ការប្រកួតដណ្តើម៣ពិន្ទុ នៅលើសង្វៀនថោន កាលពីថ្ងៃអាទិត្យ រវាងអ្នកលេងស្នោតជើង អេលីត ចំរើន និង ធន់ អៀនឡៃ ត្រូវបានគេចាត់ទុកថា ជាការប្រកួត ដែលមានភាពជក់ចិត្ត និងមានភាពស្វិតស្វាញខ្លាំងបំផុត ព្រោះអ្នកទាំង២នេះ បានវ៉ៃប្តូរសងគ្នា ៥ទឹកពេញតែម្តង។
នៅក្រោយការប្រកួតបានបញ្ចប់ អ្នកគាំទ្រផ្ទាល់ ហាក់មានការគាំទ្រ ទៅលើ ធន់ អៀនឡៃ ច្រើនជាង ព្រោះគេជាអ្នកចូលវ៉ៃ ដែលផ្តើមឱ្យមានការប្រកួតដ៏កក្រើកកើតឡើង ហើយផ្លែកែងរបស់គេ បានធ្វើឱ្យក្តោងច្រមុះ អេលីត ចំរើន បែក និងហូរឈាម តាំងពីទឹកទី២។ តែទោះបីជាយ៉ាងណា ចំរើន បានស៊ូ និងវ៉ៃប្តូរ សម្រាប់ការប្រកួត៣ទឹកចុងក្រោយជាមួយ ធន់ អៀនឡៃ រហូតទទួលបានជោគជ័យ ដោយចៅក្រម បានសម្រេចឱ្យឈ្នះ ធន់ អៀនឡៃ ដោយពិន្ទុមិនឯកច្ឆន្ទ ៤-១។
ប៉ុន្តែសម្រាប់ស្ថានភាពជាក់ស្តែង នៅក្រោយការប្រកួត គឺ អេលីត ចំរើន ទ្រមខ្លួនខ្លាំង ដោយផ្ទៃមុខរបស់គេ មានស្នាមបែក និងហើម គួរឱ្យអាណិត ពិសេសរបួសបែក នៅលើក្តោងច្រមុំរបស់គេ ចំណែក ធន់ អៀនឡៃ មិនបានបង្ហាញការទ្រន់ទ្រោម ទៅលើផ្នែកណាមួយនោះទេ។
យ៉ាងណាក៏ដោយ អេលីត ចំរើន បាននិយាយថា៖ «ថ្ងៃនេះ ខ្ញុំបានប្រឹងប្រែងប្រកួតអស់ពីសមត្ថភាព និងអស់ពីកម្លាំងកាយចិត្តហើយ គឺធ្វើម៉េចឱ្យតែបាន៣ពិន្ទុបន្ថែមលើកនេះ ហើយតាមរយៈការឈ្នះ២ប្រកួតជាប់ៗគ្នានេះ ធ្វើឱ្យខ្ញុំ កាន់តែមានទឹកចិត្តប្រកួតប្រជែង ដណ្តើមយកពានមាស រដូវកាលទី២នេះ ព្រោះខ្ញុំបានធ្លាក់ការប្រកួតរដូវកាលទី១ ម្តងហើយ»។
ចំណែក ធន់ អៀនឡៃ ដែលមានប្រៀបខ្លាំង សម្រាប់ការប្រកួត នៅ២ទឹកដំបូងនោះ បាននិយាយក្រោយការប្រកួតថា៖ «គាត់ (អេលីត ចំរើន) មិនបានប្តូរយុទ្ធសាស្រ្តប្រកួតនោះទេ ដោយគាត់នៅតែឈរចាំទាត់ធម្មតា ដូចទឹកទី១ និងទឹកទី២ ដែរ គ្រាន់តែយើងមានការធ្លាក់កម្លាំងបន្តិច ទើបគាត់អាចវ៉ៃយើងបាន ព្រោះគាត់ជាកីឡាករថយវ៉ៃ ហើយយើងជាកីឡាករវ៉ៃបុកច្រើន អ៊ីចឹងយើងបានប្រើសុហ្វច្រើនជាងគាត់»។
នោពេលសួរថា តើមានការពេញចិត្តទៅនឹងការប្រកួតរបស់ខ្លួន លើកនេះទេ? ធន់ អៀនឡៃ បានឆ្លើយតបថា៖ «ខ្ញុំពេញចិត្តនឹងការប្រកួតរបស់ខ្ញុំ នៅថ្ងៃនេះ ដោយសារឃើញបងប្អូនគាំទ្រច្រើន អ៊ីចឹងទោះលទ្ធផលយ៉ាងណា ក៏ខ្ញុំពេញចិត្ត នឹងទទួលយកដែរ»។
សម្រាប់ការប្រកួត កាលពីថ្ងៃអាទិត្យនោះដែរ ពុទ្ធ សំបូរ បានផ្តួល រឿម វណ្ណៈ នៅក្នុងទឹកទី២ ដើម្បីឈ្នះ៣ពិន្ទុបន្ថែម បន្ទាប់ពីរូបគេ បានចាញ់ ធន់ អៀនឡៃ នៅថ្ងៃបើកឆាក ហេតុនេះតាមរយៈការប្រកួត២លើកដូចគ្នានេះ អេលីត ចំរើន កំពុងឈរនៅលេខ១ ប្រចាំពូលAនេះ ដោយមាន៦ពិន្ទុពេញ និងឱកាសស្ទើរ១០០ភាគរយទៅហើយ សម្រាប់ការបានឡើងទៅវគ្គពាក់កណ្តាលផ្តាច់ព្រ័ត្រ រីឯ ធន់ អៀនឡៃ និង ពុទ្ធ សំបូរ មាន៤ពិន្ទុស្មើគ្នា តែ រឿម វណ្ណៈ ដែលមានត្រឹម២ពិន្ទុ ជាមួយការចាញ់សន្លប់ទាំង២លើកនោះ បានធ្លាក់ចេញពីការប្រកួតនេះ ដោយស្វ័យប្រវត្តិហើយ៕