រាជរដ្ឋាភិបាលកម្ពុជា បានសម្រេចជាគោលការណ៍ អនុញ្ញាតឱ្យក្រសួងអប់រំ យុវជន និងកីឡា រៀបចំការប្រកួតកីឡាជាតិ លើកទី៣ ឆ្នាំ២០២២ នៅពហុកីឡដ្ឋានជាតិមរតកតេជោ ចាប់ពីថ្ងៃទី១៧ ដល់ថ្ងៃទី២៨ ខែវិច្ឆិកា ឆ្នាំ២០២២។ នេះបើយោងតាម សជណ ដែលចុះហត្ថលេខាដោយលោក អ៊ីន វីរជាតិ រដ្ឋលេខាធិការទីស្ដីការគណៈរដ្ឋមន្ដ្រី កាលពីថ្ងៃទី២៥ ខែមេសា ឆ្នាំ២០២២ ក្រោមការអនុញ្ញាតដ៏ខ្ពង់ខ្ពស់របស់ប្រមុខរាជរដ្ឋាភិបាលកម្ពុជា។
ការអនុញ្ញាតនេះ ត្រូវបានធ្វើឡើង បន្ទាប់ពីលោកបណ្ឌិតសភាចារ្យ ហង់ជួន ណារ៉ុន រដ្ឋមន្ដ្រីក្រសួងអប់រំ យុវជន និងកីឡា បានស្នើសុំគោលការណ៍ ក្នុងការរៀបចំព្រឹត្តិការណ៍កីឡាជាតិ លើកទី៣ នេះ នៅពហុកីឡដ្ឋានជាតិមរតកតេជោ ខណៈការប្រកួតកីឡាជាតិ ចំនួន២លើកកន្លងមក ក្រសួងអប់រំ បានសហការរៀបចំ ជាមួយគណៈកម្មាធិការជាតិអូឡាំពិកកម្ពុជា (NOCC)។
យ៉ាងណាមិញ យោងតាមគោលការណ៍អនុញ្ញាតនេះ ក្រសួងអប់រំ យុវជន និងកីឡា នឹងត្រូវគ្រប់គ្រង និងរៀបចំការប្រកួតកីឡាជាតិ លើកទី៣ ឆ្នាំ២០២២នេះ ដោយខ្លួនឯង ដោយមិនមានការចូលរួមពី NOCC ដូចមុនកាលរៀបចំ លើកទី១ ឆ្នាំ២០១៦ និងលើកទី២ កាលពីឆ្នាំ២០១៨ នោះទេ ខណៈការប្រកួតកីឡាជាតិ កាលឆ្នាំ២០២០ ត្រូវបានផ្អាក មិនអាចរៀបចំបាន ដោយសារមានការផ្ទុះឡើងខ្លាំង នៃជំងឺកូវីដ១៩។
គួរបញ្ជាក់ថា សម្រាប់ការប្រកួតកីឡាជាតិ នេះត្រូវបានធ្វើឡើង ដើម្បីជាបទពិសោធ ជាពិសេសពង្រឹងគុណភាពទាំងទៅលើបច្ចេកទេសនៃការរៀបចំ និងពង្រឹងសមត្ថភាពមន្រ្តីបច្ចេកទេស ដោយមានគោលដៅចម្បង ឆ្ពោះទៅទទួលរៀបចំធ្វើម្ចាស់ផ្ទះ ការប្រកួតកីឡា ស៊ីហ្គេម លើកទី៣២ ឆ្នាំ២០២៣ ជាប្រវត្តិសាស្ត្រដំបូងរបស់ព្រះរាជាណាចក្រកម្ពុជា៕