ក្រុមបាល់ទាត់ជម្រើសជាតិកម្ពុជាអាយុក្រោម២៣ឆ្នាំ បានប្រើការប្រកួតបើកឆាករបស់ខ្លួន ដើម្បីដាក់បន្ទុក ទៅលើក្រុមជម្រើសជាតិឡាវ កាន់តែខ្លាំង តាមរយៈការយកឈ្នះរហូតដល់ ៤-១ កាលពីថ្ងៃចន្ទ ប៉ុន្តែក្រុមសិង្ហបុរី ដែលទើបប្រកួតស្មើគ្នាជាមួយក្រុមឡាវ បានជួបភាពជូរចត់ខ្លាំងជាងនេះទៅទៀត។
តាមរយៈការប្រកួតបើកឆាករបស់ខ្លួន ក្នុងព្រឹត្តិការណ៍ស៊ីហ្គេម លើកទី៣១ ឆ្នាំ២០២១ ដែលកំពុងដំណើរការ នៅទីក្រុងហាណូយ ប្រទេសវៀតណាមនេះ ក្រុមកម្ពុជា បានធ្វើឱ្យគ្រប់គ្នា មានការភ្ញាក់ផ្អើល ទៅនឹងទម្រង់លេងដ៏ល្អរបស់ខ្លួន ហើយវាគឺរឿងដ៏មិនគួរឱ្យចង់ជឿ ដែលពួកគេ អាចយកឈ្នះក្រុមជម្រើសជាតិឡាវ រហូតដល់ ៤-១ នោះ។
តាមរយៈការប្រកួត កាលពីថ្ងៃចន្ទ ម្សិលមិញនេះ ខ្សែប្រយុទ្ធជាប្រធានក្រុម សៀង ចន្ធា បានធ្វើឱ្យអ្នកគាំទ្រ មានការភ្ញាក់ផ្អើល និងសរសើរមិនដាច់ពីមាត់ ជាមួយបច្ចេកទេសបណ្តើរបាល់ដ៏ល្អរបស់គេ ព្រោះកីឡាករបឹងកេត រូបនេះ បានអូសបាលរំលងខ្សែការពារទាំង២នាក់របស់ឡាវ រួចស៊ុតបញ្ចូលទីបានយ៉ាងល្អ នៅត្រឹមនាទីទី៤។
បន្ថែមលើនេះ ការស៊ុតបាល់ពេញជើង និងកៀកទីបំផុតរបស់ខ្សែប្រយុទ្ធ សារ ទី បានធ្វើឱ្យបាល់នោះ ភ្លាត់ចេញពីដៃរបស់អ្នកចាំទីក្រុមឡាវ ទៅប៉ះជើងខ្សែការពារ Anantaza Siphongphan រួចឡងចូលទីវិញ នៅនាទីទី១៤ ហើយបន្ទាប់មកទៀត ខ្សែប្រយុទ្ធជាមិត្តរួមក្រុមក្នុងក្លិបវិសាខារបស់គេ គឺ គី រីណា បានសម្រេចធ្វើតាមគន្លង សៀង ចន្ធា ដោយបានអូសបាល់ ចូលទៅក្នុងតំបន់គ្រោះថ្នាក់ រួចស៊ុតដោយបច្ចេកទេស ដោយខ្លួនឯង ផុតដៃអ្នកចាំទីរបស់ឡាវ ចូលទីបានយ៉ាងល្អបំផុត នៅនាទីទី៦៣។
យ៉ាងណាក៏ដោយ ភាពស្ទាក់ស្ទើរ ក្នុងការបញ្ចូលបាល់ចេញពីជើងរបស់ មិន រតនៈ បានធ្វើឱ្យខ្សែប្រយុទ្ធរបស់ឡាវ Phouvieng Phounsavath ដណ្តើមបាល់នោះបាន រួចស្ទុះទៅស៊ុតបាល់នោះ ចូលទីក្រុមកម្ពុជា បានសម្រេច នៅនាទីទី៦៧ ប៉ុន្តែខ្សែប្រយុទ្ធទើបដាក់ឱ្យចូលលេង អ៊ីម សំអូន របស់ក្រុមគិរីវង់សុខសែនជ័យ បានស៊ុតបញ្ចូលទី១គ្រាប់វិញ នៅនាទីទី៧១ ដើម្បីបញ្ចប់ការប្រកួត ជាមួយលទ្ធផល ៤-១។
តាមរយៈការរកឃើញជោគជ័យដ៏ធំនេះ ធ្វើឱ្យអ្នកគាំទ្រកម្ពុជា នាំគ្នាសរសើរពីទម្រង់លេងដ៏ល្អរបស់ក្រុមកម្ពុជា ដោយពួកគេ បានសហការគ្នាលេងយ៉ាងល្អ ហើយការដណ្តើមបាន៣ពិន្ទុលើកនេះ នឹងជួយផ្តល់កម្លាំងចិត្តកាន់តែធំ សម្រាប់កម្ពុជា ក្នុងបន្តទៅជួបក្រុមជម្រើសជាតិសង្ហបុរី ដែលបានជួបភាពជូរចត់ខ្លាំងជាងក្រុមឡាវ ទៅទៀត កាលពីយប់ម្សិលមិញនោះដែរ។
បើទោះបីជាក្រុមជម្រើសជាតិសិង្ហបុរី បានស្មើ ២-២ ជាមួយក្រុមឡាវ ក្នុងការប្រកួតបើកឆាកប្រចាំពូលBនេះ ប៉ុន្តែសម្រាប់ការជួបក្រុមជម្រើសជាតិថៃ កាលពីយប់មិញនេះ ពួកគេ បានក្លាយជាក្រុម ដែលរងគ្រោះខ្លាំង នៅលើទីលាន ព្រោះថៃ ដែលទើបជួបការឈឺចាប់ខ្លាំង ដោយសារភ្លាត់ចាញ់ក្រុមម៉ាឡេស៊ី ២-១ ក្នុងការប្រកួតបើកឆាកនោះ បានលត់ក្រុមសិង្ហបុរី រហូតដល់ ៥-០។
ជាមួយលទ្ធផលនេះ បានជួយឱ្យក្រុមថៃ ឡើងទៅឈរនៅលេខ១ ប្រចាំពូលB នេះជាបណ្តោះអាសន្នវិញ ហើយកម្ពុជា ឈរនៅលេខ២ ម៉ាឡេស៊ី ឈរនៅលេ៣ ដោយក្រុមទាំង៣នេះ មាន៣ពិន្ទុស្មើគ្នា ខណៈក្រុមឡាវ ឈរនៅលេខ៤ និងក្រុមសិង្ហបុរី ឈរនៅលេខ៤ ចុងក្រោយគេ៕
