កីឡាករ ហេង គឹមហុង បានក្លាយជាវីរបុរស ក្នុងការជួយឱ្យក្រុមអគ្គិសនីកម្ពុជា រក្សាបាននូវកំណត់ត្រា មិនធ្លាប់ចាញ់របស់ខ្លួន ជាបន្តទៀត សម្រាប់ការប្រកួតជម្រើសជើងឯកកម្ពុជាលីគ២ ឆ្នាំ២០២២ ចំណែកក្រុមសូលទីឡូអង្គរ ក៏បានរកឃើញការឈ្នះលើកដំបូងរបស់ខ្លួនផងដែរ បន្ទាប់ពីជួបភាពជូរចត់ ចំនួន៦ប្រកួតកន្លងមកនេះ។
បើទោះបីជាគ្រូបង្គោលក្រុមអគ្គិសនីកម្ពុជា លោក ទុំ សារ៉ាយ មិនបានចាត់ទុកក្រុមព្រៃវែងអេហ្វស៊ី ថាជាក្រុមខ្លាំង ដូចកក្រុមធ្លាប់លេងនៅលីគកំពូលកម្ពុជា ជាមួយគ្នា ដូចជាក្រុមអាស៊ីអឺរ៉ុប និងក្រុមនគរបាលជាតិ ជាដើម ប៉ុន្តែតាមរយៈការប្រកួត កាលពីថ្ងៃអាទិត្យ ម្សិលមិញ ក្រុមទាំង២ បានប្រកួតគ្នា យ៉ាងស្វិតស្វាញ ព្រោះនេះជាការប្រកួតដណ្តើមគ្នាយកលេខ១។
យ៉ាងណាក៏ដោយ ការរកបានត្រឹម១គ្រាប់របស់ម្ចាស់អាវលេខ១២ ហេង គឹមហុង ដែលបានកើតមានឡើង តាំងពីតង់ទី១នោះ បានជួយឱ្យក្រុមម្ចាស់ផ្ទះ អគ្គិសនីកម្ពុជា ឈ្នះក្រុមព្រៃវែង ១-០ ទាំងលំបាក ដើម្បីបន្តឈរ នៅកំពូលតារាង នៅមាន១៩ពិន្ទុ ដាច់ពីក្រុមនគរបាលជាតិ ដែលទើបឡើងមកឈរនៅលេខ២ ចំនួន៣ពិន្ទុ ព្រោះ កាលពីម្សិលមិញនេះ នគរបាលជាតិ បានយកឈ្នះក្រុមខេត្តត្បូងឃ្មុំ ៣-១។
ផ្ទុយពីនេះ ក្រុមកោះកុងអេហ្វស៊ី មិនអាចរក្សាទីតាំងលេខ៣របស់ខ្លួនបាននោះទេ ដោយពួកគេ បានចាញ់ក្រុមអាស៊ីអឺរ៉ុប ២-១ ប៉ុន្តែក្រុមអាយអេសអាយដង្កោរសែនជ័យ បានយកឈ្នះក្រុមសាលាកីឡាបាល់ទាត់ជាតិ ៣-១ ដើម្បីបន្តឈរ នៅចំណាត់ថ្នាក់លេខ៥ ដោយមាន១៣ពិន្ទុ លើសក្រុមអាស៊ីអឺរ៉ុប ១ពិន្ទុដដែល។
យ៉ាងណាមិញ ក្រុមធ្លាប់លេងនៅលីគកំពូលកម្ពុជា សូលទីឡូអង្គរ ដែលបានចាញ់៦លើកជាប់ៗគ្នានោះ បានរកឃើញការឈ្នះ ជាលើកដំបូងរបស់ខ្លួនហើយ បន្ទាប់ពីពួកគេ បានយកឈ្នះក្រុមឈរនៅបាតតារាង ណិចស្តិបអេហ្វស៊ី ៦-០ ចំណែកក្រុមសៀមរាបអេហ្វស៊ី បានយកឈ្នះក្រុមម្ចាស់ផ្ទះ បន្ទាយមានជ័យអេហ្វស៊ី ៤-១ ដើម្បីឡើងមកឈរ នៅលេខ៩ ជា បណ្តោះអាសន្ន៕