ក្រុមជម្រើសជាតិបាល់ទាត់កម្ពុជា ទាំងផ្នែកបុរស និងនារី ព្រមទាំងក្រុមគ្រូបង្វឹក និងក្រុមការងារ បានធ្វើដំណើរ ដោយយន្តហោះពិសេស បោះពួយទៅកាន់ទីក្រុងហាណូយ ប្រទេសវៀតណាម កាលពីព្រឹកថ្ងៃពុធនេះ ដើម្បីចូលរួមការប្រកួតស៊ីហ្គេម លើកទី៣១ នៅទីនោះ ខណៈក្រុមទាំង២នេះ ត្រូវប្រកួតបើកឆាក នៅថ្ងៃទី៩ ខែឧសភា ដូចគ្នា។
យ៉ាងណាក៏ដោយ សម្រាប់ការធ្វើដំណើរ ទៅប្រកួតស៊ីហ្គេម លើកនេះ ក្រុមជម្រើសជាតិបាល់ទាត់កម្ពុជា ទាំង២ក្រុមនេះ ត្រូវមានទំនួលខុសត្រូវយ៉ាងធំ ព្រោះប្រធានសហព័ន្ធកីឡាបាល់ទាត់កម្ពុជា លោកនាយឧត្តមសេនីយ៍ សៅ សុខា បានដាក់កំហឹតឱ្យពួកគេ ត្រូវធ្វើយ៉ាងណា ដណ្តើមឱ្យបានមេដាយ និងកិត្តិយស មកជូនប្រទេសជាតិវិញ។
នៅក្នុងពិធីសំណេះសំណាល នៅមុនចេញដំណើរ កាលពីថ្ងៃចន្ទ លោក សៅ សុខា បានថ្លែងទៅកាន់ក្រុមជម្រើសជាតិទាំង២ក្រុមថា៖ «បេសកកម្ម សម្រាប់ក្រុមទាំង២ គឺត្រូវនាំយកមេដាយ និងកេរ្តិ៍ឈ្មោះ មកជូនជាតិមាតុភូមិ ព្រោះនៅពីក្រោយអ្នក មានបងប្អូនប្រជាជនកម្ពុជាយើងរាប់លាននាក់ គាំទ្រអ្នក និងចាំទស្សនាការប្រកួត ដូច្នេះវាជាទំនួលខុសត្រូវដ៏ធំ»។
លោកនាយឧត្តមសេនីយ៍ សៅ សុខា បានសង្កត់ធ្ងន់ថា៖ «ជ័យជម្នះពិតជាសំខាន់ណាស់! គ្មានជ័យជម្នះ គ្មានមេដាយ នឹងមិនមានអ្នកគាំទ្រ។ គ្មានអ្នកគាំទ្រ គឺគ្មានអ្នកឧបត្ថម្ភ ហើយពេលគ្មានអ្នកឧបត្ថម្ភនោះ បាល់ទាត់យើង នឹងមិនអាចទៅមុខបានឡើយ»។
ក្រុមបាល់ទាត់ជម្រើសជាត់បុរសកម្ពុជា ក្រោមការដឹកនាំរបស់លោក Keisuke Honda បានកំណត់យកបេក្ខភាពចុងក្រោយចំនួន២០នាក់ សម្រាប់ចេញទៅប្រកួតស៊ីហ្គេម លើកនេះ ហើយពួកគេ ឈរនៅពូលB ដោយត្រូវប្រកួតបើកឆាក ជាមួយឡាវ នៅថ្ងៃទី៩ រួចបន្តទៅជួបក្រុមសិង្ហបុរី នៅថ្ងៃទី១១ និងប៉ះក្រុមថៃ នៅថ្ងៃទី១៤ ហើយចុងក្រោយជួបក្រុមម៉ាឡេស៊ី នៅថ្ងៃទី១៦ ខែឧសភា ខណៈពូលA មានក្រុមម្ចាស់ផ្ទះវៀតណាម ឥណ្ឌូនេស៊ី មីយ៉ាន់ម៉ា ហ្វីលីពីន និងក្រុមទីម័រខាងកើត។
ចំណែកក្រុមនារីជម្រើសជាតិបាល់ទាត់កម្ពុជា ក្រោមការដឹកនាំរបស់គ្រូបង្គោល ប្រាក់ វុទ្ធី ក៏បានបញ្ជូនបេក្ខភាព២០នាក់ ទៅប្រកួតដូចគ្នា ហើយក្រុមដ៏ក្មេងខ្ចីមួយនេះ បានឈរនៅពូលA ជាមួយក្រុមម្ចាស់ផ្ទះវៀតណាម និងហ្វីលីពីន ដោយក្នុងនោះ ក្រុមនារីកម្ពុជា ត្រូវប្រកួតបើកឆាកជាមួយក្រុមហ្វីលីពីន នៅថ្ងៃទី៩ មុនទៅជួបក្រុមវៀតណាម នៅថ្ងៃទី១៤ ខែឧសភា នេះ ចំណែកពូលB មានក្រុមនារីថៃ មីយ៉ាន់ម៉ា ឡាវ និងក្រុមនារីសិង្ហបុរី៕