ក្រុមជម្រើសជាតិបាល់ទាត់ក្នុងសាលកម្ពុជា នៅមិនទាន់អាចរកឃើញការឈ្នះ នៅឡើយទេ បន្ទាប់ពីបានចាញ់ទាំង២លើកជាប់ៗគ្នា នៅក្នុងការប្រកួតពានរង្វាន់ AFF Futsal Championship 2022 នៅប្រទេសថៃ ហើយនៅម៉ោង៥ ថ្ងៃចន្ទនេះ ពួកគេ ត្រូវបន្តជួបក្រុមប្រ៊ុយណេ។
សម្រាប់ការប្រកួតបើកឆាកប្រចាំពូលA កាលពីថ្ងៃសៅរ៍ ក្រុមជម្រើសជាតិកម្ពុជា បានធ្វើការប្រកួតជាមួយក្រុមម៉ាឡេស៊ី យ៉ាងស្វិតស្វាញបំផុត នៅមុនពេលពួកគេ បានចាញ់ ក្នុងលទ្ធផល ៧-៦ ដ៏គួរឱ្យសោកស្តាយបំផុត។ យ៉ាងណាមិញ សម្រាប់ការជួបក្រុមម្ចាស់ផ្ទះថៃ កាលពីថ្ងៃអាទិត្យ ម្សិលមិញ ក្រុមកម្ពុជា បានចាញ់យ៉ាងជូរចត់បំផុត គឺរហូតដល់ ១៦-០។
ដោយឡែកសម្រាប់ការវិលមកជួបក្រុមប្រ៊ុយណេ របស់កម្ពុជា នៅថ្ងៃនេះ វាបានក្លាយជាការប្រកួតរវាងក្រុមចាញ់ និងក្រុមចាញ់ ព្រោះ២ប្រកួតមកនេះ ក្រុមប្រ៊ុយណេ បានចាញ់ក្រុមថៃ ១៣-០ និងចាញ់ក្រុមឥណ្ឌូនេស៊ី ១២-០ ហើយកំពុងឈរនៅបាតតារាងប្រចាំពូលAនេះ ដោយគ្មានពិន្ទុរាប់ដូចកម្ពុជាដែរ ខណៈក្រុមថៃ បានឈរនៅលេខ១ ដោយមាន៦ពិន្ទុពេញ ស្មើជាមួយក្រុមលេខ២ ឥណ្ឌូនេស៊ី។
តាមរយៈលទ្ធផលនៃការប្រកួតនេះ អាចនិយាយបានថា ក្រុមកម្ពុជា និងប្រ៊ុយណេ សុទ្ធតែអាចមានលទ្ធភាពរៀងៗខ្លួន ក្នុងការដណ្តើមយក៣ពិន្ទុ ជាលើកដំបូង ហើយការប្រកួតនេះ អាចមានភាពស្វិតស្វាញ ព្រោះកម្រិតលេងរបស់ក្រុមទាំង២នេះ មានភាពប្រដំប្រសងគ្នា។ ចំណែកក្រុមឥណ្ឌូនេស៊ី ក៏ត្រូវប្រកួតជាមួយក្រុមលេខ៣ ម៉ាឡេស៊ី នៅថ្ងៃចន្ទនេះ ផងដែរ៕
