ក្រុមជម្រើសជាតិក្នុងសាលកម្ពុជា នៅថ្ងៃពុធនេះ បានធ្វើដំណើរទៅដល់ទីក្រុងបាំងកក ប្រទេសថៃហើយ ដែលជាកន្លែងពួកគេ ត្រូវប្រើការហ្វឹកហាត់រួមគ្នា ត្រឹមជាង១សប្តាហ៍ ដើម្បីប្រកួតប្រជែងដណ្តើមពានរង្វាន់ក្នុងសាល AFF Futsal Championship 2022 ដោយព្រឹត្តិការណ៍នេះ នឹងចាប់ដំណើរការពីថ្ងៃទី២ រដូវដល់ថ្ងៃទី១០ ខែមេសា ខាងមុខនេះ។
មានតែកីឡាករ១៤នាក់ប៉ុណ្ណោះ ត្រូវបានជ្រើសរើសតំណាងឱ្យកម្ពុជា សម្រាប់ទៅចូលរួមការប្រកួតថ្នាកតំបន់មួយនេះ ដែលអ្នកទាំងនេះ ត្រូវបានជម្រុះចេញពីបេក្ខភាពចំនួន២៥នាក់ ដែលសហព័ន្ធកីឡាបាល់ទាត់កម្ពុជា បានធ្វើការប្រមូលផ្តុំ នៅក្នុងបញ្ជីឈ្មោះជាបឋម ហើយពួកគេ បានតាំងចិត្តខ្ពស់ ក្នុងការប្រជែងយកឱ្យបានលទ្ធផលល្អណាមួយ បើទោះបីជា កន្លងមកក្រុមកម្ពុជា តែងតែធ្លាក់នៅក្នុងវគ្គជម្រុះក៏ដោយ។
ខ្សែប្រយុទ្ធ ព្រំ ឌីយ៉ាម៉ង់ បាននិយាយថា៖ «វាពិតជាអស្ចារ្យសម្រាប់ខ្លួនខ្ញុំ ដែលបានជាប់ជាជម្រើសជាតិ ហើយចំពោះខ្ញុំ និងក្រុមទាំងមូល មានការតាំងចិត្តមួយថា ទៅយកជ័យជម្នះ សម្រាប់ការប្រកួតពានមួយនេះ។ បើទោះបីជាលទ្ធផល ទទួលបានបែបណា ប៉ុន្តែពួកយើង នឹងប្រឹងប្រែងឱ្យអស់ពីសមត្ថភាព ដែលយើងមាន ហើយសង្ឃឹមថា យើងនឹងទទួលបានលទ្ធផលល្អណាមួយ សម្រាប់ជាតិយើង»។
សម្រាប់បេក្ខភាពទាំង១៤នាក់ ដែលត្រូវបានបញ្ជូនឱ្យទៅចូលរួមការប្រកួតពានរង្វាន់ AFF Futsal Championship 2022 នៅប្រទេសថៃលើកនេះ រួមមានកីឡាករ គន្ធ លន់ដារ៉ូត, កែវ ជាតួ, កែវ សុចិត្រា, តុង ច័ន្ទមុន្នី របស់ក្រុម The Blue Warriors កីឡាករ ឌុក សុផាត, ព្រំ ឌីយ៉ាម៉ង់ របស់ក្រុម Tai Chi FT កីឡាករ អោកចាន់ សេរីវង្ស, រស់ ស៊ីរដ្ឋា, រស់ ស៊ីចំរើន របស់ក្រុម Alpha FT កីឡាករ ញឹក ថាលីដា, ឡាក់ ភីរុណ និងអ្នកចាំទី នួន វាសនា របស់ក្រុមឪម៉ាល រួមទាំងកីឡាករ លន់ សុធីតារ័ត្ន និងអ្នកចាំទី ភឿន ចាន់វាសនា របស់ក្រុម Young Gun FT។
គួរបញ្ជាក់ថា ការប្រកួតពានរង្វាន់ AFF Futsal Championship 2022 នេះ ក្រុមកម្ពុជា បានឈរនៅពូលA ដោយក្នុងនោះ កម្ពុជា ត្រូវប៉ះក្រុមម៉ាឡេស៊ី នៅថ្ងៃទី២ មុនទៅជួបក្រុមម្ចាស់ផ្ទះថៃ នៅថ្ងៃទី៣ រួចបន្តទៅប្រកួតជាមួយក្រុមប្រ៊ុណេ នៅថ្ងៃទី៤ ហើយចុងក្រោយត្រូវប្រឈមជាមួយក្រុមឥណ្ឌូនេស៊ី នៅថ្ងៃទី៦ ខែមេសា ចំណែកពូលB មានវៀតណាម ទីម័រខាងកើត មីយ៉ាន់ម៉ា និងអូស្ត្រាលី៕