ក្លិបបាល់ទាត់ ដែលមានមូលដ្ឋាននៅខេត្តសៀមរាប អង្គរថាយហ្គឺរ បានសម្រេចចែកផ្លូវជាមួយកីឡាករចំណូលថ្មីរបស់ជប៉ុនពាក់លេខ៨ Naoki Maeda ជាផ្លូវការហើយ ហើយការសម្រេចបញ្ចប់កុងត្រានេះ បានកើតមានឡើង ក្រោមការព្រមព្រៀងពីភាគីទាំងសងខាង ដែលមានសុពលភាព ចាប់ពីរដូវកាលឆ្នាំ២០២២នេះ។
តាមរយៈការចែកផ្លូវគ្នានេះ បានបញ្ជាក់ថា កីឡាករជប៉ុន Naoki Maeda នៅមិនទាន់បានចូលការប្រកួតផ្លូវការឱ្យក្រុមអង្គរថាយហ្គឺរ នៅក្នុងលីគកំពូលកម្ពុជា រដូវកាលថ្មី ឆ្នាំ២០២២នេះ នៅឡើយទេ គឺបានត្រៀមចូលរួមប្រកួតមិត្តភាព មុនបើករដូវកាល ហើយការជួបគ្រោះ មានរបួសជង្គង់ធ្ងន់ធ្ងរ។
តាមការប្រកាសរបស់ក្លិបអង្គរថាយហ្គឺរ នៅព្រឹកថ្ងៃពុធនេះ បានឱ្យដឹងថា Naoki បានចូលរួមជាមួយអង្គរថាយហ្គឺរ កាលពីខែ មករា ឆ្នាំ ២០២២ នេះ និងបានហ្វឹកហាត់ជាមួយក្រុមជាច្រើនសប្ដាហ៍ និងបានរួមចំណែកក្នុងការប្រកួតមិត្តភាពនានា ជាច្រើនកាលពីពេលកន្លងទៅផងដែរ ប៉ុន្តែជាអកុសល ការប្រកួទល់នឹងក្រុមបឹងកេត នៅក្នុងពានរង្វាន់មិត្តភាពមុនបើករដូវកាល Cambodia Airways Cup 2022 កាលពីថ្ងៃទី ១៦ ខែកុម្ភះ កីឡាករវ័យ ២៥ រូបនេះបានរងរបួសផ្នែកជង្គង់ធ្ងន់ធ្ងរ និងបានបញ្ជូនទៅពិនិត្យនៅមន្ទីរពេទ្យភ្លាមៗ ក្រោយចប់ការប្រកួត ហើយថ្មីៗនេះ Naoki ក៏ទទួលបាន ការព្យាបាល នៅប្រទេសជប៉ុនផងដែរ។
សេចក្តីប្រកាសដដែលនេះ បានបន្ថែមថា៖ «នៅដើមខែមេសានេះ ក្លិបអង្គរថាយហ្គឺរ និងកីឡាករ Naoki Maeda បានសម្រេចព្រមព្រៀងគ្នាបញ្ចប់កុងត្រាជាផ្លូវការ ដែលនេះនឹងក្លាយជាដំណឹងដ៏សោកសៅមួយ សម្រាប់ពួកយើង ក៏ដូចជាអ្នកគាំទ្រជាច្រើន ដែលចង់ឃើញនិងទន្ទឹងរង់ចាំវត្តមានរបស់គេ នៅលើទីលាន ក្នុងការប្រកួតផ្លូវការ ជាមួយក្រុម»៕
