ក្រុមអត្តពលិកកីឡាការ៉ាតេកម្ពុជា បានបង្កើតនូវកំណត់ត្រាដ៏ល្អបំផុត ដែលគ្រប់គ្នាស្ទើរតែមិនចង់ជឿ ខណៈពួកគេ អាចដណ្តើមបានទាំងមេដាយមាស ប្រាក់ និងសំរឹទ្ធសរុបចំនួន៧ ហើយអាចឈរនៅក្នុងចំណាត់លេខ៤ ក្នុងចំណោមប្រទេសចូលរួមប្រកួតទាំង៩ ក្នុងតំបន់អាស៊ាននោះ។
ក្នុងនាមជាម្ចាស់ផ្ទះ ការប្រកួតកីឡាការ៉ាតេជ្រើសរើសជើងឯកអាស៊ីអាគ្នេយ៍ លើកទី៩ (The 9th South East Asian Karate Championship) ឆ្នាំ២០២២ ជាលើកដំបូងនេះ ក្រុមអត្តពលិកការ៉ាតេកម្ពុជា មិនបានធ្វើឱ្យកម្ពុជា បាក់មុខនោះទេ ដោយពួកគេ អាចដណ្តើមបានមេដាយមាស១ ប្រាក់១ និងសំរឹទ្ធចំនួន៥ ដែលលទ្ធផលនេះ ត្រូវបានថ្នាក់ដឹកនាំសហព័ន្ធកីឡាការ៉ាតេកម្ពុជា ចាត់ទុកថា ជាជោគជ័យដ៏សំខាន់ ដែលយើងមិននឹកស្មានដល់ថា អាចកើតមាន។
លោក សាមឺឌី ស៊ីវឌ្ឍនា អនុប្រធានទី៣ សហព័ន្ធកីឡាការ៉ាតេអាស៊ីអាគ្នេយ៍ និងជាអនុប្រធានសហព័ន្ធកីឡាការ៉ាតេកម្ពុជា បានថ្លែង ក្រោយបញ្ចប់ការប្រកួត កាលពីថ្ងៃអាទិត្យ ម្សិលមិញថា៖ «ខ្ញុំនិយាយតាមត្រង់ ខ្ញុំមិននឹកស្មានថា កីឡាករកីឡាការិនីកម្ពុជាយើងបានឈ្នះមេដាយផង ដោយយើងបានដាក់ក្តីសង្ឃឹមថា បានត្រឹមមេដាយសំរឹទ្ធប៉ុណ្ណោះ ប៉ុន្តែកម្ពុជាដណ្តើមបានរហូតដល់មេដាយមាស១ ប្រាក់១ និងមេដាយសំរឹទ្ធ ជាច្រើនគ្រឿងទៀត»។
ជាមួយគ្នានេះ លោក សាមឺឌី ស៊ីវឌ្ឍនា ក៏បានអះអាងថា កម្ពុជា បានទទួលការសរសើរខ្លាំង សម្រាប់ ការធ្វើជាម្ចាស់ផ្ទះ ការប្រកួតកីឡាការ៉ាតេជ្រើសរើសជើងឯកអាស៊ីអាគ្នេយ៍ ជាលើកដំបូងនេះ។ «គណៈប្រតិភូ នៃបណ្តាប្រទេសក្នុងអាស៊ីអាគ្នេយ៍ទាំងអស់បានកោតសរសើរ ចំពោះការរៀបចំធ្វើម្ចាស់ផ្ទះកម្ពុជា ជាពិសេស គឺ គណៈ កម្មការ បច្ចេកទេសអន្តរជាតិ បាន កោតសរសើរពីកម្ពុជាថា រៀបចំបានល្អ ទាំងការទទួលអាហារ ការរៀបចំផ្នែករថយន្តក៏មានលក្ខណៈល្អប្រសើរផងដែរ។ សម្រាប់ការរៀបចំធ្វើម្ចាស់ផ្ទះ ស៊ីហ្គេម ២០២៣ យើងជឿជាក់ថា យើងនឹងអាចធ្វើបានបែបនេះ ឬអាចល្អជាងនេះ»។
គួរបញ្ជាក់ថា ការប្រកួតកីឡាការ៉ាតេជ្រើសរើសជើងឯកអាស៊ីអាគ្នេយ៍ លើកទី៩ ឆ្នាំ២០២២ ដែលបានធ្វើនៅមជ្ឈមណ្ឌលកីឡាការ៉ាតេនៃសាកលវិទ្យាល័យភូមិន្ទភ្នំពេញ នេះ មានប្រទេសចំនួន៩ បានចូលរួម រួមមានម្ចាស់ផ្ទះកម្ពុជា វៀតណាម ថៃ ឥណ្ឌូនេស៊ី ម៉ាឡេស៊ី សិង្ហបុរី ហ្វីលីពីន ឡាវ និងប្រ៊ុយណេ។
តែទោះបីជាយ៉ាងណា តាមរយៈការប្រកួតចំនួន៣ថ្ងៃ ដែលទើបបានបញ្ចប់ កាលពីថ្ងៃអាទិត្យ ម្សិលមិញនេះ គឺសិង្ហបុរី និងប្រ៊ុយណេ មិនដណ្តើមបានមេដាយនោះទេ ខណៈប្រទេសវៀតណាម ឈរនៅលេខ១ ដោយដណ្តើមបានមេដាយមាស៥ ប្រាក់៥ សំរឹទ្ធ៣ តាមពីក្រោយដោយឥណ្ឌូនេស៊ី ដែលឈ្នះមេដាយមាស៥ ប្រាក់៣ សំរឹទ្ធ៦ ម៉ាឡេស៊ី បានមាស៥ ប្រាក់៣ សំរឹទ្ធ៤ កម្ពុជា បានមាស១ ប្រាក់១ សំរឹទ្ធ៥ ថៃ បានប្រាក់៣ សំរឹទ្ធ៦ ហ្វីលីពីន ប្រាក់១ សំរឹទ្ធ២ និងប្រទេសឡាវ បានមេដាយសំរឹទ្ធ២ ខណៈមេដាយមាស១របស់កម្ពុជារកបានដោយកីឡាករ ស្រួង វិរៈ លើវិញ្ញសាប្រយុទ្ធ ទម្ងន់ក្រោម ៨៤គីឡូក្រាម ក្រោយយកឈ្នះកីឡាករម៉ាឡេស៊ី S Gnanasekaran Kathish នៅវគ្គផ្តាច់ព្រ័ត្រ៕