆាយភូម (PhiPhat Chhayphoum) ទម្ងន់៦៥គីឡូក្រាម ប្រដាល់សកល
គូទី៥ គង់ សំបូរ ជួបថៃ ឆ្នាស់ សឹក (Chhnas Soek)
គូពន្លកគុនខ្មែរ ឆន់ បុរី ជួប ឆូយ សុថាប់ និង ចាំ សិលា ប៉ះ រិទ្ធ ទេវតា ព្រមទាំងការជួបគ្នារវាង សូដា សុភា និង ផាន់ រក្សា
គង់ សំបូរ បាននិយាយថា៖ «ខ្ញុំបានបុកហាត់ខ្លាំង ចំនួន៣សប្តាហ៍ពេញ ដោយខ្ញុំហាត់ច្រើន ទៅលើការទាត់ និងកែង ព្រោះការប្រកួតជាមួយថៃ យើងផ្តោតខ្លាំងទៅលើស្នៀតទាំង២នេះ ហើយដោយសារយើងប្រកួតតែជាមួយតែខ្មែរគ្នាឯងយូរមកហើយនោះ អ៊ីចឹងពេលបានប្រកួត ជាមួយកីឡាករបរទេសវិញ វាមានអារម្មណ៍ប្លែក ហេតុនេះខ្ញុំនឹងធ្វើឱ្យអស់ពីសមត្ថភាពដោយខ្ញុំគិតថា ការប្រកួត៣ទឹកនេះ ខ្ញុំនឹងប្តូរផ្តាច់ឱ្យអស់ពីសមត្ថភាព តែអាវុធ ដែលខ្ញុំនឹងប្រើខ្លាំងជាងគេ គឺកែវតែម្តង»។
ធឿន ធារ៉ា បាននិយាយថា៖ «ខ្ញុំសប្បាយចិត្ត ដែលបានចូលរួមការប្រកួត ក្នុងកម្មវិធីគុនខ្មែរអលស្តារវគ្គ៣នេះ ដោយខ្ញុំបានហ្វឹកហាត់ត្រៀមខ្លាំង ចំណែកដៃគូរបស់ខ្ញុំ គឺខ្ញុំធ្លាប់ឃើញការប្រកួតគាត់បានម្តង តែយូរដែរហើយ ដោយឃើញថា គាត់ល្អទាត់ និងដៃ។ តែទោះបីជាយ៉ាងណា ក្បាច់វ៉ៃ ខ្ញុំមានគ្រប់គ្រាន់អស់ហើយ ហើយខ្ញុំក៏បានពង្រឹងកម្លាំងសុហ្វ បានល្អផងដែរ អ៊ីចឹងការប្រកួតនេះ ខ្ញុំនឹងខំប្រឹងឱ្យអស់ពីសមត្ថភាព ធានាថា នឹងល្អមើល»។
ម៉ាលី អូប៉ បាននិយាយថា៖ «ខ្ញុំបានប្រឹងប្រែងហ្វឹកហាត់ពេញគ្រប់ផ្នែក១០០ភាគរយ ហើយការទទួលបានឱកាសប្រកួតនៅក្នុងកម្មវិធីគុនខ្មែរអលស្តារ ជាលើកដំបូងនេះ គឺខ្ញុំទៅដល់វ៉ៃបុកយកតែម្តង។ ខ្ញុំអត់ខ្លាចនោះទេ ព្រោះពីមុនក៏ខ្ញុំវាយបុកដែរ ហើយពេលនេះ ខ្ញុំមានកម្លាំងពេញវិញហើយ អ៊ីចឹងខ្ញុំនឹងខំប្រឹវ៉ៃឱ្យអស់ពីលទ្ធភាពរបស់ខ្ញុំ ដើម្បីឱ្យបងប្អូនពេញចិត្ត និងល្អមើល»។
