សហព័ន្ធកីឡាបាល់ទាត់កម្ពុជា បានបញ្ចេញបញ្ជីឈ្មោះកីឡាការិនីទាំង៣៥នាក់ ដែលបានជាប់នៅក្នុងបញ្ជីរាយនាមបឋមកីឡាការិនីជម្រើសជាតិកម្ពុជា សម្រាប់ត្រៀមការប្រកួតស៊ីហ្គេម លើកទី៣១ នៅក្នុងខែឧសភា ឆ្នាំ២០២២ នៅប្រទេសវៀតណាម ជាផ្លូវការហើយ។
តាមបញ្ជីរាយនាមបឋមកីឡាការិនីជម្រើសជាតិកម្ពុជា ដែលសហព័ន្ធ ទើបបានបង្ហាញ កាលពីព្រឹកថ្ងៃពុធនេះ គឺកីឡាការិនីរបស់ក្រុមម្ចាស់ជើងឯកលីគនារី ភ្នំពេញក្រោន បានជាប់ច្រើនជាងគេ ដោយមានរហូតដល់១៣នាក់ ហើយបន្ទាប់មក គឺក្រុមព្រះខ័នរាជស្វាយរៀង ដែលមានចំនួន៨នាក់។
ចំណែកកីឡាការីនីចំនួន១៤នាក់ទៀត គឺជាកីឡាការិនីរបស់ក្រុមជើងឯករង ណាហ្គាវើលដ៍កំពង់ស្ពឺ ដែលមានចំនួន៧នាក់ ចំណែកក្រុមសៀមរាប មានចំនួន៥នាក់ ហើយ២នាក់ទៀត ជាកីឡាការិនីរបស់ក្រុមបឹងកេត។ តែទោះបីជាយ៉ាងណា បេក្ខភាពទាំង៣៥នាក់នេះ នឹងត្រូវតេស្តជម្រុះ ចោលខ្លះ នៅមុនការចេញទៅប្រកួតស៊ីហ្គេម នៅប្រទេសវៀតណាម។
ជាមួយគ្នានេះ តាមរយៈការចាប់ឆ្នោតវិញ្ញាសាបាល់ទាត់នារី ដែលត្រូវបានធ្វើ កាលពីថ្ងៃពុធទី៦ ខែមេសា កន្លងមកនេះ ក្រុមនារីកម្ពុជា បានឈរនៅពូលA ដោយក្នុងនោះ កម្ពុជា ត្រូវប្រកួតបើកឆាកជាមួយក្រុមនារី ហ្វីលីពីន នៅថ្ងៃទី៩ រួចបន្តទៅជួបក្រុមនារី ឥណ្ឌូនេស៊ី នៅថ្ងៃទី១១ និងចុងក្រោយ ត្រូវប្រឈមជាមួយក្រុមម្ចាស់ផ្ទះវៀតណាម នៅថ្ងៃទី១៤ ខែឧសភា។ ចំណែកពូលB មានថៃ មីយ៉ាន់ម៉ា ឡាវ និងក្រុមនារី សិង្ហបុរី៕