បរទេស៖ មេដាយមាសដំបូងគេក្នុងព្រឹត្តិការណ៍កីឡាស៊ីហ្គេម លើកទី៣១ ក្នុងប្រទេសវៀតណាម បានធ្លាក់ទៅលើកីឡាការិនីម៉ាឡេស៊ី Nur Dhabitah Sabri កាលពីថ្ងៃទី៨ ខែឧសភា។
កីឡាការិនីរូបនេះ ទទួលបានពិន្ទុសរុប២៩០,៤៥ពិន្ទុ ក្នុងការប្រកួតលើវិញ្ញាលោតសម្តែងលើផ្ទៃទឹក កម្ពស់១ម៉ែត្រ ឯក្តជននារី ដើម្បីឈ្នះមេដាយមាស ដែលជាមេដាយមាសលើកទី៥ សម្រាប់អត្តពលិករូបនេះ បើគិតចាប់តាំងពីការបង្ហាញខ្លួនជាលើកដំបូងរបស់គេនាងក្នុងព្រឹត្តិការណ៍កីឡាស៊ីហ្គេម ឆ្នាំ២០១៣។ ដោយត្រូវបានគេចាត់ទុកថា ជាកីឡាការិនីដ៏ឆ្នើមបំផុតក្នុងតំបន់អាស៊ីអាគ្នេយ៍ Nur Dhabitah ត្រូវបានគេជ្រើសរើសឲ្យកាន់ទង់ជាតិម៉ាឡេស៊ី នៅឆ្នាំនេះ។
កីឡាការិនីរូបនេះ ដែលបានកើតក្នុងឆ្នាំ១៩៩៩ បានឈ្នះមេដាយជាច្រើន។ ក្រៅពីការឈ្នះមេដាយមាសចំនួន៥ក្នុងព្រឹត្តិការណ៍កីឡាស៊ីហ្គេម នាងបានឈ្នះមេដាយប្រាក់១ និងសំរឹទ្ធ២ ក្នុងព្រឹត្តិការណ៍កីឡាអាស៊ី ឆ្នាំ២០១៨ និងមេដាយសំរឹទ្ធ៣ ក្នុងព្រឹត្តិការណ៍កីឡា Commonwealth Games។ នាងក៏ធ្លាប់បានឈ្នះកៅអីទៅលេងក្នុងព្រឹត្តិការណ៍អូឡាំពិក២លើក ពោលគឺក្នុងទីក្រុង Rio ឆ្នាំ២០១៦ និងទីក្រុងតូក្យូ ឆ្នាំ២០២០ ប្រទេសជប៉ុន៕
ប្រភពព័ត៌មាន៖ SEA Games 2021