មន្រ្តីជំនាញគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ (CAMSOC) បានអះអាងថា កម្ពុជា នឹងបង្ហាញទស្សនីយភាពសំខាន់ៗ នៅពេលប្រតិភូរបស់ខ្លួន ទៅទទួលទង់ស៊ីហ្គេម ពីប្រទេសវៀតណាម នាថ្ងៃទី២៣ ខែឧសភា ឆ្នាំ២០២២ខាងមុខនេះ ដើម្បីទាក់ទាញបណ្តាប្រទេស នៅក្នុងតំបន់អាស៊ាន ឱ្យមានភាពអន្ទះសារ និងចាប់អារម្មណ៍កាន់តែខ្លាំង ក្នុងការមកចូលរួម ការប្រកួតស៊ីហ្គេម នៅកម្ពុជាវិញម្តង។
«យើងត្រូវរៀបចំធនធានមនុស្សរបស់យើង សម្រាប់ការសម្តែង ទទួលទង់ស៊ីហ្គេម នៅប្រទេសវៀតណាមនេះ ឱ្យបានគ្រប់គ្រាន់ និងរៀបចំហ្វឹកហាត់ឱ្យបាន១ខែ មុននឹងចេញទៅ អ៊ីចឹងនៅមុននេះ យើងបានពិនិត្យ និងធ្វើវីដេអូ ឱ្យស៊ីទៅនឹងការសម្តែងនេះ ដោយយើងបានការណែនាំពីឯកឧត្តមបណ្ឌិត ថោង ខុន ព្រមទាំងលោកគ្រូ ព្រឹទ្ធាចារ្យ និងឯកឧត្តម នៅក្រសួងវប្បធម៌ និងវិចិត្រសិល្បៈ ដោយលោកបានខិតខំប្រឹងប្រែង និងមើលការខុសត្រូវយ៉ាងលម្អិតខាងលើផ្នែកបច្ចេកទេសសម្តែង និងការរៀបចំទស្សនីយភាព ដើម្បីធ្វើឱ្យការសម្តែងរយៈពេល១២នាទីហ្នឹង ក្លាយជាមេដែកមួយ ក្នុងការទាក់ទាញប្រទេសទាំងអស់ នៅក្នុងអាស៊ីអាគ្នេយ៍ហ្នឹង ឱ្យរងចាំដោយទន្ទះសារមកកម្ពុជា នៅពេលកម្ពុជា ធ្វើម្ចាស់ផ្ទះស៊ីហ្គេម ឆ្នាំ២០២៣»។
នេះជាការលើកឡើងរបស់ លោក វ៉ាត់ ចំរើន អគ្គលេខាធិការ CAMSOC នៅពេលលោកបានបញ្ចប់កិច្ចប្រជុំជាមួយគណៈកម្មការជំនាញរបស់ CAMSOC កាលព្រឹកថ្ងៃអង្គារនេះ ដើម្បីធ្វើការប្រជុំជំនាញ និងត្រួតពិនិត្យឡើងវិញ លើការរៀបចំសម្តែង ទៅទទួលទង់ស៊ីហ្គេម នៅប្រទេសវៀតណាម នាថ្ងៃទី២៣ ខែឧសភា ឆ្នាំ២០២២ នៅក្នុងពិធីបិទស៊ីហ្គេម នាទីក្រុងហាណូយ ប្រទេសវៀតណាម ដោយក្នុងនោះ កម្ពុជា នឹងបញ្ជួនក្រុមសម្តែងសរុបចំនួន៤០នាក់ ព្រមទាំងគ្រូបង្វឹក និងអ្នកអមដំណើររៀបចំបច្ចេកទេស ចំនួន២០នាក់ទៀត សរុប៦០នាក់ ទៅចូលរួម។
សម្រាប់ការសម្តែងរយៈពេល១២នាទីនេះ លោក វ៉ាត់ ចំរើន បានលម្អិតថា៖ «យើងនឹងមានរបាំ ដែលបង្ហាញពីបាវចនារបស់យើង គឺកីឡារស់ក្នុងសន្តិភាព និងពីរូបភាពនៃស៊ីហ្គេមរបស់យើង ដែលយើងត្រូវបង្ហាញពីទស្សនីយភាពនៃសន្តិភាព ហើយយើងក៏មានចម្រៀងស្វាគមន៍ជាច្រើនទៀត ដែលចម្រៀងនេះ គឺស្វាគមន៍ប្រទេសទាំងអស់ ពេលមកចូលរួមស៊ីហ្គេម នៅកម្ពុជា។ មួយទៀត យើងមានការបង្ហាញ នូវក្បាច់គុនល្បុក្កតោ ដែលតំណាងឱ្យកីឡាជាអត្តសញ្ញាណជាតិ ហើយយើងក៏យក Mascot និងឡូហ្គោរបស់យើងទៅបង្ហាញផងដែរ ដើម្បីផ្តល់ជាព័ត៌មានដល់ប្រទេសទាំងអស់ឱ្យបានដឹងថា នៅខែឧសភា ឆ្នាំ២០២៣ យើងនឹងធ្វើជាម្ចាស់ផ្ទះស៊ីហ្គេម ស្វាគមន៍ប្រទេសទាំងនោះវិញម្តង»។
អ្នកជំនាញរូបនេះ បានបញ្ជាក់ថា៖ «ចំពោះការរៀបចំនេះ យើងនឹងធ្វើដោយម៉ត់ចត់បំផុត ព្រោះឥស្សរជនជាន់ខ្ពស់របស់យើង គឺសម្តេចពិជ័យសេនា ទៀ បាញ់ ជាប្រធាន CAMSOC នឹងទៅចូលរួម ក្នុងការទទួលទង់ស៊ីហ្គេម នៅក្នុងពិធីបិទស៊ីហ្គេម នោះតែម្តង ហើយម្ចាស់ផ្ទះវៀតណាម នឹងរៀបចំបដិសណ្ឋារកិច្ចជាពិសេសសម្រាប់សម្តេចពិជ័យ អ៊ីចឹងយើងរៀបចំអស់ហើយ ជាមួយម្ចាស់ផ្ទះ ដោយយើង នឹងធ្វើកិច្ចការនេះ ដោយរលូន និងមានសុវត្ថិភាព»៕