MV បទចម្រៀង «អ្នកចម្បាំង» ដែលបានផលិតឡើង ដើម្បីបង្ហាញពីអត្ថន័យដ៏ជ្រាលជ្រៅ និងគុណតម្លៃដ៏អស្ចារ្យនៃគុនល្បុក្កតោខ្មែរនោះ បាននឹងកំពុងទទួលបានការគាំទ្រខ្លាំងពីមហាជន បន្ទាប់ពីបទនេះ បានដាក់សម្ពោធ និងបង្ហាញជាផ្លូវការ កាលពីថ្ងៃសៅរ៍ កន្លងមកនេះ។
ជាមួយការផលិតដ៏ល្អឯកនេះ បទចម្រៀង «អ្នកចម្បាំង» សហព័ន្ធកីឡាគុនល្បុក្កតោ និងផលិតកម្មរាម បានជ្រើសរើសយកទីតាំងសំខាន់ៗ នៅក្នុងប្រទេសកម្ពុជា ជាពិសេសតំបន់អង្គរ សម្រាប់ជាទីកន្លែងថត និងផលិត MV នៃបទចម្រៀងនេះ ដើម្បីឱ្យស័ក្តិសម ទៅនឹងស្ថានភាពពិតនៃគុនល្បុក្កតោ ដែលកាលនោះ ត្រូវបានប្រើប្រាស់ជាក្បាច់គុន សម្រាប់ធ្វើសឹងសង្រ្គោះ នៅក្នុងជួរកងទ័ព នៃសម័យអង្គរ ដ៏រុងរឿងរបស់កម្ពុជា។
លោក អ៊ួ តារា អគ្គលេខាធិការរងសហព័ន្ធកីឡាគុនល្បុក្កតោកម្ពុជា និងជាអ្នកដឹកនាំផលិត បានប្រាប់ថា MV បទ «អ្នកចម្បាំង»នេះ បានផលិតអំឡុងខែ៨ ឬ ខែ៩ ហើយដល់ខែ១១ ខាងផលិតកម្មរាម ក៏ចាប់ផ្ដើមបំផុសឱ្យមានការផលិត MV ឡើង ហើយយើងក៏បានផលិតចប់ នៅចុងឆ្នាំ២០២១ ប៉ុន្តែខាងផលិតកម្ម គេបានកំណត់ថា ត្រូវរង់ចាំពេលវេលាសមស្របណាមួយ ទើបសម្រេចបញ្ចេញ MV ឡើង ហើយយើងឃើញថា ជិតចូលឆ្នាំហាក់សមស្របទើបយើងបញ្ចេញ នៅពេលនេះតែម្ដង។
MV នៃបទចម្រៀង «អ្នកចម្បាំង» នេះ នឹងត្រូវប្រគល់ជូន ទៅគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០៣២ (CAMSOC) ដើម្បីទុកប្រើប្រាស់ជាផ្លូវការ ជាលើកដំបូង នៅពេលកម្ពុជា ធ្វើជាម្ចាស់ផ្ទះស៊ីហ្គេម ឆ្នាំ២០២៣ ជាប្រវត្តិសាស្រ្ត ផងដែរ ហើយផ្ទាំងទស្សនីយភាព នៅក្នុង MV នេះ ពិតជាមានភាពអងស្ចារ្យ ជាមួយការសម្តែងរបស់់ក្រុមគុនល្បុក្កតោកម្ពុជា ដ៏រស់រវ៉ើក។
លោក អ៊ួ តារា បានបន្ថែមថា៖ «ដោយមានការសហការ និងជួយជ្រោមជ្រែងយ៉ាងយកចិត្តទុកដាក់ពី គណៈកម្មាធិការជាតិរៀបចំស៊ីហ្គេម ឆ្នាំ២០២៣ និងអាជ្ញាធរជាតិ អប្សរា បានសម្រួលដល់ការចុះថត ដោយយើងបានជ្រើសរើសយកទីតាំង ដែលមានទំនាក់ទំនងជាមួយក្បាច់គុន សិល្បៈកងទ័ព សម័យបុរាណហ្នឹង គឺយើងដាក់បញ្ចូល នៅក្នុងផ្ទាំងទស្សនីយភាព MV ទាំងអស់ ដែលទីតាំងនៃការចុះថតមាននៅក្នុង និងក្រៅប្រាសាទអង្គរវត្ត ប្រាសាទបាយ័ន ប្រាសាទភិមានអាកាស លានជល់ដំរី ទីតាំងទេសចរណ៍យើង ទៅដល់លើភ្នំគូលែន និងប្រាសាទទន្លេបាទី»។
អគ្គលេខាធិការរងសហព័ន្ធកីឡាគុនល្បុក្កតោកម្ពុជារូបនេះ បានបន្ថែមទៀតថា៖ «បទអ្នកចម្បាំង គឺបានបញ្ចូលគ្នារវាងសិល្បៈសម័យ និងបុរាណ ហើយបានលេចជាទស្សនីយភាពថ្មីមួយ ដែលមិនធ្លាប់មានពីមុនមក ដោយមានជាទម្រង់ស្នៀតគុនល្បុក្កតោ និងទម្រង់យុទ្ធវិធីទ័ពសម័យអង្គរ និងខ្លឹមសារចម្រៀង ឧទ្ទិសស្នាដៃដល់បុព្វបុរសទំនៀមទម្លាប់ ប្រពៃណីអ្នកហាត់គុនជំនឿសាសនា និងការជំរុញស្មារតីដល់យុវជនឱ្យមានស្មារតីជាអ្នកប្រយុទ្ធ ក្នុងការថែរក្សាមរតកដ៏វិសេសវិសាលមួយនេះ»។
ជាមួយគ្នានេះ បទចម្រៀង «អ្នកចម្បាំង» បានបង្ហាញពីអត្ថន័យដ៏ជ្រាលជ្រៅ និងគុណតម្លៃរបស់ល្បុក្កតោខ្មែរ ដោយបានបង្កប់នៅប្រវត្តិដ៏យូរលង់ ដែលដូនតា បានបន្សល់ទុកឱ្យមកកូនចៅខ្មែរជំនាន់ក្រោយ ព្រោះនេះជាទ្រព្យ ដែលមានតម្លៃ មិនអាចកាត់ថ្លៃបាន ហើយកម្ពុជា ក៏បាននិងកំពុងខ្នះខ្នែង បញ្ជូនសំណុំឯកសារចុះឈ្មោះ «គុនល្បុក្កតោ» ទៅស្ថាប័នបេតិកភណ្ឌពិភពលោករបស់អង្គការយូណេស្កូ ដើម្បីដាក់ក្បាច់គុនបុរាណខ្មែរមួយនេះ ចូលក្នុងបញ្ជីបេតិកភណ្ឌអរូបីរបស់មនុស្សជាតិ ផងដែរ។
លោក សេង ចំណាន អគ្គនាយកផលិតកម្មរាម បានប្រាប់ថា៖ «ការផលិតបទចម្រៀងនេះឡើង គឺកើតចេញពីទឹកចិត្តភក្តីភាព សម្រាប់គុនល្បុក្កតោ ដែលជាស្នាដៃបង្កើតដោយបុព្វបុរសខ្មែរ ដូចនេះការផលិត ក៏ត្រូវតែយកចិត្តទុកដាក់បំផុត ដើម្បីឱ្យសមជាស្នាដៃរបស់កូនខ្មែរ។ បទអ្នកចម្បាំង ផលិតឡើង ក្នុងគោលបំណង លើកតម្កើង ផ្សព្វផ្សាយ និងបង្ហាញទៅកាន់អន្តរជាតិ អំពីសក្កានុពលនៃគុនល្បុក្កតោរបស់ខ្មែរ»៕
អ្នកចម្បាំង
