លីគអាជីពកីឡាអេឡិចត្រូនិក MPL-KH នៅកម្ពុជា សម្រាប់វិញ្ញាសា Mobile Legends: Bang Bang បានរកឃើញក្រុមខ្លាំងទាំង៤ ដើម្បីឡើងទៅកាន់វគ្គពាក់កណ្តាលផ្តាច់ព្រ័ត្រជាផ្លូវការហើយ បន្ទាប់ពីការប្រកួតវិលជុំសន្សំពិន្ទុអស់ពេលជាច្រើនសប្តាហ៍ កន្លងមកនេះ។
សម្រាប់ការប្រកួតវិលជុំសន្សំពិន្ទុរវាងក្រុមទាំង៨ កន្លងមកនេះ វាបានក្លាយជាការប្រកួតដ៏ស្វិតស្វាញ និងរំភើបរីករាយបំផុត ដោយក្រុមខ្លាំងទាំង៨ បានជួបប្រកួតគ្នាទាំងអស់ ហើយក្រោយការប្រកួតសន្សំពិន្ទុជាច្រើនសប្តាហ៍នោះ ក្រុមខ្លាំង Impunity KH ទទួលបានពិន្ទុច្រើនជាងគេ ដើម្បីឈរនៅលើកំពូលតារា។ ជាមួយគ្នានេះ មានសមាជិកក្រុមជាច្រើន បានក្លាយជាកីឡាករឆ្នើមប្រចាំក្រុមនីមួយៗ ដោយសារពួកគេប្រកួតបានល្អឥតខ្ចោះ។
យ៉ាងណាមិញ សម្រាប់លទ្ធផល ការប្រកួតវគ្គខ្វែង ក្រុម Team MAX ទទួលបានជ័យជម្នះពីការប្រកួតដ៏ស្វិតស្វាញ ដោយលទ្ធផលបច្ចេកទេស ៣-២ លើក្រុម Logic Esports ដើម្បីបានកៅអីឡើងវគ្គពាក់កណ្តាលផ្តាច់ព្រ័ត្រ ហើយក្រុមខ្លាំង Impunity KH ក៏បានឡើងទៅវគ្គពាក់កណ្តាលផ្តាច់ព្រ័ត្រ ក្រោយបានលត់ក្រុម Infamous LG ដោយលទ្ធផលតដៃមិនរួច ៣-០។
ចំណែកក្រុម Burn X Plax ក៏បានឡើងទៅកាន់វគ្គពាក់កណ្តាលផ្តាច់ព្រ័ត្រ បន្ទាប់ពីយកឈ្នះក្រុម DG Quantum ដោយលទ្ធផល ៣-១ ខណៈក្រុមល្បីធ្លាប់សាងបានភាពល្បីល្បាញSee You Soon បានលត់ក្រុម Divinity SaGa ដោយលទ្ធផលតដៃមិនរួច ៣-០ ដើម្បីឡើងទៅកាន់វគ្គពាក់កណ្តាលផ្តាច់ព្រ័ត្រដូចគ្នា។
យ៉ាងណាមិញ សម្រាប់ការប្រកួតវគ្គពាក់កណ្តាលផ្តាច់ព្រ័ត្រ និងវគ្គផ្តាច់ព្រ័ត្រ នឹងប្រព្រឹត្តទៅនាថ្ងៃទី ២៣-២៤ ខែមេសានេះ ចាប់ពីវេលាម៉ោង១១នាទីព្រឹកទៅ នៅផ្សារទំនើបអ៊ីអនសែនសុខ រាជធានីភ្នំពេញ ហើយជាមួយគ្នា អ្នកគាំទ្រទាំងអស់ ដែលបានចូលរួមទស្សនាផ្ទាល់ក៏នឹងបានឃើញទស្សនីយភាព ដ៏សប្បាយរីករាយ ជាមួយក្រុមតារាកិត្តិយស និងក្រុមកីឡាករសំណព្វចិត្តរបស់ពួកគេផងដែរ។
គួរបញ្ជាក់ថា សម្រាប់ព្រឹត្តិការណ៍ន បានរួមគ្នាបង្កើតឡើង ដោយក្រុមហ៊ុនទូរសព្ទ Smart និងគាំទ្រ ដោយបណ្តាញទំនាក់ទំនងសង្គមTikTok និងភេសជ្ជៈ Sting ដោយរដូវកាលនេះ មានក្រុមចូលរួមសរុបជាង៤៦០ បានចុះឈ្មោះចូលរួមប្រកួតក្នុងវគ្គជម្រុះ ដែលរៀបចំឡើងដោយក្រុមហ៊ុន MOONTON Games។
សម្រាប់ការប្រកួតលីគអាជីពកីឡាអេឡិចត្រូនិក MPL-KH នេះ មានប្រាក់រង្វាន់រហូតដល់៤ម៉ឺនដុល្លារ ដោយក្នុងនោះ ក្រុមលេខ១ នឹងទទួលបាន ១៦០០០ ដុល្លារអាមេរិក ក្រុមលេខ២ បាន៨០០០ ដុល្លារអាមេរិក ក្រុមលេខ៣ បាន៥០០០ ដុល្លារអាមេរិក ក្រុមលេខ៤ បាន៣០០០ដុល្លារអាមេរិក ហើយក្រុមលេខ៥ លេខ៦ លេខ៧ និងក្រុមលេខ៨ ដែលធ្លាក់ក្នុងវគ្គជម្រុះ៨ក្រុមចុងក្រោយ កន្លងមកនេះ ទទួលបានប្រាក់រង្វាន់លើកទឹកចិត្តចំនួន ២០០០ ដុល្លារអាមេរិកដូចគ្នា៕