ក្រុមបាល់បោះជម្រើសជាតិកម្ពុជា ដែលកំពុងប្រកួតប្រជែងពង្រឹងសមត្ថភាព នៅបាទី ប្រទេសឥណ្ឌូនេស៊ី នោះ បានបង្ហាញសញ្ញាល្អប៉ុន្មានឡើយ ខណៈពួកគេ រកមិនឃើញការឈ្នះសោះ ទៅលើការប្រកួតប្រជែងទម្រង់ ៣x៣ នៃពានរង្វាន់ ABL Pre-SEA Games Challenge 2022 ឬ ABL ៣x៣ International Champions Cup 2022 នោះ។ ផ្ទុយពីនេះក្រុមបុរសឥណ្ឌូនេស៊ី និងនារីរបស់វៀតណាម សុទ្ធតែបានឈ្នះតំណែងជើងឯករៀងៗខ្លួន សម្រាប់ការប្រកួតនេះ។
តាមរយៈការប្រកួតលើទម្រង់ ៣x៣ នៃពានរង្វាន់ ABL Pre-SEA Games Challenge 2022 នេះ ក្រុមបាល់បោះជម្រើសជាតិកម្ពុជា បានចាញ់គ្រប់ការប្រកួតទាំងអស់ ដោយក្នុងនោះពួកគេ បានចាញ់ក្រុមម្ចាស់ផ្ទះ Bali United ជាមួយពិន្ទុ ១៧-១២ សម្រាប់ការប្រកួតបើកឆាក រួចបន្តចាញ់ក្រុម Platinum Karaoke របស់ហ្វីលីពីន ២១-២ ហើយចុងក្រោយ ពួកគេបានចាញ់ក្រុម Sniperx របស់ប្រទេសថៃ ក្នុងលទ្ធផល ១៩-១០។
ជាមួយការចាញ់ទាំង៣ប្រកួតជាប់ៗគ្នា និងបានធ្លាក់ពីការប្រកួតត្រឹមវគ្គជម្រុះនេះ បានបង្ហាញឱ្យឃើញថា សម្រាប់ការប្រកួតទម្រង់ ៣x៣ នេះ ក្រុមបាល់បោះកម្ពុជា នៅមានកម្រិតលេង ទាបជាងគេ ហើយវាក៏ជាក្តីបារម្ភផងដែរ សម្រាប់ការត្រៀមខ្លួន ទៅប្រកួតស៊ីហ្គេម នៅប្រទេសវៀតណាម ក្នុងខែឧសភា ឆ្នាំ២០២២នេះ។
ផ្ទុយពីនេះ ក្រុមម្ចាស់ផ្ទះ INA PATRIOTS A របស់ឥណ្ឌូនេស៊ី បានក្លាយជាម្ចាស់ជើងឯក ក្នុងការប្រកួតពានរង្វាន់ ABL 3×3 International Champions Cup 2022 នេះ បន្ទាប់ពីពួកគេ បានយកឈ្នះក្រុម MABA របស់ម៉ាឡេស៊ី នៅវគ្គផ្តាច់ព្រ័ត្រ ជាមួយលទ្ធផល ២១-១៥ ចំណែកក្រុម PLATINUM KARAOKE បានយកឈ្នះក្រុម VN RED & GOLD ១៥-៨ ដើម្បីទទួលបានលេខ៣។
ដោយឡែក សម្រាប់ការប្រកួតផ្នែកនារី លើទម្រង់ ៣x៣ នេះ ក្រុមនារីរបស់វៀតណាម RED & GOLD បានកត់ត្រានូវជ័យជម្នះយ៉ាងរំភើបលើក្រុម LOUVRE ANGELS ក្នុងលទ្ធផល ១៤-៧ នៅវគ្គផ្តាច់ព្រ័ត្រ ដើម្បីក្លាយជាម្ចាស់ជើងឯក ចំណែកក្រុម Team ELITE ទទួលបានលេខ៣ ក្នុងពានរង្វាន់ ABL 3×3 International Champions Cup នេះ បន្ទាប់ពីបានយកឈ្នះក្រុម DELHI 3BL ដោយលទ្ធផល ១៧-៦ នោះ។
យ៉ាងណាក៏ដោយ ក្រុមបាល់បោះជម្រើសជាតិកម្ពុជា នៅមិនទាន់បានបញ្ចប់បេសកកម្ម សម្រាប់ការចេញទៅប្រកួត នៅឥណ្ឌូនេស៊ីនេះ នៅឡើយទេ ដោយពួកគេ នឹងចាប់ដំណើរការប្រកួតលើទម្រង់លេខ ៥x៥ វិញម្តង ដោយនៅថ្ងៃអង្គារនេះ ដោយពួកគេ នឹងត្រូវជួបក្រុម BBM CLS Knight នៅល្ងាចម៉ោង៥ (ម៉ោងនៅឥណ្ឌូនេស៊ី) ថ្ងៃអង្គារនេះ សម្រាប់ការប្រកួតបើកឆាកប្រចាំពូលA៕
