ស្របពេលសង្វៀនដទៃទៀត បានបន្តរៀបចំឱ្យមានការប្រកួតរវាងកីឡាករខ្មែរ និងខ្មែរនោះ គឺសង្វៀនបាយ័នស្ទឹងមានជ័យ នៅសប្តាហ៍នេះ បានបើកឱ្យមានការប្រកួតអន្តរជាតិ វិញហើយ បន្ទាប់ពីបានខកខានអស់រយៈពេលជិត២ឆ្នាំ ដោយសារវិបត្តិនៃការឆ្លងជំងឺកូវីដ១៩ មានការរីករាលដាលខ្លាំង។
សម្រាប់ការប្រកួតទាំង៧កម្មវិធី នៅថ្ងៃសុក្រ ថ្ងៃសៅរ៍ និងថ្ងៃអាទិត្យនេះ អ្នកគ្រប់គ្រងសង្វៀនបាយ័នស្ទឹងមានជ័យ បានរៀបចំឱ្យមានការប្រកួតគូអន្តរជាតិ ចំនួន៦កម្មវិធី សរុបស្មើ១២គូ ហើយបរទេស ដែលសង្វៀនបាយ័ន នាំយកមកប្រកួត សម្រាប់សប្តាហ៍នេះ សុទ្ធតែជាកីឡាករថៃទាំងអស់។
យោងតាមសមាសភាពកីឡាករថៃទាំង១២នាក់ ដែលបានផ្គូផ្គងរួចហើយនោះ គឺភាគច្រើនជាកីឡាករថៃ ដែលធ្លាប់មកប្រកួត នៅកម្ពុជា កន្លងមក ហើយអ្វីដែលគេចាំច្បាស់ជាងគេនោះ គឺកីឡាករ ចាស់ វស្សា ទួនប៉េ ដែលគេម្នាក់នេះ ធ្លាប់បានយកឈ្នះកីឡាករកម្ពុជា ជាច្រើននាក់ តែបានចាញ់ជើងខ្លាំង ឈុត សេរីវ៉ាន់ថង។
សម្រាប់ការវិលមកជាន់សង្វៀនបាយ័ន ជាថ្មីនេះ ទួនប៉េ មានការស្រេកអរខ្លាំង បើទោះបីជាលើកនេះ រូបគេត្រូវប៉ះជើងខ្លាំង ពេជ្រ ប៊ុនសិទ្ធ។ អ្នកទាំង២នេះ ត្រូវជួបគ្នា នៅយប់ថ្ងៃសុក្រនោះ ក្នុងទម្ងន់៥៧គីឡួក្រាម ហើយសម្រាប់ការប្រកួតនេះ ទួនប៉េ បាននិយាយថា គេត្រៀមខ្លួនបានល្អហើយ ប៉ុន្តែកីឡាករសម្បូរបទពិសោធរូបនេះ នៅមិនទាន់បានឃើញសមត្ថភាពប្រកួតរបស់ ពេជ្រ ប៊ុនសិទ្ធ នោះឡើយទេ។ ចំណែកអ្នកលេងកណ្តាប់ដៃធ្ងន់ ពេជ្រ សម្បត្តិ ក៏ត្រូវជួបថៃ ណាត់តាផុន ក្នុងទម្ងន់៦០គីឡូក្រាម នៅយប់ថ្ងៃសុក្រនេះដែរ។
សម្រាប់ការប្រកួត នៅព្រឹកម៉ោង៨ ថ្ងៃសៅរ៍ស្អែកនេះ កីឡាករកម្ពុជា ហុង សុវណ្ណចាន់សុធី ត្រូវជួបថៃ ស៊ុកកាស៊េម ទម្ងន់ ៥៧គីឡូក្រាម នៅមុនពេល សោម វិឆ័យ ប៉ះថៃ កៀតនិឃុម ក្នុងទម្ងន់៦០គីឡូក្រាម។ ចំពោះកម្មវិធី នារសៀលម៉ោង១ ថ្ងៃសៅរ៍នោះដែរ កីឡាករ រិទ្ធ វិបុល ត្រូវប្រកួតជាមួយថៃ ភេតយុភីន ក្នុងទម្ងន់៥៤គីឡូក្រាម ហើយ សុខ វណ្ណា ត្រូវតទល់ជាមួយ រ៉ុងស្យ៉ាម របស់ថៃ ក្នុងទម្ងន់៥៧គីឡូក្រាម។ ចំណែលនៅល្ងាច៦ ថ្ងៃសៅរ៍នោះដែរ កីឡាករ ណង សាវ ត្រូវជួបថៃ មឿងថុង ក្នុងទម្ងន់៥៧គីឡូក្រាម និង អេ ណារ័ត្ន ប៉ះ ស៊ុនស៊ីឡេក ក្នុងទម្ងន់៥៧គីឡូក្រាម។
ដោយឡែក សម្រាប់ការប្រកួត នៅថ្ងៃអាទិត្យ ចាប់ពីម៉ោង១២ តទៅ កីឡារកកម្ពុជា ធន់ ក្របី ត្រូវជួបថៃ ឡាហ្វាន់ ក្នុងប្រភេទទម្ងន់៥៧គីឡូក្រាម ខណៈជើងខ្លាំង ផល សោភ័ណ្ឌ ត្រូវប្រឈមជាមួយ ណារ៉ូតុ ដែលជាជើងខ្លាំងរបស់ថៃ នៅក្នុងទម្ងន់៦៥គីឡូក្រាម។ ចំណែកនៅល្ងាចម៉ោង៦ ថ្ងៃអាទិត្យនោះដែរ កីឡាករ នូវ សុខទី ត្រូវជួបថៃ ប៉ាន់ដាស័ក្តិ ក្នុងទម្ងន់៥៤គីឡូក្រាម ហើយ ឡុង បេនលឿន ត្រូវប៉ះថៃ ហ្វាប្រាច័ក្រ ក្នុងប្រភេទទម្ងន់៦៥គីឡូក្រាម៕
