ការប្រកួតដណ្តើមខ្សែក្រវាត់ពិភពលោក International Professional Combat Council (IPCC) KUN KHMER ដំបូងបង្អស់ នៅកម្ពុជា ក្នុងព្រឹត្តិការណ៍ «WURKZ ប្រដាល់គុនខ្មែរប្រចាំប្រទេស» របស់សង្វៀនថោន ដែលមានប្រាក់រង្វាន់រហូតដល់១២០លានរៀល នោះ នឹងចាប់ដំណើរការប្រកួតជាផ្លូវការ នៅថ្ងៃសៅរ៍ ចុងសប្តាហ៍នេះ។
កីឡាករលំដាប់ខ្លាំងចំនួន១២នាក់ ដែលទទួលបានជ័យជម្នះ នៅក្នុងការប្រកួតជម្រុះ នៅសង្វៀនថោន កាលពីថ្ងៃទី១២ ខែមីនា កន្លងមកនេះ ត្រូវបានចាប់ពូលរួចហើយ នៅក្នុងសន្និសីទកាសែត កាលពីថ្ងៃទី២ ខែមេសា ហើយជាមួយគ្នានេះ ពួកគេ សុទ្ធតែបានបង្ហាញឆន្ទៈមុតមាំ ក្នុងការប្រជែងយកខ្សែក្រវាត់ពិភពលោក ទម្ងន់៦៥គីឡូក្រាមមួយនេះ។
តាមរយៈការចាប់ឆ្នោត កាលពីថ្ងៃទី២ ខែមេសា នោះ បានបង្ហាញថា កីឡាករ ចាន់ ប៊ុនហឿន, កន ចន្ថា, អេលីត សុខហ៊ុច, ផល សោភ័ណ្ឌ, ខុន បូឡា និង សោម វិឆ័យ បានឈរនៅពូលA ជាមួយគ្នា ខណៈពូលB មាន ម៉ន ព្រហ្មម៉ាញ, ធន់ ចាន់តាក់, ឡុង បេនលឿន, រិន សារ័ត្ន, សូត្រ ប៊ុនធី និង សោម ពិសិដ្ឋ។
សម្រាប់ការប្រកួតដណ្តើមខ្សែក្រវាត់ពិភពលោក លំដាប់ប្រចាំប្រទេសនេះ គ្រោងនឹងធ្វើការប្រកួតជម្រុះតាមពូលទាំង២ នៅតាមខេត្ត-រាជធានីចំនួន១២ ដោយចាប់ផ្តើមពីខេត្តកំពង់ស្ពឺ នៅថ្ងៃទី២៣ ខែមេសានេះ រួចបន្តទៅខេត្តកោះកុង ខេត្តពោធិ៍សាត់ ខេត្តបាត់ដំបង បន្ទាយមានជ័យ សៀមរាប កំពង់ធំ កំពង់ចាម ស្វាយរៀង ព្រៃវែង ក្រុងតាខ្មៅខេត្តកណ្តាល ហើយការប្រកួតផ្តាច់ព្រ័ត្រ នឹងត្រូវធ្វើនៅភ្នំពេញ។
ទាក់ទងការប្រកួតនេះ លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរ បានថ្លែង នៅក្នុងសន្និសីទកាសែត នោះថា៖ «កម្មវិធី WURKZ ប្រដាល់គុនខ្មែរប្រចាំប្រទេសនេះ ជាកម្មវិធីថ្មីមួយ និងធំបំផុត ប្រចាំឆ្នាំ២០២២ ហើយកម្មវិធីនេះ នឹងជួយពង្រឹងសមត្ថភាព និងការហ្វឹកហាត់ ដល់កីឡាករប្រដាល់គុនខ្មែរ សម្រាប់ត្រៀមចូលរួមការប្រកួត ក្នុងព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ ដែលព្រះរាជណាចក្រកម្ពុជា នឹងធ្វើជាម្ចាស់ផ្ទះ ព្រមទាំងលើកមុខមាត់វិស័យគុនខ្មែរផងដែរ»។
ជាមួយគ្នានោះ លោក គឹម ស្រ៊ុនកុសល តំណាងស្ថាប័ន IPCC ពិភពលោក ប្រចាំប្រទេសកម្ពុជា និងជាទីប្រឹកក្សាក្រុមហ៊ុនថោនគ្រុប បាននិយាយថា៖ «គុនខ្មែរ ត្រូវបានស្វាគមន៍ចូលជាសមាជិកគ្រួសារស្ថាប័នប្រដាល់អន្តរជាតិ IPCC។ កិច្ចខិតខំប្រឹងប្រែង នៃពិភពប្រដាល់គុនខ្មែរនេះ បានធ្វើឱ្យពិភពលោករំជើបរំជួល ទទួលស្គាល់ពីភាពរស់រវើក នៃក្បាច់គុនខ្មែរយ៉ាងសម្បូរបែប ហើយនេះជាមោទនភាពជាតិខ្មែរជាខ្លាំង ដោយជោគជ័យនេះ បានកើតចេញពីស្មារតីខ្មែរ ដែលរួបរួមសាមគ្គីគ្នា»។
ជាមួយគ្នានេះ លោក គឹម ស្រ៊ុនកុសល បានឱ្យដឹងទៀតថា ការប្រកួតជម្រុះដណ្តើមខ្សែក្រវាត់ពិភពលោក IPCC KUN KHMER នៅតាមខេត្ត-រាជធានីនេះ នឹងត្រូវធ្វើឡើង រៀងរាល់សប្តាហ៍ ដោយក្នុង១សប្តាហ៍ មានការប្រកួតជម្រុះគូខ្សែក្រវាត់ចំនួន៣គូ ព្រមទាំងការប្រកួតម៉ារ៉ាតុងលក្ខណៈអន្តរជាតិ ហើយបេក្ខភាពកីឡាករបរទេស ទាំង២នាក់ ដែលត្រូវប្រកួតម៉ារ៉ាតុង នៅថ្ងៃបើកឆាក ជាមួយកីឡាករលំដាប់កំពូលរបស់កម្ពុជា នាថ្ងៃសៅរ៍ ចុងសប្តាហ៍នេះ ត្រូវបានលោក ស្រ៊ុនកុសល បង្ហើបថា ជាលំដាប់កីឡាករជើងខ្លាំង ដែលមានសមត្ថភាពខ្ពស់ និងសុទ្ធតែមានឈ្មោះបោះសំឡេង។
គួរបញ្ជាក់ថា សម្រាប់ការប្រកួតដណ្តើមខ្សែក្រវាត់ពិភពលោក IPCC KUN KHMER នេះ ម្ចាស់ខ្សែក្រវាត់ នឹងទទួលបានប្រាក់រង្វាន់ចំនួន៤៨លានរៀល ជើងឯករង បាន ២៤លានរៀល កីឡាករលេខ ៣ និងលេខ ៤ នឹងទទួលបានទឹកប្រាក់ចំនួន៨លានរៀល ចំណែកកីឡាករ៨នាក់ផ្សេងទៀត ដែលធ្លាក់ នៅក្នុងវគ្គជម្រុះ នឹងទទួលបានទឹកប្រាក់រង្វាន់លើកទឹកចិត្ត ចំនួន៤ លានរៀលដូចគ្នា៕
