ការប្រកួតពានរង្វាន់បាល់ទាត់ក្នុងសាលថ្នាក់ជាតិ ឆ្នាំ២០២១ បានបញ្ចប់ការប្រកួតជម្រុះតាមពូលទាំង៥ជាផ្លូវការហើយ ហើយក៏បានរកឃើញក្រុមខ្លាំងទាំង៦ ឡើងទៅកាន់ការប្រកួតដំណាក់កាលទី២ ផងដែរ ប៉ុន្តែក្រុមការពារតំណែងជើងឯក មហាហង្ស បានធ្លាក់ចេញពីការប្រកួតនេះហើយ។
តាមរយៈការប្រកួតចុងក្រោយប្រចាំពូលទាំង៥ នៅមជ្ឈមណ្ឌលកីឡាដឹប្លូស្ពតអារីណា កាលពីថ្ងៃអាទិត្យ កន្លងមកនេះ ក្រុមឪម៉ាល់អេហ្វស៊ី និង Young Gun FT សុទ្ធតែដណ្តើមបានជ័យជម្នះ ក្នុងការប្រកួតកាត់សេចក្តីចុងក្រោយនេះ ដោយក្នុងនោះ ឪម៉ាល់ បានឈ្នះក្រុម Alpha FT ៩-៣ ខណៈ Young Gun FT បានយកឈ្នះក្រុម Red Eagle ៧-៤ ហើយលទ្ធផលនេះ បានជួយឱ្យពួកគេ ទទួលបានលេខ១ នៅតាមពូលរៀងៗខ្លួន ដើម្បីឡើងទៅវគ្គបន្ត។
ចំណែកក្រុម Alpha FT និងក្រុម Red Eagle ដែលទទួលបានត្រឹមលេខ២ ដូចគ្នានោះ បានធ្លាក់ចេញពីការប្រកួតនេះ ជាមួយការឈ្នះ២ និងចាញ់១ប្រកួតដូចគ្នា ចំណែកក្រុមការពារតំណែងជើងឯក មហាហង្ស ដែលបានបញ្ចប់ការប្រកួត ដោយឈ្នះ២ និងចាញ់១ប្រកួតដែរនោះ ក៏បានធ្លាក់ចាញពីការប្រកួតនេះ ក្នុងនាមជាក្រុមលេខ២ ប្រចាំពូលB ផងដែរ ខណៈក្រុម Bees FC បានក្លាយជាក្រុមលេខ១ ប្រចាំពូលBនេះ ដើម្បីឡើងទៅវគ្គបន្ត ដោយឈ្នះទាំង៣ប្រកួត។
ផ្ទុយពីនេះ ក្រុម Tai Chi FT បានក្លាយជាក្រុមលេខ២ល្អ នឹងបានឡើងទៅបន្តផងដែរ បន្ទាប់ពីពួកគេ បានបញ្ចប់ការប្រកួតដោយឈ្នះ២ និងស្មើជាមួយក្រុមលេខ១ The Blue Warrios FC ៥-៥ ក្នុងការប្រកួតលើកទី៣ចុងក្រោយ ប្រចាំពូលD កាលពីថ្ងៃអាទិត្យ នោះ ហើយក្រុម The Blue Warrios FC បានក្លាយជាក្រុមលេខ១ប្រចាំពូលD ខណៈក្រុមខ្មែរនគរអេហ្វស៊ី ជាក្រុមលេខ១ប្រចាំពូលA ដែលត្រូវឡើងទៅវគ្គបន្តដូចគ្នា។
យ៉ាងណាមិញ សម្រាប់ការប្រកួតនៅដំណាក់កាលទី២ គឺក្រុមខ្មែរនគរអេហ្វស៊ី ក្រុម Bees FC ក្រុមឪម៉ាស់អេហ្វស៊ី ក្រុម The Blue Warrios FC ក្រុម Young Gun FT និងក្រុម Tai Chi FT ត្រូវបានកំណត់ឱ្យប្រកួតគ្នាវិលជុំ សន្សំពិន្ទុ ហើយនៅក្រោយបញ្ចប់ការប្រកួតវិលជុំ ក្រុម ដែលទទួលបានលេខ៣ និងលេខ៤ ត្រូវប្រកួតខ្វែង ដើម្បីរកក្រុមឈ្នះ ឡើងទៅជួបក្រុមលេខ២ ដែលឈរចាំ នៅវគ្គពាក់កណ្តាលផ្តាច់ព្រ័ត្រ ចំណែកក្រុមឈ្នះនៅវគ្គនេះ ត្រូវឡើងទៅប្រកួតវគ្គផ្តាច់ព្រ័ត្រ ជាមួយក្រុមលេខ១ ដែលឈរចាំ ដើម្បីដណ្តើមយកពាន៕