បុគ្គលសំខាន់ៗ នៅក្នុងវិស័យបាល់ទាត់ រួមមានថ្នាក់ដឹកនាំមកពីសហព័ន្ធកីឡាជាតិ និងអង្គការមួយចំនួន ព្រមទាំងអគ្គលេខាធិការ និងគ្រូបង្វឹក មកពីក្លិបបាល់ទាត់ កំពុងលេង នៅលីគកំពូលកម្ពុជា សុទ្ធតែបានគាំទ្រពេញទំហឹង ទៅដល់កម្មវិធីបណ្តុះបណ្តាលក្រុមបាល់ទាត់កុមារីកម្ពុជា ចាប់ពីអាយុ៦ ដល់១២ឆ្នាំ នៅកម្ពុជា របស់ Girls Onside Football Cambodia (GOFC) ដែលត្រូវបានបង្កើតឱ្យមានជាផ្លូវការ កាលពីថ្ងៃពុធ ព្រោះកម្មវិធីនេះ បានក្លាយទៅជាមូលដ្ឋានគ្រឹះយ៉ាងសំខាន់ ក្នុងការលើកកម្ពស់ ក៏ដូចជាអភិវឌ្ឍបាល់ទាត់នារី សម្រាប់អ្នកជំនាន់ក្រោយ។
នៅក្នុងសន្និសីទកាសែតប្រកាសបង្កើត GOFC នេះ លោក សំហេង បុរស រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា និងប្រធានសហព័ន្ធកីឡាអត្តពលកម្មស្ម័គ្រចិត្ត បានថ្លែងថា៖ «ការលើកស្ទួយកុមារី នៅក្នុងកីឡា គឺជាវិស័យមួយ ដែលមានភាពជិតស្និទ្ធជាមួយនឹងខ្ញុំយ៉ាងខ្លាំង ហើយខ្ញុំរីករាយ ក្នុងការមើលឃើញគំនិតផ្ដួចផ្ដើមនានា ដូចជា GO FC ដែលប្រើប្រាស់គំរូសាកល្បង ដើម្បីជំរុញទឹកចិត្តកុមារី កាន់តែច្រើនឱ្យចូលរួម នៅក្នុងវិស័យកីឡាបាល់ទាត់មួយនេះ។ ខ្ញុំលើកទឹកចិត្តឱ្យឪពុកម្ដាយ ទំាងអស់ឱ្យលើកទឹកចិត្ត និងគាំទ្រកូនស្រីរបស់ខ្លួនក្នុងការចូលរួមលេងកីឡា ដូចជាកីឡាបាល់ទាត់»។
GOFC មានបំណងសម្រេចបានលើសពីកីឡាបាល់ទាត់ តាមរយៈការលើកកម្ពស់សមភាពយេនឌ័រ និងការផ្ដល់ភាពអង់អាចក្លាហ៊ានគ្រប់ជ្រុងជ្រោយដល់កុមារី និងក៏លើកកម្ពស់អត្តសញ្ញាណសហគមន៍ តាមរយៈកីឡាបាល់ទាត់នេះផងដែរ។
ជាមួយផ្នត់គំនិតនេះ នាយកប្រចាំប្រទេសនៃអង្គការ Plan International ឈ្មោះ Gwynneth Wong បានថ្លែងថា៖ «យើងទទួលស្គាល់ថាសារសំខាន់នៃបរិយាប័ន្នកុមារីនៅក្នុងកីឡាជារួម ហេតុនេះហើយ យើងរីករាយក្នុងការធ្វើជាដៃគូបច្ចេកទេសនៃ GOFC ។ ក្រុមកីឡាបាល់ទាត់កុមារីនេះ នឹងជួយកុមារី នៅកម្ពុជា ក្នុងការរៀនបំណិននៃជីវិតយ៉ាងសំខាន់ ដូចជា ការធ្វើការងារជាក្រុម ភាពជាអ្នកដឹកនាំ ការធ្វើសេចក្ដីសម្រេចចិត្តការប្រព្រឹត្ត ដោយស្មើភាពគ្នា និងជំនឿចិត្ត។ ក្រុមកីឡានេះ នឹងជួយសម្រេចបានសិទ្ធិកុមារ និងសមភាពសម្រាប់កុមារី»។
ជាមួយគ្នានេះ លោកស្រី ពុធ ធីតា ប្រធានក្លិបកីឡាបាល់ទាត់បឹងកេត និងជាសមាជិកនៃគណៈកម្មាធិការប្រតិបត្តិសហព័ន្ធកីឡាបាល់ទាត់កម្ពុជា បានគាំទ្រពេញទំហឹងទៅលើការបង្កើតឱ្យមានកម្មវិធីបណ្តុះបណ្តាលកីឡាបាល់ទាត់ GOFC នេះ ព្រោះកម្ពុជានេះ បានរួមចំណែកយ៉ាងសំខាន់ ក្នុងការបណ្តុះបណ្តាលថ្នាក់ថ្នាល់កុមារី ដើម្បីទ្រទ្រង់ទៅលើការអភិវឌ្ឍកីឡាបាល់ទាត់នារី នៅកម្ពុជា។
លោកស្រី ពុធ ធីតា ដែលជាអនុប្រធានគណៈកម្មាធិការរៀបចំកីឡាបាល់ទាត់ស្រ្តីផងនោះ បានបញ្ជាក់ថា៖«ក្នុងនាមជាស្រ្តីម្នាក់ និងជាអ្នកស្រឡាញ់បាល់ទាត់ម្នាក់ ខ្ញុំសប្បាយចិត្តខ្លាំងណាស់ ដែលបានចូលរួមជាផ្នែកមួយនៃ GOFC ។ ខ្ញុំដឹងយ៉ាងច្បាស់អំពី សារសំខាន់នៃកីឡាបាល់ទាត់ចំពោះកុមារី។ ក្រុមបាល់ទាត់កុមារីនេះ នឹងជួយយ៉ាងច្រើនដល់ការអភិវឌ្ឍកីឡាបាល់ទាត់ស្រ្តី នៅកម្ពុជា ហើយខ្ញុំគាំទ្រទាំងស្រុង ចំពោះគំនិតផ្ដួចផ្ដើមនេះ»។
ក្រោមការជួយឧបត្ថម្ភរបស់ Urban Living Solution (ULS) និងធនាគារ ABA គឺ GOFC នឹងបង្កើតជំរំបាល់ទាត់ សម្រាប់តែកុមារី នៅរាជធានីភ្នំពេញ ចំណែក ការបណ្ដុះបណ្ដាលប្រចាំសប្ដាហ៍ក៏ នឹងត្រូវបានសម្របសម្រួលដោយក្លិបនានា ដែលធ្វើជាម្ចាស់ផ្ទះ សម្រាប់ GOFC ។ តែទោះបីជាយ៉ាងណា GOFC ក៏នឹងរៀបចំវគ្គបណ្ដុះបណ្ដាលប្រចាំសប្ដាហ៍របស់ខ្លួនផងដែរ ជាមួយនឹងគោលបំណង ដើម្បីដោះស្រាយភាពខ្វះចន្លោះ ដែលមាន នៅពេលបច្ចុប្បន្ន ចំពោះកុមារីក្មេងៗ ដែលមានបំណងលេងបាល់ទាត់ ហើយគំរូនេះ នឹងត្រូវបានពង្រីកទៅកាន់ក្លិប និងរាជធានីខេត្តដទៃទៀតផងដែរ នៅពេលអនាគត។
«នៅក្នុងរយៈពេល ១០ឆ្នាំ នៃការធ្វើជាមន្រ្តីអភិវឌ្ឍន៍បាល់ទាត់ នៅប្រទេសអៀរឡង់ បញ្ហាប្រឈមធំបំផុតមួយ នៃបញ្ហាប្រឈមធំបំផុតរបស់ខ្ញុំ គឺការទទួលបានភារកិច្ចឱ្យបង្កើនចំនួនកុមារីលេងបាល់ទាត់។ ខ្ញុំរីករាយក្នុងការធ្វើការងារជាមួយ GOFC លើការដោះស្រាយបញ្ហាដូចគ្នានេះ នៅកម្ពុជា។ សូមចូលរួម និងជួយយើង ដើម្បីបង្ហាញថា កីឡាបាល់ទាត់ គឺសម្រាប់មនុស្សគ្រប់រូប»។ នេះជាការជំរុញរបស់គ្រូបង្គោលនៃក្លិបបាល់ទាត់ព្រះខ័នរាជស្វាយរៀង លោក Conor Nestor។
GOFC ត្រូវបានបង្កើតឡើង ជាអង្គការសហគមន៍មួយ ដែលមានអ្នកវិជ្ជាជីវៈនៅក្នុងឧស្សាហកម្មបាល់ទាត់ អ្នកដឹកនាំធុរកិច្ច និងអង្គការមិនមែនរដ្ឋាភិបាល និងពលរដ្ឋ ដែលមានចំណាប់អារម្មណ៍ទាំងសហគមន៍ខ្មែរ និង សហគមន៍ជនបរទេស។ ក្រុមកីឡាបាល់ទាត់កុមារីនេះ មានគោលបំណងសហការជាមួយអ្នកពាក់ព័ន្ធ យ៉ាងច្រើន ដែលមានគោលបំណងស្រដៀងគ្នានេះ និងមានបំណងជំរុញសេចក្ដីត្រូវការ ឱ្យមានកីឡាបាល់ទាត់កុមារី ហើយវិធីសាស្រ្តរបស់យើង គឺតាមរយៈដំណោះស្រាយ ដែលផ្តោតលើសហគមន៍ និងស្របតាមគោលបំណងរបស់ GOFC ក្នុងការបង្កើតសហគមន៍មិត្តភាពកុមារ ដែលមានថាមពល ដោយផ្តល់កន្លែងកីឡាប្រកបដោយសុវត្ថិភាព និងអាចចូលរួមដំណើរការបាន សម្រាប់ក្មេងស្រី។
GOFC មានបំណងបើកចំហរ សម្រាប់ការប្រើប្រាស់ឱ្យបានច្រើន តាមអាចធ្វើទៅបាន។ ដោយសារហិរញ្ញវត្ថុ គឺជាឧបសគ្គ ចំពោះលទ្ធភាពរបស់កុមារី ក្នុងចូលរួមជាមួយកីឡាបាល់ទាត់ ហេតុនេះថ្លៃចំណាយនានា នឹងត្រូវមានតម្លៃទាប ចំណែកការបោះជំរំនានា និងការបណ្ដុះបណ្ដាល គឺឥតគិតថ្លៃ សម្រាប់កុមារីទាំងអស់ ដែលនេះជាចំណុចចាប់ផ្ដើម។ ទោះបីជាយ៉ាងណាក្ដី ឪពុកម្ដាយ ទទួលបានការលើកទឹកចិត្តឱ្យចូលរួមជាសមាជិក និងរួមវិភាគហិរញ្ញវត្ថុ ប្រសិនបើពួកគេ អាចធ្វើបានទៅតាមលទ្ធភាព ដែលពួកគេអាចមាន ប៉ុន្តែការរួមវិភាគទាននេះ មិនមែនជាកាតព្វកិច្ចឡើយ។
សមាជិកអង្គការនៃ GOFC រួមមានក្លិបបាល់ទាត់ស្វាយរៀង ក្លិបបាល់ទាត់ភ្នំពេញក្រោន មូលនិធិ KMH នៃក្រុម ISI, Riel Phnom Penh Srey, កីឡាបាល់ទាត់សប្បាយរីករាយកម្ពុជាអូស្រ្តាលី (Happy Football Cambodia Australia) និងកីឡាបាល់ទាត់ សម្រាប់ជីវិត។
លោក លី ហៀង អគ្គលេខាធិការក្លិបបាល់ទាត់ភ្នំពេញក្រោន បាននិយាយថា៖«ខ្ញុំគិតថា វាជាពេលដ៏ល្អ សម្រាប់ខ្លួនខ្ញុំផ្ទាល់ និងក្លិបនេះ ដោយសារយើងតែងតែយកចិត្តទុកដាក់យ៉ាងខ្លាំង ក្នុងការអភិវឌ្ឍបាល់ទាត់ស្រ្តី ហើយជា
ការពិត យើងត្រូវលើកកម្ពស់ ទេពកោសល្យ និងបាល់ទាត់ស្រ្តី នៅកម្ពុជា ក្នុងពេលដ៏រំភើបរីករាយនេះ»៕
