នៅទីបំផុត ក្លិបបាល់ទាត់វិសាខា បានដាក់សំណើទៅកាន់លោកនាយកប្រតិបត្តិក្រុមហ៊ុនខេមបូឌានព្រីមៀរលីគ ជាផ្លូវការ នៅថ្ងៃចន្ទនេះ ដើម្បីបង្ហាញពីការមិនអាចទទួលយកបាន ទៅលើក្រុមអាជ្ញាកណ្តាល ដែលបានចូលរួមការកាត់សេចក្តី នៅពេលក្រុមវិសាខា ប្រកួតស្មើគ្នា ០-០ ជាមួយក្រុមការពារតំណែងជើងឯក ភ្នំពេញក្រោន ក្នុងការប្រកួតខេមបូឌានព្រីមៀរលីគ កាលពីថ្ងៃសៅរ៍។
នៅក្នុងលិខិត ដែលបានផ្ញើទៅឱ្យ លោកនាយកប្រតិបត្តិក្រុមហ៊ុនខេមបូឌានព្រីមៀរលីគ កាលពីព្រឹកថ្ងៃចន្ទនេះ គឺក្លិបវិសាខា បានស្នើសុំឱ្យមានការពន្យល់ពីលោកអាជ្ញាកណ្តាល ពាក់ព័ន្ធទៅនឹងកំហុស មិនផ្តល់ការពិន័យ១១ម៉ែត្រ មកឱ្យក្រុមរបស់ខ្លួន ជុំវិញការបង្កើតកំហុសរបស់ខ្សែការពារ ឆុំ ភីសា ដែលបានធ្វើឱ្យកីឡាករ អ៊ិន សូដាវីដ ដួល ក្នុងប្រអប់គ្រោះថ្នាក់ នៅក្នុងនាទីទី ៥១:៤០។
តាមរយៈលិខិត បើកចំហនេះ ក្លិបវិសាខា បានហៅការកាត់សេចក្តីរបស់លោកអាជ្ញាកណ្តាល (លឹម ប៊ុនធឿន) នាពេលនេះ ថាបានបង្ហាញពីភាពអសមត្ថភាពរបស់អាជ្ញាកណ្តាល និងមានភាពអត្តិធម៌ មកលើក្លិបវិសាខា ដែលក្លិបមួយនេះ បានបញ្ជាក់ថា ខ្លួនមិនអាចទទួលយកការកាត់សេចក្តីបែបនេះបានទេ។
តាមរយៈការប្រកួត កាលពីថ្ងៃសៅរ៍ នៅកីឡដ្ឋានស្មាតអអេសអ៊ិន នោះ ខ្សែការពារ ឆុំ ភីសា បានព្យាយាមរត់ទៅសង្រ្គោះបាល់ ពីការរត់មកឆក់របស់ អ៊ិន សូដាវីដ តែក៏បានប៉ះពារគ្នា បណ្តាលឱ្យ អ៊ិន សូដាវីដ ដួល នៅក្នុងប្រអប់គ្រោះថ្នាក់។ ភ្លាមៗនោះ លោកអាជ្ញាកណ្តាល លឹម ប៊ុនធឿន ក៏បានបង្ហាញពីចេតនា ក្នុងការផ្តល់បាល់ពិន័យ១១ម៉ែត្រ តៅឱ្យក្រុមវិសាខា ផងដែរ ប៉ុន្តែក្រោយការពិភាក្សាជាមួយអាជ្ញាកណ្តាលខ្សែបន្ទាត់រួចមក លោកក៏បានសម្រេចប្តូរជាការឱ្យទាត់បាល់ហ្រ្វីឃីកជំនួសវិញ។
ចំពោះបញ្ហានេះ ត្រូវបានអ្នកទស្សនា មានការយល់ឃើញខុសគ្នាៗ ដោយអ្នកខ្លះថា សមតែពិន័យបាល់១១ម៉ែត្រ តែ អ្នកខ្លះទៀតថា មិនអាចផ្តល់បាល់ពិន័យ១១ម៉ែត្រនោះទេ ព្រោះជើងរបស់ ឆុំ ភីសា បានទៅប៉ះបាល់មុន ទើបប៉ះជើង អ៊ិន សូដាវីដ ហើយការប៉ះទង្គិចគ្នានោះ ហាក់នៅក្រៅគំនូសសទៅទៀត។ តែទោះបីជាយ៉ាងណា តាមរយៈការបង្ហាញវីដេអូយឺតៗនោះ ក៏នៅតែមើលមិនច្បាស់ ព្រោះជាការថតពីចំហៀង ហេតុនេះ មានតែរង់ចាំការសម្រេចរបស់មន្រ្តីជំនាញរបស់ក្រុមហ៊ុនខេមបូឌានព្រីមៀរលីគ ថាតើ សំណើរបស់វិសាខា ទទួលបានផល ឬក៏យ៉ាងណា?៕