ខ្សែការពារ ស្រាំង ទិត្យឈី បានធ្វើការប្រឆាំង ទៅនឹងសេចក្តីថ្លែងការណ៍របស់ក្លិបអង្គរថាយហ្គឺរ ហើយបានអះអាងថា អ្វីៗ ដែលបានលើកឡើង នៅក្នុងសេចក្តីថ្លែងការណ៍នេះ វាជារឿងមិនពិត ដែលផ្ទុយទៅនឹងស្ថានភាពជាក់ស្តែង នៅមុនពេលក្លិបមួយនេះ បានបញ្ចប់កុងត្រាស្ងាត់ៗជាមួយរូបគេ។
កីឡាករពាក់លេខ៣ ស្រាំង ទិត្យឈី បានបង្ហោះនៅលើហ្វេសប៊ុកផ្ទាល់ខ្លួន ដើម្បីឆ្លើយតបទៅនឹងសេចក្តីថ្លែងការណ៍របស់ក្លិបអង្គរថាយហ្គឺរ បែបនេះថា៖ «សុំមើលលិខិតព្រមានលោកប្រធានតិចមក ហើយសុំមើលការចរចារបស់លោកប្រធាននិង GM ក្លិបតិចមក។ ប្រធានដេកនៅជប៉ុន GMដេក នៅជប៉ុន និយាយរួមការងារ Online ហើយព្រមានខ្ញុំថាមិចខ្លះ?? ឆាតមកម្ដងៗសួរតែរឿងគ្រូថ្មី មិចដែរ កីឡាករមិចដែល ខ្ញុំចង់បានពាន»។
អតីតខ្សែការពារធ្លាប់លេង នៅក្លិបភ្នំពេញក្រោន និងបឹងកេត រូបនេះ ក៏បានចោទប្រកាន់ក្លិបអង្គរថាយហ្គឺរ ចង់ធ្វើស៊ីលើរូបគេ ដូចកីឡាករមួយចំនួន ដែលធ្លាប់បានចាកចេញពីក្លិបនេះកន្លងមកផងដែរ។ ទិត្យឈី បានបញ្ជាក់ថា៖ «ឯណាពាក្យថា ព្រមាន និងលិខិតព្រមានចុងក្រោយ នៅណាវិញ សុំមើលតិចមកលោកប្រធាន។ ធ្លាប់ធ្វើស៊ីកីឡាករច្រើនហើយ ចង់ធ្វើស៊ីខ្ញុំមួយទៀតមែន?»។
គួរបញ្ជាក់ថា កាលពីថ្ងៃអង្គារ ម្សិលមិញ ក្លិបអង្គរថាយហ្គឺរ បានចេញសេចក្តីថ្លែងការណ៍ ចំពោះរឿងរ៉ាវបញ្ចប់កុងត្រាជាមួយ កីឡាករ ស្រាំង ទិត្យឈី នេះ ហើយនៅក្នុងសេចក្តីថ្លែងការណ៍ ដែលមានការចុះហត្ថលេខាទទួលស្គាល់ពីប្រធានក្លិបជនជាតិជប៉ុនលោក AKIHIRO KATO នោះ ក្លិបអង្គរថាយហ្គឺរ បានបរិយាយយ៉ាងលម្អិត ចំពោះបញ្ហា ដែលបានកើតឡើង នៅមុនពេលក្លិប បានឈានទៅលើការបញ្ចប់កុងត្រាជាមួយ ស្រាំង ទិត្យឈី ដោយស្ងាត់ៗ ព្រោះចង់ទុកកិត្តិយសឱ្យកីឡាកររូបនេះ។
នៅក្នុងសេចក្តីថ្លែងការណ៍នោះ បានបង្ហាញថា ក្លិបអង្គរថាយហ្គឺរ បានធ្វើការចរចារ និងណែនាំជាច្រើនលើក រួចធ្វើការព្រមានជាចុងក្រោយ អំពីការមិនគោរពវិន័យ ក្នុងការហ្វឹកហាត់ និងឈប់សម្រាក ដោយគ្មានមូលហេតុច្បាស់លាស់របស់ ស្រាំថ ទិត្យឈី ប៉ុន្តែ ទិត្យឈី នៅតែមិនស្តាប់ និងទទួលកំហុសខ្លួនឯង ដោយបន្តធ្វើទម្លាប់បែបនេះដដែលៗ ទើបក្លិបឈានដល់ការបញ្ចប់កុងត្រាជាមួយកីឡាកររូបនេះតែម្តង។
បើទោះបីជា ស្រាំង ទិត្យឈី បានប្រតិកម្មប្រឆាំង មិនទទួលយក ទៅនឹងសេចក្តីថ្លែងការណ៍ ដែលបានប្រកាសជាសាធារណៈ កាលពីថ្ងៃអង្គារនេះ ក៏ដោយ ប៉ុន្តែខ្លឹមសារ នៅក្នុងសេចក្តីថ្លែងការណ៍នេះ បានបញ្ជាក់ច្បាស់ហើយថា ស្រាំង ទិត្យឈី នឹងមិនទទួលបានសំណងអ្វីទាំងអស់ ចំពោះការបញ្ចប់កុងត្រា ឬបណ្តាញចេញ មុនពេលកំណត់នេះ ព្រោះក្លិបអង្គរថាយហ្គឺរ បានបញ្ជាក់ថា អ្វីៗ ដែលបានធ្វើនេះ គឺស្របទៅតាមកិច្ចសន្យារវាងក្លិប និងកីឡាករ ស្រាំង ទិត្យឈី តែម្តង៕