ក្រុមហ៊ុនខេមបូឌានព្រីមៀរលីគ (CPL) បានអនុញ្ញាតឱ្យទស្សនិកជន ចូលរួមទស្សនាការប្រកួតផ្ទាល់ ១០០ភាគរយវិញហើយ ដោយមិនមានការ តម្រូវឱ្យធ្វើឱ្យធ្វើតេស្តរហ័សរកមេរោគកូវីដ១៩ ទៅលើមន្រ្តី និងកីឡាករ សម្រាប់ការប្រកួត ដែលរៀបចំដោយ CPL ទៀតនោះទេ។
ដំណឹងដ៏ល្អនេះ ត្រូវបានក្រុមហ៊ុនខេមបូឌានព្រីមៀរលីគ នៃសហព័ន្ធកីឡាបាល់ទាត់កម្ពុជា ប្រកាសជាផ្លូវការ កាលពីថ្ងៃពុធ ម្សិលមិញ បន្ទាប់ពីសហព័ន្ធកីឡាបាល់ទាត់កម្ពុជា ទទួលបានការអនុញ្ញាតពីរាជរដ្ឋាភិបាលកម្ពុជា ទៅលើសំណើសុំឱ្យមានទស្សនិកជន ចូលរួមទស្សនាការប្រកួតផ្ទាល់ ១០០ភាគរយ និងតម្រូវមិនឱ្យធ្វើតេស្តរហ័សរកមេរោគកូវីដ១៩ ទៅលើមន្រ្តី និងកីឡាករ សម្រាប់ការប្រកួត ដែលរៀបចំដោយសហព័ន្ធ និង CPL នេះ។
តាមការជូនដំណឹងរបស់ CPL កាលពីថ្ងៃពុធ បានបញ្ជាក់ថា៖ «ក្រោមការដឹកនាំដ៏ឈ្លាសវៃ និងការយកចិត្តទុកដាក់ពីប្រមុខរាជរដ្ឋាភិបាល នៃព្រះរាជាណាចក្រកម្ពុជា ក្នុងការប្រយុទ្ធប្រឆាំង និងទប់ស្កាត់ការចម្លងរីករាលដាល់ នៃជំងឹកូវីដ១៩ នាពេលបច្ចុប្បន្ន មានការថមថយ គួរឱ្យកត់សម្គាល់ ហើយម្យ៉ាងទៀត ដោយមើលឃើញពីសន្ទុះទឹកចិត្តដ៏ខ្លាំងក្លារបស់អ្នកគាំទ្រ ក៏ដូចជាផ្តល់ឱកាស និងលើកទឹកចិត្តដល់ទស្សនិកជន អ្នកស្នេហាវិស័យកីឡាបាល់ទាត់ទាំងអស់ បានចូលរួមទស្សនាផ្ទាល់គ្រប់ការប្រកួត និងជំរុញវិស័យកីឡាបាល់ទាត់ឱ្យកាន់តែរីកចម្រើនថែមមួយកម្រិតទៀត ហេតុដូច្នេះ ក្រុមហ៊ុនខេមបូឌានព្រីមៀរលីគ សម្រេចអនុញ្ញាតឱ្យទស្សនិកចូលរួមទស្សនាចំនួន១០០ភាគរយ នៅតាមកីឡដ្ឋាននីមួយៗ គ្រប់ការប្រកួត ដែលរៀបចំ ដោយក្រុមហ៊ុនខេមបូឌានព្រីមៀរលីគ»។
យ៉ាងណាក៏ដោយ CPL នៅតែលើកទឹកចិត្តដល់ក្លិបបាល់ទាត់ទាំងអស់ បន្តនៅវិធានការការពារ ដោយធ្វើការវាស់កម្តៅ និងលាងសម្អាតដៃជាប្រចាំដល់មន្រ្តី កីឡាករ និងក្រុមការងារពាក់ព័ន្ធទាំងអស់ នៅពេលទៅដល់ទីលាន ទាំងមុនថ្ងៃប្រកួត និងថ្ងៃប្រកួត ដើម្បីបន្តចូលរួមទប់ស្កាត់ការចម្លងរីករាលដាលនៃជំងឺកូវីដ១៩ និងធានាបាននូវសុខសុវត្ថិភាព នៅក្នុងវិស័យកីឡាបាល់ទាត់៕
