ខ្សែការពារដ៏ឆ្នើម ទេស សម្បត្តិ បានដឹងរួចទៅហើយថា រូបគេ នឹងគ្មានឱកាស បានចូលរួមជួយក្រុមជម្រើសជាតិកម្ពុជា បាននោះទេ សម្រាប់ការប្រកួតស៊ីហ្គេម លើកទី៣១ នៅប្រទេសវៀតណាម ដែលនឹងចាប់ផ្តើម នៅខែឧសភា ខាងមុខនេះ។
ការបាត់បង់ឱកាសដ៏ធំនេះ ក៏ព្រោះតែខ្សែការពាររបស់ក្លិបវិសាខា រូបនេះ បានទទួលរងរបួសកជើង ក្នុងពេលប្រកួតជាមួយគិរីវង់សុខសែនជ័យ កាលពីសប្ដាហ៍ទី៣ ថ្ងៃទី២២ ខែមីនា ហើយគ្រូពេទ្យបានបញ្ជាក់ថា រូបគេ នឹងត្រូវសម្រាកប្រហែលជាលើស ៣សប្ដាហ៍ទៀត គ្រាដែលស៊ីហ្គេម ឆ្នាំ២០២២ នឹងមកដល់នៅអំឡុង ២សប្ដាហ៍ខាងមុខនេះ ដែលជាហេតុធ្វើឱ្យរូបគេពុំអាចជាសះស្បើយទាន់ពេលវេលាឡើយ។
កីឡាករមានដើមកំណើត នៅខេត្តកំពង់ស្ពឺ ទេស សម្បត្តិ បានប្រាប់ប្រព័ន្ធផ្សព្វផ្សាយ ក្នុងស្រុកថា៖ «ខ្ញុំពិតជាសោកស្ដាយណាស់ ព្រោះវាជាស៊ីហ្គេម ចុងក្រោយសម្រាប់ខ្ញុំផង។ គោលដៅខ្ញុំ គឺតាំងពីចប់ពានស៊ីហ្គេម លើកមុនម្ល៉េះ ហើយវាជាគោលដៅធំ សម្រាប់អាជីពរបស់ខ្ញុំដែរ»។
ខ្សែការពារកណ្តាលជាប្រធានក្រុមជម្រើសជាតិកម្ពុជា ទេស សម្បត្តិ បានបន្ថែមថា៖« «ខ្ញុំរឹតតែចង់លេងពានមួយនេះ បន្ទាប់ពីខ្ញុំបានចាញ់ ក្រុមទីម័រខាងកើត ពេលលេងក្នុងទឹកដីខ្លួនឯង។ ខ្ញុំឈឺចាប់ ចំពោះអ្នកមើលងាយប្រទេសរបស់ខ្ញុំ និងអ្នកស្អប់រូបខ្ញុំផ្ទាល់ ហើយខ្ញុំតាំងចិត្តថា នឹងធ្វើឱ្យគេស្គាល់ពីអ្វី ដែលខ្ញុំមាន និងប្ដូរការគិតរបស់ពួកគេ ប៉ុន្តែជាអកុសលដោយសាររបួស ធ្វើឱ្យខ្ញុំបាត់បង់ឱកាស»។
តែទោះបីជាយ៉ាងណា ទេស សម្បត្តិ នៅតែមានការជឿជាក់ ទៅលើមិត្តរួមក្រុមរបស់ខ្លួន ថា ពួកគេ នៅតែធ្វើបានល្អ សម្រាប់ការប្រកួតស៊ីហ្គេម នៅប្រទេសវៀតណាម លើកនេះ ហើយរូបគេបានបញ្ជាក់ថា៖«តែខ្ញុំនៅតែជឿជាក់ថា ពួកគេនឹងធ្វើបានសម្រាប់ការប្រកួតខាងមុខ សំណាងល្អអ្នកទាំងអស់គ្នា»៕
