បរទេស៖ Max Verstappen ដែលជាម្ចាស់ជើងឯកប្រណាំងរថយន្ត Formula one ពិភពលោក បានប្រើល្បឿនវ៉ាលើគូប្រកួត Charles Leclerc របស់ក្រុម Ferrari យ៉ាងល្អ ក្នុងការប្រណាំង៤ជុំចុងក្រោយ ដើម្បីកត់ត្រាជ័យជម្នះជាលើកទី១របស់គេនៅរដូវកាលនេះ ក្នុងព្តិតការណ៍ Saudi Arabian Grand Prix កាលពីថ្ងៃអាទិត្យ។
កីឡាករសញ្ជាតិហូឡង់រូបនេះ ដែលបានចាប់ផ្តើមប្រណាំងក្នុងលេខរៀងទី៤ បានបើកបរដល់ទីផ្តាច់ព្រ័ត្រ តាមរយៈការនាំមុខត្រឹមតែកន្លះវិនាទីលើកីឡាករ Leclerc ដែលនៅតែរក្សាការនាំមុខលើតារាងពិន្ទុរួម ក្រោយពីបានជួយឲ្យក្រុម Ferrari ដណ្តើមបានចំណាត់ថ្នាក់លេខ១ និងលេខ២ ក្នុងការប្រណាំងបើកឆាក Bahrain Grand Prix។ កីឡាករសញ្ជាតិអេស្ប៉ាញ Carlos Sainz ដែលជាមិត្តរួមក្រុមរបស់ Leclerc បានស្ថិតក្នុងចំណាត់ថ្នាក់លេខ៣។ លោក Christian Horner ប្រធានក្រុម Red Bull បានប្រាប់ Verstappen តាមរយៈវិទ្យុទាក់ទងថា៖ «វ៉ាវ ពិតជាប្រកៀកប្រកិតគ្នាមែន និងជាការប្រណាំងដ៏អស្ចារ្យ។ Max ពិតជាធ្វើបានល្អមែន។ អស្ចារ្យណាស់»។
ជ័យជម្នះនេះ គឺជាកាឈ្នះជាលើកទី២១ក្នុងអាជីពរបស់ Verstappen និងបានជួយឲ្យរូបគេទទួលបានពិន្ទុជាលើកដំបូងនៅឆ្នាំនេះ ក្រោយពីកីឡាករទាំង២នាក់របស់ក្រុម Red Bull បានបោះបង់ការប្រណាំងដូចគ្នាក្នុងប្រទេសបារ៉ែន៕
ប្រភពព័ត៌មាន៖ Channel News Asia
