ព្រឹត្តិការណ៍ប្រណាំងកង់ភ្នំ WURKZ MOUNTAIN BIKE SERIES រដូវកាល ២០២២ជុំទី១ ដែលត្រូវបានធ្វើឡើង នៅលើភ្នំកកេស ស្ថិតក្នុងទឹកដីខេត្តកំពត កាលពីថ្ងៃអាទិត្យ ម្សិលមិញ មានអ្នកចូលរួមយ៉ាងច្រើន ហើយតាមរយៈការប្រកួតប្រជែងគ្នា យ៉ាងស្វិតស្វាញនោះ បានធ្វើឱ្យអ្នករៀបចំ និងម្ចាស់ឧបត្ថម្ភ មានការពេញចិត្ត ព្រោះទាំងការប្រកួត និងលទ្ធផល ទទួលបានលទ្ធផលល្អ។
លោក Pierre Yves Catry ស្ថានិកកម្មវិធីប្រណាំងកង់ភ្នំ និងជាតំណាងអ្នករៀបចំកម្មវិធី FLYING BIKES2 ឱ្យដឹងថា ជុំទី១ បានទាក់ទាញកីឡាករ កីឡាការីនីជម្រើសជាតិ និងមហាជន ដែលស្រឡាញ់ការជិះកង់ទាំងក្មេង និងបុគ្គលិកក្រុមហ៊ុនជីបម៉ុង បានចូលរួមជាច្រើនសរុបរហូតដល់ទៅ៣២៨នាក់ ហើយបរិមាណដ៏ច្រើននេះ បានធ្វើការប្រណាំងក្នុងជុំទី១នេះ មានភាពស្វិតស្វាញ និងពោរពេញដោយថាមពល។
ជាមួយគ្នានេះ ទីលានប្រកួតដ៏ស្មុញ និងមានឧបសគ្គច្រើន នៅលើភ្នំកកេស ត្រូវបានអ្នកជំនាញ លោក Pierre Yves Catry ចាត់ទុកថា ជាការបន្ថែមនៅបទពិសោធថ្មី សម្រាប់អ្នកចូលរួម ជាពិសេសក្រុមជម្រើសជាតិកង់ភ្នំកម្ពុជា នៅពេលពួកគេ ចេញទៅប្រកួតស៊ីហ្គេម លើកទី៣១ នៅប្រទេសវៀតណាម ក្នុងខែឧសភានេះ។
«ទីលានប្រណាំង នៅកំពត មានស្ថានភាពផ្លូវលំបាក មានផ្លូវទួល ផ្លូវថ្ម ដែលទាមទារការប្រើប្រាស់កម្លាំងខ្លាំង និងត្រូវមានបច្ចេកទេសជំនាញជិះកង់ខ្លាំង ហើយស្ថានភាពនេះ បានធ្វើឱ្យកីឡាករ កីឡាការិនីរបស់យើង អាចស្វែងយល់គន្លឹះក្នុងការជិះកង់ភ្នំ កាន់តែប្រសើរ និងអាចពង្រឹងបទពិសោធបច្ចេកទេសរបស់ពួកគេបន្ថែមទៀត»។ លោក Pierre Yves Catry បានបញ្ជាក់បន្ថែម។
ចំណែកអ្នកស្រី គង់ កុសល នាយិកាទីផ្សារក្រុមហ៊ុន ខ្មែរ ប៊ែវើរីជីស ដែលជាអ្នកឧបត្ថម្ភ ក្នុងការប្រកួតនេះ ក៏មានភាពរីករាយ ជាមួយទិដ្ឋភាពប្រកួតប្រណាំងកង់ភ្នំ នៅជុំទី១នេះ ដូចគ្នា ដោយអ្នកស្រី បានថ្លែងថា៖ «ទីលានប្រណាំងជុំទី១ នេះស្ថិតក្នុងតំបន់ទេសចរណ៍ធម្មជាតិដ៏គួរឱ្យទាក់ទាញ ធ្វើឱ្យព្រឹត្តិការណ៍ប្រណាំងកង់ភ្នំ ទទួលបានការចាប់អារម្មណ៍ជាខ្លាំង ជាពិសេសមានពលរដ្ឋរស់ នៅក្នុងតំបន់ និងនៅតាមបណ្តាខេត្តនានា បានអញ្ជើញមកទស្សនាផ្ទាល់ភ្នែកយ៉ាងច្រើនកុះករ ដែលធ្វើឱ្យជុំទី១ មានភាពអ៊ូអរ និងសប្បាយជាខ្លាំង»។
ជាមួយគ្នានេះ អ្នកស្រី គង់ កុសល បានឱ្យដឹងទៀតថា ក្រៅពីសកម្មភាពនៃការប្រណាំងកង់យ៉ាងរស់រវើកនោះ ព្រឹត្តិការណ៍ប្រណាំងកង់ភ្នំ WURKZ MOUNTAIN BIKE SERIES ក៏មានការរៀបចំការភ្លក់ភេសជ្ជៈប៉ូវកម្លាំងវើក WURKZ និងស្រាបៀរកម្ពុជា សម្រាប់អ្នកចូលរួមដោយឥតគិតថ្លៃផងដែរ ហើយសកម្មភាពនេះ បានបន្ថែមភាពសប្បាយរីករាយកាន់តែខ្លាំងដល់អ្នកចូលរួមព្រឹត្តិការណ៍នេះ។
សម្រាប់ការប្រណាំងកង់ភ្នំ ប្រចាំឆ្នាំ២០២២ មានការប្រកួតប្រជែង នៅលើវិញ្ញាសាររហូតដល់១៤ផ្សេងគ្នា ហើយនៅរាល់ការប្រកួតនៅតាមជុំនីមួយៗ គណៈកម្មការ បានកត់ត្រាលទ្ធផលយ៉ាងត្រឹមត្រូវ ដើម្បីទុកបូកពិន្ទុបន្ថែមបន្ថែម សម្រាប់ការប្រកួតនៅជុំផ្សេងៗទៀត ជាពិសេសសម្រាប់ការប្រកួតរបស់ក្រុមជំនាញ និងក្រុមជម្រើសជាតិ ហើយក្នុងនោះ ក៏មានផ្តល់ពាន និងប្រាក់រង្វាន់ ដល់ម្ចាស់ជយលាភី នៅតាមការប្រកួតជុំនីមួយៗ ផងដែរ។
គួរបញ្ជាក់ថា ព្រឹត្តិការណ៍ប្រណាំងកង់ភ្នំ WURKZ Mountain Bike Series ឆ្នាំ២០២២នេះ មានការប្រកួត នៅលើវិញ្ញាសារចំនួន១៤ ហើយការប្រកួតរដូវកាលនេះ ត្រូវធ្វើឡើង៥ជុំ ដោយបានចាប់ផ្តើម នៅខេត្តកំពតនេះ រួចបន្តទៅធ្វើជុំទី២ នៅខេត្តកំពង់ស្ពឺ នាថ្ងៃទី ៣ ខែកក្កដា ហើយជុំទី៣ ធ្វើនៅខេត្តសៀមរាប នាថ្ងៃទី១៦ ខែតុលា រីឯជុំទី៤ ធ្វើនៅព្រែកលៀប ថ្ងៃទី២០ ខែវិច្ឆិកា ខណៈការប្រកួតផ្តាច់ព្រ័ត្រ ជុំទី៥ ត្រូវធ្វើនៅគិរីរម្យដដែល នាថ្ងៃទី ១៨ ខែធ្នូ៕
