ក្រុមសិស្សសាលាតំណាងឱ្យខេត្តរាជធានីចំនួន២៤ នៅទូទាំងព្រះរាជាណាចក្រកម្ពុជា សុទ្ធតែដណ្តើមបានមេដាយ ពីការប្រកួតកីឡាសិស្សបឋមសិក្សាថ្នាក់ជាតិ ឆ្នាំ២០២២ ដែលទើបបានបញ្ចប់ កាលពីថ្ងៃអាទិត្យ ប៉ុន្តែខេត្តមកពីជាយដែនសមុទ្រ កោះកុង មិនដណ្តើមមេដាយអ្វីសោះ ពីការប្រកួតនេះ។
តាមរយៈការប្រកួតចំនួន៩ថ្ងៃ នៅលើប្រភេទកីឡាចំនួន៨ រួមមានបាល់ទាត់ បាល់ទះ បាល់បោះ អត្តពលកម្ម តេក្វាន់ដូ WT វាយសី តេក្វាន់ដូ ITF និងវាយកូនឃ្លីលើតុ ដែលទើបបានបញ្ចប់ កាលពីថ្ងៃអាទិត្យ គឺក្រុមសិស្សសាលាមកពីខេត្តប៉ៃលិន ដណ្តើមបានមេដាយមាស ច្រើនជាងគេ គឺមេដាយមាស៨ និងសំរឹទ្ធ៣ ដើម្បីឈរនៅលេខ១ សម្រាប់ការប្រកួតនេះ ហើយមេដាយមាសទាំង៨នេះ ខេត្តប៉ៃលិន បានឈ្នះនៅលើប្រភេទកីឡាបាល់ទាត់ ចំនួន ១ បាល់ទះ១ បាល់បោះ១ អត្តពលិក ២ និងការប្រកួតតេក្វាន់ដូ ITF ចំនួន៣។
ចំណែកសាលាបឋមសិក្សា តំណាងឱ្យរាជធានភ្នំពេញ បានឈរនៅលេខ២ ដោយបានឈ្នះមេដាយមាស៤ ប្រាក់៥ និងសំរឹទ្ធ៣ ហើយមេដាយមាសទាំង៤នេះ ក្រុមរាជធានីភ្នំពេញ ដណ្តើមបានពីការប្រកួតវាយកូនឃ្លីលើតុ រហូតដល់៣មេដាយ ក្នុងការប្រកួតសរុប៤វិញ្ញាសា ដោយការប្រកួតវាយកូនឃ្លីលើតុនេះ ត្រូវបានលោក ស៊ុន សុទ្ធារិទ្ធ ជាអគ្គលេខាធិការសហព័ន្ធកីឡាវាយកូនឃ្លីលើតុ វាយតម្លៃជារួមថា បានដំណើរការយ៉ាងល្អ និងបានបញ្ចប់ដោយជោគជ័យ។ ចំណែកមេដាយ១ទៀត ក្រុមរាជធានីភ្នំពេញ ដណ្តើមបាន ពីការប្រកួតវាយសី។
ជាមួយគ្នានេះ ក្រុមសាលាបឋមសិក្សា មកពីខេត្តចំនួន១៣ទៀត ក៏ដណ្តើមបានមេដាយមាស ប្រាក់ និងសំរឹទ្ធ ត្រឡប់ទៅវិញផងដែរ ចំណែកខេត្តចំនួន៦ទៀត បានត្រឹមមេដាយប្រាក់ និងសំរឹទ្ធ ខណៈខេត្តមណ្ឌលគិរី រតនគិរី និងខេត្តពោធិ៍សាត បានត្រឹមមេដាយសំរឹទ្ធ ប៉ុន្តែខេត្តកោះកុង គ្មានដណ្តើមបានមេដាយ១សោះ ពីការប្រកួតកីឡាសិស្សបឋមសិក្សាថ្នាក់ជាតិ ប្រចាំឆ្នាំ២០២២នេះ៕
