មន្ត្រីជំនាញរបស់សហព័ន្ធខ្មែរកីឡាហែលទឹក លោក ហែម គីរី បានអះអាងថា ក្រុមជម្រើសជាតិហែលទឹកកម្ពុជា បានបង្កើនការហ្វឹកហាត់ខ្លាំង សម្រាប់ត្រៀមទៅប្រកួតស៊ីហ្គេម លើកទី៣១ នៅប្រទេសវៀតណាម នាខែឧសភា ឆ្នាំ២០២២នេះ ប៉ុន្តែក្រុមមួយនេះ នៅមិនទាន់ហ៊ានកំណត់គោលដៅ ចំពោះការប្រជែងយកឱ្យបានមេដាយ នៅក្នុងកម្រិតណាមួយនោះឡើយ។
លោក ហែម គីរី បានប្រាប់ថា សម្រាប់ការត្រៀមខ្លួនរបស់កីឡាករ កីឡាការិនីសហព័ន្ធខ្មែរកីឡាហែលទឹក គឺយើងបានបិទខ្ទប់ហ្វឹកហាត់ តាំងពីការផ្ទុះជំងឺកូវីដ ១៩ លើកទី១ ហើយក្រោយមកទៀត យើងនៅតែបន្តហ្វឹកហាត់ រហូតក្រសួងអប់រំ អនុញ្ញាតឱ្យយើងហ្វឹកហាត់បិទខ្ទប់ នៅពហុកីឡដ្ឋានជាតិមរតកតេជោ និងនៅស្តាតអូឡាំពិក។
អគ្គលេខាធិការរូបនេះ បន្ថែមថា៖ «ឥឡូវនេះ យើងបានចូលមកហ្វឹកហាត់នៅស្តាតអូឡាំពិកវិញហើយ ដោយយើងបានហ្វឹកហាត់ជាប់លាប់ ហើយយើងក៏រំពឹងខ្ពស់ថា សម្រាប់ការប្រកួតស៊ីហ្គេមនៅប្រទេសវៀតណាម លើកនេះ ដោយលទ្ធផលរបស់កីឡាករ កីឡាការិនីហែលទឹកកម្ពុជា នឹងមានការប្រែប្រួលច្រើន ប៉ុន្តែខ្ញុំសូមរំលេចទៅវិញថា បើឱ្យយើងធ្វើការវាយតម្លៃ ឬកំណត់ថា យើងនឹងអាចឈ្នះមេដាយ នៅលើកម្រិតណាមួយនោះ គឺយើងមិនទាន់អាចកំណត់បាននៅឡើយទេ ដោយសារតែសិទ្ធផលរបស់យើងនៅមានកម្រិតទាបនៅឡើយ មិនទាន់សង្ឃឹម ១០០ ភាគរយនោះទេ»។
លោកបានបន្ថែមថា៖ «យើងមិនទាន់ច្បាស់ ១០០ ភាគរយនោះទេ ក៏ប៉ុន្តែយើងសង្ឃឹមថា ការប្រកួតនឹងអាចមានការប្រែប្រួលណាមួយ ព្រោះនៅក្នុងរយៈពេលបិទខ្ទប់នេះ ពួកគេ ពិតជាមានការខិតខំ ព្រោះយើងជាអ្នកពិនិត្យ និងជាអ្នករៀបចំ តែងមានការកែសម្រួល ទៅលើការហ្វឹកហាត់របស់ពួកគាត់ គឺពីការហាត់ ១ ពេល ត្រឹម ២ ម៉ោង រហូតដល់ ១ ពេល ពី ៣ ម៉ោង ទៅ៣ម៉ោងកន្លះ»។
«សរុបទៅ ១ថ្ងៃ ក្រុមជម្រើសជាតិរបស់យើង ហាត់ចូល ៦ ម៉ោង តែចំពោះបន្ទុកហ្វឹកហាត់ ចាប់ពី ៦០០០ ម៉ែត្រ ទៅ៨០០០ ម៉ែត្រ ក្នុង ១ ពេល អ៊ីចឹងគឺខ្លាំងជាងមុនច្រើន ហើយកីឡាករក៏មានការប្រែប្រួល ទាំងទៅលើកាយសម្បទា បច្ចេកទេស និងកម្លាំងផងដែរ»។ លោក ហែម គីរី បានបញ្ជាក់បន្ថែម៕