បរទេស៖ លោក Julian Nagelsmann គ្រូបង្វឹកនៃក្រុម Bayern Munich បាននិយាយថា ក្រុមរបស់លោក «សម» នឹងចាញ់ហើយ ក្រោយពីការរងបរាជ័យក្នុងលទ្ធផល ១-០ នៅលើទឹកដីក្រុម Villarreal ក្នុងការប្រកួតជើងទី១នៃក្របខ័ណ្ឌ Champions League វគ្គ៨ក្រុមចុងក្រោយ កាលពីថ្ងៃពុធ។
ខ្សែបម្រើស្លាប Arnaut Danjuma បានស៊ុតបាល់កាត់សេចក្តីតែ១គ្រាប់ក្នុងការប្រកួត ហើយក្រុម Bayern ពិតជាមានសំណាងណាស់ដែលពួកគេនឹងត្រូវវិលទៅកាន់ប្រទេសអាល្លឺម៉ង់វិញ ដោយមិនរបូតគ្រាប់បាល់ឲ្យច្រើនជាងនេះ ក្រោយពីខ្សែប្រយុទ្ធ Gerard Moreno របស់ Villarreal បានបង្កើតឱកាសល្អៗចំនួន២លើក។ លោក Nagelsmann បានប្រាប់សារព័ត៌មាន៖ DAZN ថា៖ «យើងសមនឹងទទួលបរាជ័យហើយ។ យើងលេងមិនល្អឡើយ។ ក្នុងតង់ទី១ យើងមិនមានថាមពលគ្រប់គ្រាន់ឡើយ យើងមិនបានបង្កើតឱកាសច្រើនសម្រាប់ខ្លួនយើងឡើយ ហើយយើងបោះបង់ការគ្រប់គ្រង់បាល់»។ Moreno បានស៊ុតបាល់ប៉ះនឹងបង្គោលទី ហើយបន្ទាប់មក បានស៊ុតបាល់កោងពីចម្ងាយខុសទីតែបន្តិចប៉ុណ្ណោះ ក្រោយពីអ្នកចាំទី Manuel Neuer របស់ Bayern បានព្យាយាមសង្គ្រោះបាល់ខុស ក្រោយពីបាល់រត់ខុសទីទៅហើយនោះ។
លោក Nagelsmann បានបន្ថែមទៀតថា៖ «យើងពិតជាមានសំណាងណាស់ដែលយើងមិនរបូតគ្រាប់បាល់ ដោយសារតែហុសនេះ»។ ការរងបរាជ័យនេះ បានបញ្ចប់កំណត់ត្រានៃការមិនស្គាល់ចាញ់សោះត្រឹម២២លើ ពីការប្រកួតក្រៅដីក្នុងក្របខ័ណ្ឌ Champions League៕
ប្រភពព័ត៌មាន៖ Channel News Asia